الموضوع: سيب عربيتك و جرب تمشي مواصلات .. تجربة مفيدة جدا

هى تجربه جيدة....ولكن فعلا مش حتنفع مع كل الناس
انا مثلا الشركه اللى انا فيها بينها وبين البيت بالعربيه من 10 الى 15 دقيقه .....ولو بالمواصلات من 45 الى ساعه
بالاضافه انى بركب 3 ميكروباصات....فالموضوع مؤلم جدا
هو وجودك بجانب المترو شئ جيد ...وبيشعر الواحد بالطمئنينه
ربنا يوفقك

فعلان الحياة منغير عربية راحة باااااااااااااااااااااااا ااااااااااااااااااااااااا ااااال كفاية انت انتا تبقا قاعد فى المكان شغل ولا خروجة كدا و مرتاح البال مبيقاش عندك هوس العربية هتتسرق العربية هتتخدش و هنزل مش هلاقيها ووووووو

هى طبعا راحه نفسيه من السواقه والتدوير على الركنه والقلق على العربيه بس الواحد لو مشى بالمبدأ ده يبيع العربيه أحسن لان اكتر مشاوير الواحد هى مشاوير الشغل والشىء الاخر كده الواحد بيحافظ على العربيه للى هيشتريها بعده

المشكله عندى بقى المواصلات للشغل صعبه شويتين لانى ساكن فى الهرم وطبعا علشان اوصل للمترو باخد ميكروباص غير ادمى وطبعا محطه مترو الجيزة مقفوله

انما لو اللى مواصلاته مترو بس وخاصة لو المترو يقدر الواحد يقف فيه من غير زحمه يبقى كويس طبعاً

المشاركة الأصلية كتبت بواسطة sanhory

السلام عليكم

وعليكم السلام ورحمة الله وبركاته

انا عارف طبعا ان تجربتي مش حتنفع مع كل الناس بس حابب احكيلكم التجربة

انا بقالي اسبوع بمشي من غير عربية و بركب المترو او ميكروباص و بتمشى 10 او 15 دقيقة كل يوم
بس طبعا في ايام مثلا بكون حعمل كذا مشوار حروح الموقع مثلا بعدين اروح المكتب فباخد العربية

نقول بقى المميزات

1- شوية مشي كدا يخلوا الواحد شباب و يخلصونا من الكرش و فعلا الواحد حاسس انه بقى انشط في الاسبوع ده

انت ممكن تلعب رياضة تروج الجيم كدا وتظبط نفسك ساعة كدا ولا حاجة بعد الشغل حتبقى تمام من غير كرش

2- توفير رهيب في المصروف اليومي

فعلاً بعيد عن مصاريف البنزين

3- توفير اهلاك السيارة بمشوار روتيني سخيف زي الشغل بالذات اذا كان في مواصلات كويسة لهذا الشغل اللعين (دلع عربيتك و ستتها )

عندك حق وبعدين الواحد بقى بيخاف من الزحمة بسبب سواقين التكسيات اللي بتدخل كدا ومش هاممها

4- صيانة العربية مش حتلاقيها بتغب عليك كل فترة قريبة و عداد الكيلومتر بتاع العربية ميبقاش عمال يعد و يجري و تلاقيها عاملة رقم كبير و تعجز منك

وكمان بعد إعادة البيع مش حتكون قاطعة عداد كبير

5- توفير الوقت و دي نسبية من شخص لاخر انا بتمشي شوية 10 دقايق لمحطة المترو و باخد المترو من المعادي للملك الصالح في 10 دقايق و انزل اتمشى 5 دقايق اكون في معهد الاورام مشواري كده اخد 25 دقيقة و مفيش تدوير على ركنة ولا غيره
لو بالعربية 15 دقيقة لو الطريق فاضي خالص لكن مع زحمة الكورنيش اديني 45 ل 60 دقيقة و خاصة الحتة اللي عند مستشفى السلام و الحته اللي قبل الملك الصالح و في الرجوع بالعربية الطريق بيكون عادتا كويس

6- و دي اهم نقطة عندي الركنة و راحة البال , يا سلاااااام تروح كده و لا تدور على ركنة ولا تتخانق مع سايس و لا تقلق على حاجة و قاعد كده في الشغل في بطنك بطيخة صيفي , و مفيش فلوس محطوطة في الشارع و انت قلقان يا ترى حصلها ايه طب اروح ابص عليها , يااااااه ياااه

تصو مفيش مرة جيت اركن العربية إلا وانا قلقان يا جدع

خلاص هاتلك عربية بتركن لوحدها ههههههههههههههههههههههههه ه

7- الراحة من ارهاق السواقة في شوارع مصر المحروسة و التمتع بالفرجة عالشوارع و الناس . الواحد بيشوف حاجات مكانش بيعرف يشوفها و هو سايق

8- و انت بتتمشى كده عندك مطلق الحرية انك تشوف حاجة تعجبك تقف تبص عليها تشتري شوية فاكهه حلوة اي حاجة في السكة انما لو معايا العربية بكسل ادور على ركنة و لو لقيت ركنة حتلاقي سايس و حياخد منك فلوس برضه . والله ساعات بشتري فاكهه او اي حاجة بضعف سعرها لمجرد ان المحل في حته سهلة بالنسبالي و انا معايا العربية و الركنة سهلة قدامه

و طبعا العربية برضه الواحد جايبها عشان يدلع نفسه , يخرج بيها مع الاولاد او مع الاصدقاء باليل او سفرية كده , لكن المشاوير الروتينية اللي مواصلتها سهلة نريحها شوية .

احسن حاجة انك تروح شغلك بمواصلات ولا يهمك ولا برستيج ولا غيره وبليل كدا ابقى عيش بالعربية في طرق كدا مش زحمة

انا بقى عايز اقول لحضرتك انى من غير عربية من اسبوع بس غصب عنى ، وللاسف بركب موصلات عادية مش تاكسى ولا مترو ، التاكسى خراب بيوت بالنسبة لى مش هدفع اقل من 60 جنيه فى اليوم ، الاهم من كده انى شوفت كمية سفاله وقلة ادب مكنتش اتخيل انها موجودة ، ايه ياعم القذارة دى مبقاش فيه اخلاق لا عند الشباب ولا البنات بحس ان الميكروباص صاله فى شقة ، الناس بتتخانق مع بعض فى مشاكل شخصية جدا ، الواد قاعد مع البت تقولش قاعدين فى كازينو الحمامة ، ناس بتشرب بانجو ، السواق ماشى يسب الدين للناس فى الشارع ، ست تركب مع ابنها والواد يقعد يلطش فيك طول الطريق وطبعا لازم تضحك فى وشه ، نكت سخيفة بين اتنين اصحاب وكلها كلام قبيح ، ولازم غصب عنك تسمع وتشوف ، والله بجد فعلاً احنا لا شعب عظيم ولا متدين بطبعه احنا عندنا ازمة اخلاق ، وفى الاخر ربنا يهديك يا عم محمود وتخلص العربية