الموضوع: احسن اضافة وزيت للفتيس المانيوال بتاع vw

السلام عليكم مهندس شريف

موضوع النقلات و مشاكل الفتيس مش لازم تكون كلها زيوت و اخوك خبره في قصص زيوت الفتيس بالذات سواء مع الابيزا او الكوردوبا حاليا المهم ان فيه شوية حاجات حابب اضيفها هنا :-
1- ونة الغيار الخامس بيكون سببها حاجتين اما نقص زيت الفتيس و ده اكبر سبب اللي حصل معايا اكتر من مرة و كنت بحس بيه بنقص الزيت و اروح ازوده اول ما اسمعها بسبب التسريب اللي كان عندي .... و التاني ان يكون حصل تأكل في تروس الغيار و الثالث ان عندك بلية داخل الفتيس خشنة قليلا و مش بتظهر غير مع الخامس و السرعات
2- مهما حطيت من انواع زيوت غلط و غير مناسبة و خليط للفتايس دي مش بتأثر فيها علي المدي القريب و بسرعه و لكن بتأثر بعد فترات تشغيل طويلة تصل الي 50 الي 100 الف كيلومتر و مش بتكون هي السبب الرئيسي لخشونه الغيارات و اكبر سبب دايما بيكون ضبط عصاية الفتيس في الوضع السليم للتعشيق لكل الغيارات

و حط تحت اخر جملة دي اللي كبرتها مليون خط لأني جربت كتير في القصة دي و اكتشفت ان ده السبب الاكبر

3- الزيوت الغير مناسبة كلزوجة و نوع اخرها معاك هتقرفك شوية 10 دقايق الي ربع ساعه صباحا و في البرد و الشتاء فقط و بعد كده هتبقي تمام و ده بسبب ان لزوجتها عالية و لما بتسخن خلاص بتبقي زي الفل

الخلاصة :- انا شايف ان الزيت اللي انت حطيته كويس و مش هو المشكلة و لكن المشكلة عندك في ضبط العصاية صح سواء اذا كان تيش العصاية فيه تأكل و بوش مخليك مش بتدي غيارات مرتاح او مفكوكه او محتاجه ضبط و اتحركت من مكانها او دبرياجك واطي قوي و مش بيفصل مرتاح ... و شايف انك ولا تحط اضافات ولا غيره الزيت الغالي اللي انت اشتريته كافي و زياده إلا لو حابب تجرب ... براحتك ... يمكن تفيد و يمكن تحسن من الاداء

عندي تفاصيل اكتر عن كيفية ضبط العصاية لكن محتاجه صور للشرح هدور عليها و نتكلم فيها ان شاء الله