موضوع مهم بعد انتهاء التجربة لنقل الافادة

**engwael** · 06-11-2013 11:11 PM

الحمد لله بلية الكاتينه عندي قفشت فيي النوبيرا والسير سقط من عليها وجابت صبابات وبدات بفتح الماتور علشان نعرف ايه اللي حصل ونجيب طلباته اول تجربة كانت في شارع دمشق هناك في تفاوت شديد في اسعار قطع الغيار خصوصا الاصلية بس الحمد لله ربنا هدانى لواحد معرفة ادانى معظم قطع الغيار gm اصلي باسعار معقولة تانى تجربة انى اكتشفت ان العربية محتاجة طقم شنبر هي كانت ممكن تمشي سنه من غير ما اعمله بس انا قلت بالمرة طالما فتحنا الموتور وفعلا جبت الشنبر وركب تالت تجربة وهي الاهم اه حبيت اقول ان ديه تانى مرة الكاتينه تعملها معايا الميكانيكي استغرب خصوصا انى انا مشيت بالسير ده 12000 كيلو بس المهم انه اكتشف ليه البلية بازت لان السير كان مشدود اوى وقالي ان ممكن ارخيه شوية عن طريق تغير وضع طرمبة المية سنه بسيطة طبعا انا غيرت طرمبة اليه كمان بالمرة وقالي ان معلومة تغير وضع طرمبة الميه سنه بسيطة مش كل الناس عارفها . عندي بقي سؤال الميكانيكي بيقولي انا العربية تلين ساعتين بس لانه شمبر بس مش عمره انتو ايه رايكم الين قد ايه وشكرا وارجو اكون افدتكم.
طبعا انا مردتش اجيب شورت بلوك علشان ده زي البطيخة وانا مش فاضي للتجربة بالاضافة ان كل قطع الغيار اللي انا جبتها اصلية

**engwael** · 06-11-2013 11:15 PM

اه بالنسبه لسعار قطع الغيار بس ديه من عند واحد معرفة بس اكتشفت ان تقريبا هو معندوش فرق لانه راجل محترم اوي في شارع دمشق 1- سير الكاتينة الاصلي 235
2- البليتين اصلي 375
3- طقم شنبر اصلي 180
ديه الاسعار اللي انا فاكرها

**MITSUKERO** · 06-11-2013 11:38 PM

مبروك ياباشا

التليين 1000 كيلو ثم تغيير زيت و فلتر اوعي تسيب الفلتر

**saddam** · 07-11-2013 12:44 AM

صديقي المواطن
مبروك وأنا سعيد بيك ﻷنك صاحب فكر مستنير ولست مع أصحاب القول الخاطيء بإنك تجيب مكنة إستيراد أو حاجات تانية بينما تصلح بتاعتك عند حد فاهم وتقعد معاك 5 أو 8 سنين وتبقه عارف جواها إيه لكن الناس تصطدم مرة بميكانيكي عبيط عديم الخبرة وكفتجي يعيشهم تجربة سيئة فتخليه طول عمره يقللك التوبة أعمل عمرة لمكنة وإنت عملت التصرف السليم
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**engwael** · 07-11-2013 12:49 AM

واضح ان اللي عملته عجبك بس انت مقلتليش بردو الين قد ايه

**saddam** · 07-11-2013 03:11 AM

المشاركة الأصلية كتبت بواسطة engwael

واضح ان اللي عملته عجبك بس انت مقلتليش بردو الين قد ايه

صديقي المواطن
أنا أصلا التليين ده عندي مزاج ويوم التليين ده عندي يوم سعادة وكمان بكرة ولا بعد بكرة عندي تليين في عربيتي رقم 9 طقم الشنبر يكفيه تليين 8 ساعات ولكن أنا بلين 24 ساعة متواصلة بدور العربية وبقعد جتبها وعشايه وغدايه معاها وبجيب كراسي ونقعد مع الناس والشاي والبسكوت وتوابعهم
عشان لو أي مشكلة تبان معايه بعد كده أنزل الزيت والفلتر وأحط بقه زيوت ترميمية وشوية خلطات وأعيش المكنة لحظتها وأخليها تفتكر أمجادها القديمة ولما بلين لو بالشارع أقفل الدركسيون بقفل عصاية محدش ضامن الغدر الوطني
وهذا ما لزم بيانه ودمتم وبالتوفيق وإلى اﻷمام ومن نصر إلى نصر
ودمتم للنضال

**FAR!D** · 07-11-2013 04:42 AM

الحمد لله على قد كده اولا و ثانيا مبروك و ثالثا:
ربنا يستر علينا كلنا من غدر سير الكاتينه

**MMamdouh** · 07-11-2013 11:28 AM

المشاركة الأصلية كتبت بواسطة engwael

وقالي ان معلومة تغير وضع طرمبة الميه سنه بسيطة مش كل الناس عارفها

تعليق خارج الموضوع شوية بس ضرورى:

دا من ضمن الفروق بين ميكانيكى بيفهم و ميكانيكى بطيخة.... و زى ما احنا شايفين معلومة فى منتهى الهيافة تكلف فك موتور و طقم صبابات

مش كل ميكانيكى رخيص يبقى كويس ولا كل ميكانيكى غالى جزار

MMamdouh

**swimmer25** · 07-11-2013 12:35 PM

طيب ما هو ممكن يكون العيب كان أصلا في طرمبة المياه إنها تقيلة وإنت مكنتش تعرف؟ ولا ايه؟

الموضوع: موضوع مهم بعد انتهاء التجربة لنقل الافادة

LinkBack

أدوات الموضوع

عرض

موضوع مهم بعد انتهاء التجربة لنقل الافادة - انشر الموضوع فى :

-

-

-

المواضيع المتشابهه

تقريباً موضوع جوان غطا التاكيهات اتحل و لكن تحت التجربة

ارجو الافادة من اهل الخبرة موضوع مهم جدآ للجميع ؟,

عايز الافادة في موضوع النيتروجين

دعوة لنقل التجربة لكل من ركب يابانى أو أسيوى وربنا كرمه وركب أوروبى

ارجو الافادة من اهل الخبرة موضوع مهم جدآ للجميع ؟

الكلمات الدلالية لهذا الموضوع

المفضلات

المفضلات

ضوابط المشاركة