الموضوع: ==**## تغيير الزيت والتيل للسيريون خارج التوكيل ##**==

السلام عليكم ورحمة الله وبركاته

النهارده ان شاء الله
هكتب تجربتي مع تغيرر الزيت وتركيب فلتر الزيت والتيل خارج التوكيل

هنبتدي الأول بقطع الغيار اللي اشترتها

1 - فلتر الزيت ( وهو عبارة عن حشوة الفلتر و جلدتين واحده مقاس كبير والأخرى صغيره وقطعة بلاستيكية على شكل بوز حنفيات الميه اي البزبوز )
2- الزيت وهو زيت تويوتا .
3- التيل الأصلي .

ونبتدي الاول بالشرح المصور والمكتوب على خلفية علبة الفلتر نفسها

طريقة الفك والتركيب بالترتيب كالآتي :

1- أولا يتم رفع السيارة طبعا وفك القطعه التي تسمى Bolt في الشرح في الصورة الاولى رقم 1
وهيا عبارة عن صمولة ولكن لا تفتح بمفتاح ألنكيه وانما مفتاح شبيه له ولكن مربع وليس سداسي مثل الألنكيه
بعد فكها لا يحدث اي شئ ولا ينزل اي شئ من السيارة

2- نأتي بالقطعة التي تسمى Drain Pipe وهيا مثل بزبوز حنفيات المياه وهيا تقريبا علشان لو عاوز تنزل الزيت بنفسك بطريقة سريعه حيث يتم ربط القطعه دي بخرطوم ثم تدخلها تحت مكان Bolt وبطريقة الضغط فتدخل وعندها يتم نزول الزيت من السيارة من خلال هذه البــ Pipe ولذلك المفروض انك تبقى حذر من نزول الزيت او من الأفضل انك تشبكها في خرطوم علشان الزيت ينزل منه

كما موضح بالصورة هنا

3- علشان تغير الفلتر بتفك القطعه الكبيرة كلها التي تسمى Cap وهيا التي يتم وضع بداخلها حشوة الفلتر بداخلها ويتم فكها بأدارة تسمى SST اللي هيا بتفك اي فلتر عادي نفس المقاس
ودي صورة للتوضيح بعد خروجها من العربيه وبداخلها الحشوة القديمة

4 - يتم تبديل الحشوة الجديدة بالقديمة ولكن قبل ذلك يجب ان تنظف مكان الحشوة القديمة من الزيت القديم بعد ازالتها من مكانها
وتنظف مكانها بقماشة ثم يتم تغيير الجلدة ذات المقاس الكبيرة التي توجد في الصورتين الاولى والثانية والتي تسمى Larg O-Ring

5 - ثم بعد ذلك لتنزيل كل كمية الزيت الموجوده بداخل الماتور لأنه بيبقى في بواقي قليلة عند الطبة الرئيسية يتم فكها لأزلة كل بواقي الزيت القديم ..

6 - ثم بعد ذلك يتم تركيب الحشوة الجديدة في مكانها داخل القطعة التي تسمى الــ Cap
ثم يتم ادخال الــ Cap في مكانه وربطه بواسطة الاداة SST

7 - بعد ذلك يتم وضع الجلدة الصغير ة Small O-Ring في مكانها وهو فوق القطعة التي تسمى Bolt وهيا الصامولة اللي فكيناها في أول مره
ثم وضعها في مكانها ثم الربط عليها

ملحوظة عند فك القطعة المسماه بالــ Drain Pipe التي وضعناها في الاول لتنزيل الزيت ستجد انه تم شبك فيها الجلدة الصغيرة القديمة

8 - يتم بعد ذلك وضع الزيت بداخل المحرك
وهو ده اهم حاجه بصراحه في الموضوع

أولا انا اشتريت زيت تويوتا الأصلي المصنع في السعودية
وهو كما موضح صورته

وهو عبارة عن عبوات كما موضح بالصور
العبوة تحتوي على لتر واحد فقط ويتم شراء اربع علب

ملحوظة السيريون تحتاج الى 3.5 لتر فقط

ثمن اللتر الواحد بــ 45 جنيه
يعني الأربعة لتر بــ 180 جنيه

انا مش عاوز أقولكم اداء الزيت وشكله عامل ازاي
بصراحه ربنا يبارك للي نصحني به بجد
لأنه قالي بالحرف هيفرق معاك في الصوت والاداء وقد كان
وانا نفسي مكنتش متوقع ان الفرق هيبقى كبير قوي كده
والله الواحد حس انه مكنش بيحط زيت قبل كده بجد
شوفوا في الصورة عامل ازاي

ملاحظاتي على الزيت :

1 - صوت الماتور في السلانسية هادي جدا جدا عن الاول يكاد يكون تحس ان الماتور نايم بجد
2 - عند الضغط على دواسة البنزين وزيادة عدد لفات الماتور صوت العربيه اتغير تماما عن الأول والله بجد
انا مكنتش متخيل الفرق بس ده اللي حصل
الصوت بقه حاجه تانيه خالص
3 - العربيه تحس انها بتجري لوحدها بامانة
يعني لما تبقى بتجري بالعربيه وتترك دواسة البنزين تحس ان العربيه بتجري عن الأول يعني المقاومة قلة كتير عن الأول
تحس ان الماتور بيجري لوحده بدون بنزين ومش بيقف يعني العربيه مش بتهدي سرعتها

الحاجات دي انا لاحظتها على فكره لوحدي
يعني محدش قالي عليها اوانا كنت متنبه لها خالص

ونصيحه بجد مني ان الناس لازم تجربه بجد تحفة

اما عن التيل فانا اشتريته وركبته والغريب في قطع الغيار انها بيبقى معاها زوائد زي الجلد اللي مع الفلتر

التيل برضه معاه القطع النحاس الصغيرة اللي بتثبت التيل في مكانه بالظبط بحيث انه ميبقاش مرجرج من مكانه
مع انه موجود في العربيه ولكن علشان تغيره مع التيل حتى لو مش بايظ
وهو كما في الصورة

وبذلك تم بحمد الله تغيير الزيت والفلتر والتيل بأمان اي استفسارات انا ان شاء الله موجود للرد عليها

المشاركة الأصلية كتبت بواسطة askoda

bas ana shayef eno elarkaam bta3to a2al mn Mobil 1 yeb2a ezaaay elperformance bta3oo a7san meno ??

ما هو لو فعلا ارقام موبيل وان صحيحه فعلا خصوصا انه بيتعبأ عندنا في مصر واكيد مصر ثقة طبعا

بس انا بصراحه لا اعلم فروقات الأرقام ومعانيها
ولكن انا مجرب عالطول موبيل وان من زمان
وجربت زيت تويوتا بصراحه فرق السما من الأرض
بس طبعا لسه مشوفتش بعد 10 الاف هيبقى عامل ازاي
ولكن في بداية الاداء شكلة احلى بصراحه