موبينة ولا ايه ؟ عايز رأيكم بجد
السلام عليكم
دلوقتي العربية اوقات بتتخنق و بتقطع بسيط و انهرده قطعت و اتخنقت جامد و الخنقة بتيجي و تروح و اوقات تقطيع بسيط و يروح علي طول
انا مغير موتور طرمبة بنزين و رشاشات من 4 ايام للأسف كنت خارج القاهرة في المنوفية و العربية عملت العمله الزفت دي فروحت كشفت عند ميكانيكي هناك و جربناها و عمل اسكان و قالي الرشاشات وحشة (رشاشات الب اي اللي كنت مركبها من 8 الاف كيلو بالظبط) فقولت له لا ياعم دي جديدة و كذا و كذا فقال خد قطم رشاشات من عندي جرب بيه و فعلا اداني طقم ب 100 جنية بتاع لانوس (هو سعر غريب بس الاسعار في الارياف ببلاش بدون مبالغة بالمقارنة بالقاهرة) و فرق في السحب و في التقطيع يومين بالظبط و كل حاجة رجعت زي الاول
دلوقتي انا فكيت سلوك الموبينة سلك سلك من نص ساعة بالظبط و الاشارة زرقاء بس اخر سلك من تحت في الموبينة بيعمل الشرارة بالعافية يعني لازم اقرب السلك جدا من المكان بتاعة مش زي باقي السلوك بيلقط من علي بعد
انا قربت اتجنن و طبعا خايف اغير الموبينة و العيب يستمر خصوصا انها مش موضوع 100 ولا 200 جنية دي ب 600 جنية !!! ده غير ان انا بالفعل صرفت 300 جنية قلب طرمبة و رشاشات علي الفاضي !!! اه هو السحب فرق بس مش لدرجة اني ارمي الفلوس في الارض
ياريت تشاركوني في الراي لاني تعبت من كتر المصاريف بجد و حاسس اني اتقفلت من العربية
