الموضوع: فلوانس 2014 من القاهرة لشرم ثم القاهرة ثم شرم

جميل جدا :]
اعتقد انه واضح ان العربية اتوماتيك صح ؟!
طيب بالنسبة لقطع الغيار اخبارها ايه !؟
ربنا يباركلك فيها يا رب :]

المشاركة الأصلية كتبت بواسطة engahmed13

سافرت بالعربية الجديدة e2 من القاهرة لشرم المسافه حوالي 500 كم فقولت اعمل تقرير على قد فهمي في العربيات يمكن يفيد حد
المميزات
1- ثبات روعه في المنحنيات انا أخدت منحنيات ابو زنيمه بسرعه 106 كم/س ومكنتش قلقان ابدا وممكن كنت ازود عن كده ودي منحنيات جبليه صعبه جدا
طيب فيه مطالع مع منحنيات عند دخول شرم....كانت عامله أيه فيهم؟ يعنى فيها عزم و لا كسفتنا؟
2- هدوء ونعومه خطيرة بجد كنت حاسس اني واقف
3- استهلكت بنزين 34 لتر بسرعه 120كم/س معظم الطريق عدا 60 كم مشيت بسرعه 180 كم/س وطبعا طول الطريق تكييف
ده أستهلاك رووووووووووووووعة.....يعنى حضرتك تروح القاهرة رايح راجع بنصف تنك بنزين....معقولة الكلام ده؟؟!! ده الميجان اللى بقول عليها موفرة جدا بتعمل 43 لتر رايح راجع
4-السحب فعلا فوق ال 50 كم/س شديد جدا وال كيك داون روعه وانصفني في كل المواقف
5- مثبت السرعه وحدد السرعه كويسين في السفر
6- واسعه جدا ومريحه جدا
7- التكييف كان كويس جدا بس درجة الحرارة بره كانت 32 يعني مش هنقدر نحكم عليه غير في الصيف بس انا كنت جايب بكرة الفريون على نصفها عشان عندي تكييف عادي.
8-سرعة ال 160 كم/س فيها هادي جدا ومفيش صوت لموتور او عفشه
دى سرعة عالية جدا و فيه عربيات كتير بتتكشف فيها و بيطلع صوت الموتور زى الجرار....برافو
9- تاني مرة سفر لشرم كنت ماشي على سرعه 150 كم /س ووصلت ب 45 لتر مع تكييف برضو.
ده روعة جدا برده لأن السرعة دى عالية و فيه مقاومة هوا محترمة و المفروض الأستهلاك يعلى جدا
10- كمبيوتر الرحلات دقيق في معدلاته. بس بعد ما فهمتها.
11- باور خفيف جدا وبيتقل مع السرعات فبتحس بثبات الدريكسيون معاك
12- البلوتوث جميل وواضح وكمان ممكن تشغل الملفات من الموبايل بدون وصلة aux عن طريق البلوتوث.
13- كاسيت زكي لا يغلق مع كونتاكت ولكن مع فتح أي من البابين الأماميين وكمان بيعلى مع الدوشه بسبب السرعه .
14 -نور الشبورة الخلفي مهم جدا في السفر في الطرق الجبليه ليلا انا كنت بتفاجئ بسيارات امامي بسرعه بطيئة كالمتوقفه بالنسبة لسرعتي خصوصا لو حد مقابلك مديك العالي او زينون
15 - النور العالي تحفه وقوي جدا ومش محتاجه زينون خصوصا ان العالي ما بيفصلش الواطي.
أهى دى نقطة جميلة جدا و فعلا هتفرق فى إضاءة العربية بقوة
16 - وحده امان في وحدات رفع الزجاج لو حد احطط ايده الزجاج بيفتح تاني ودي مهمه جدا للاطفال.





العيوب : -
1- السحب قبل ال 50 كم/س وحش شويه.
متوقع الموضوع ده علشان الفتيس الcvt
2- وانا راجع كنت عايز الحق الحظر مشيت على 180 كم/س في سيناء و 170 كم/س في طريق السويس استهلكت 60 لتر
على السرعة دى متبصش خالص على إستهلاك البنزين....أنت بتطلب أداء عالى جدا من الموتور و مقاومة هوا مهولة يبقى حضرتك تنسى الأستهلاك خالص....كويس قوى أنها 60 لتر
3-صوت الموتور بيعلى بعد 5000 لفة/الدقيقه اوي
طبيعى جدا
4-مؤشر البنزين لما بيجي للنصف العربيه بتحتاج 20 لتر فقط مع ان التنك 60 لتر في حاجه مش فاهمها في مؤشر البنزين . مع العلم انه ديجيتال.
الكلام ده عكس الميجان....الميجان النصف التانى من المؤشر حوالى 35 لتر و النصف الأول من المؤشر بيبقى 25 لتر بس....يعنى برده مش بالنص بالظبط...بتتعود عليه و بتظبط نفسك على كده
5- كمبيوتر الرحلات مفيهوش غير trip واحده.
المفروض فيه trip لوحدها و trip تانية مع عداد الكيلومتر....راجع و قولى
6- قفل الاطفال بيقفل البابين اللي ورا بس وبيقفل زجاج وفتح داخلي للباب
مش فاهم أيه العيب فى كده؟ على فكرة فيه كمان قفل باب دائم ميكانيكى زى باقى العربيات...بس الكهربائى أحسن علشان لو حد كبير راكب ورا مع الأطفال تقدر تفتحله من القفل الكهربا
7- لو مش عامل قفل الأطفال الباب الخلفي يفتح حتى لو السنتر مقفول. وبكده انت مش محتاج lock اللي بيبقى في الباب نفسه وده في نظري عيب.
برده مش فاهم النقطة دى كويس....لو حضرتك بتنسى تقفل القفل الكهربا بتاع الأطفال...أستخدم القفل الميكانيكى الدائم اللى فى جنب الباب و هتستريح من الموضوع ده على طول
8- تحكم الكاسيت مستخبي بس بعد ما تحفظه هتاخد عليه
9- زراير r/o بياخه كان ممكن يحطهم جنب ال +/- وكمان مكان زرار تشغيل مثبت ومحدد السرعه ويحط الناحية التانية تحكم الكاسيت والبلوتوث.
10- البلوتوث بيتعامل مع 1 تليفون فقط مع وجود ذاكرة ل 5 تليفونات مع اني معايا سماعه جابرا بلوتوث بتشغل حتى 5 تليفونات في نفس الوقت.
11-لما بتقفل الكاست وتشغله تاني الملف اللي شغال سواء فلاشه او اسطوانه لازم يعيد من الأول يعني مثلا سورة البقرة لازم كل مرة تعيد من الأول ومابتخلصش غير في السفر
12- اماكن التخزين مش عجباني ومكان الفلاشه هيخلي ابني يتعبني وبعدين المفروض اني استغل المساحه تحت مسند اليد


ختاما العربية عجباني جدا ومفيش حاجه كامله ولو رجع بيا الزمان اكيد مش هشتري غيرها بعد ما كل يوم بيعجبني فيها حاجه جديده وكمان شكلهاعاجبني اوي.
اتمنى ان تعم الفائدة وساعدت احد في اتخاذ قرار بشأن السيارة

تقرير رائع و ألف مبروك مرة أخرى