عايز اشتري عربيه بفكر في الاكسيل ارجو المساعده

شباب المنتدي الكرام
لو سمحتم يا رجاله انا عايز اشتري عربيه معايا في حدود 40000 و بفكر في الاكسيل في ناس شكرتلي فيها و في ناس حظرتني منها جامد عشان مشاكل في العفشه

انا عايز من العربيه الاتي:

1-شكل حلو و مقبول نسبيا
2-كامله جميع الكماليات بس مش فتحه سقف يعني مثلا
3-سحب كويس عشان حسافر بيها كتير
4-ثبات في السرعات العاليه
5-عفشه ممتازه تستحمل مطبات مصر
6-صاج ناشف من ورق و بلاستيك
7-طبعا قطع غيار منتشره و رخيصه و سهله التركيب
8-اخيراا و دي مهمه جدااااااا انا عايز عربيه عاليه بكره بل بستحقر العربيات الواطيه علي الارض هي اسم علي مسمي (عربيات واطيه)

ياريت يا شباب تساعدوني انا اسف جدا علي الاطاله

شكرا مقدما يا رجالة

ممكن دايهاتسو تريوس موديل 99 مناسبة للمبلغ اللى معاك ... وشوف أراء باقى الإخوه .. وربنا يوفقك للخير.

Following

اقتباس:

---

المشاركة الأصلية كتبت بواسطة غردقاوى

ممكن دايهاتسو تريوس موديل 99 مناسبة للمبلغ اللى معاك ... وشوف أراء باقى الإخوه .. وربنا يوفقك للخير.

---

متنفعوش
قطع غيارها قليلة وغالية جدا
وثباتها ف الضياع مش بتاع سفر

فكر فى الأبيزا موديل 2000-02
فيها كل الموصفات الى انتا بتقول عليها

عربية فيها 85 الى 90 % من متطلباتك
بيجو 405 الفرنسي مش الايراني
عربية ملهاش حل... ما عدا قطع الغيار واسعارها
انما ثبات صالون تكييف ارتفاع عفشة صاج موتور قوة كل شئ.....!!!
على راي صدام...
بيجو 405 قولا واحدا.....
عاوز اقولك دي عربية مراقبين قناة السويس
يعني العربية دي ما بطلتش دوارة ومشي من يوم ما اتركبت...على طول الخط..
وبعدين دي عربيات المراقبة بتاع الداخلية..

دور ع النظيف... وهاتها وانساها

شكراااااا جدااااااااا لكل رجاله المنتدي
بالنسبه لاقتراح استاذ جيفارا انا فعلا في ناس كلمتني عن البيجو بس قالولي قطع الغيار نادره و غاليه جدا و مش اي صانيعي يشتغل فيها و كمان انها تقفيل مصري فانا قفشت منها
بالنسبه لاستاذ حسام و اقتراح الابيزه انا كان معايا ابيزا 99 و حلوه في كل حاجه بسسس واطيه جدا علي الارض لو في كنزايه علي الارض ححك فيها و قطع غيارها كنت حبيع عفش شقتنا عشان اعرف اشتريهم.
انا في ناس قالتلي لانوس1 و اوبل فيكترا واكسنت و رينو رينبو و كيا ريو انا محتاااااار جدا
عموما الف شكر يا رجاله و مستني رئيكم

كوري قديم لا...
اسمع الكلام... لو انت عندك اسرة متجبش لانوس وريو
ولا الالماني القديم الفكترا a هتصرف والعمال هيتنكوا عليك
انت راكب اوبل يا بيه
انما لو غاوي دور ع الجولييت وادفع اللي يتقالك عليه عربية حلوة بجد ومميزة
سعرها هو سعر اللانوس زائد الفين زيادة

وبعدين مين قالك البيجو قطع غيارها قليلة ومبيفهموش فيها
الموديل الفرنساوي بتاع اواخر التسعينات او 200 ده وحش؟؟؟

امال اللانوس اللي حلوة..؟؟؟

هات يا با البيجو وعوض النقص اللي عندي
انا بحترم البيجو
لو سمعت كلام التجار هترسى على عجلة ببدالات..!!!

طب اسمع
ايه رايك ف سكودا كومبي موديل 98؟؟؟؟
وتبقى تمام ومش واطية ....!!؟؟
بس خدها كومبي عشان تبقى واخدهامن عيلة مش العادية اللي يركبوها شباب...!!

كورولا عيون

صديقي المواطن
قولا واحدا ومن غير مجاملات ولا جبر خواطر
اللي نصحك باﻷكسل ده شخص بيتمنالك كل السوء واللي نصحك تبعد عنها ده شخص أمين ومش عشان بس العفشة عشان هي مهزلة هيونداي هي وستيلر ومنجحتش في أي مكان في العالم غير في مصر عملا بالمثل العربي القديم القائل
من قلة الخيل ركبوا عالكلاب سروج

فدي عربية فاشلة وقبيحة قلبا وقالبا ومتليقش بيك ومفيش فيها أي مغريات أداء

عايز عربيات ب 40 ألف ومش تعطل نهائي ومنظر جميل
تدورلي على كورولا من 88 إلى آخر 91 أعظم كورولات الشكل ده

بعديها تدور على كريسيدا من 88 حتى 92 حتى لو ب 45 ألف عربية متحطش غير زيت وبنزين ولو مش عايز تحط زيت وتمشيها بالبركة برضو مش تقوللك ﻷ

بعديها تدور على مرسيدس معدل محرك 200 أو 230 من 77 وحتى 84 تجددها وجنوط 15 رئاسية ولون حديث وتمشي 200 براحتك وبرضو دون ال 45 ألف

وفيه ميتسوبيشي جالانت من 86 وحتى 92 عربيات محترمة وفي رقبة ألف لانسر

وفيه مازدا 929 من 87 وحتى 91

وفيه نصايح كتير وطبعا عندك في الحديث إسبرانزا 113 و 213 وغيره وغيره أكسل إيه يا راجل

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

شكرا جزيلا يا رجاله علي مجهودكم بالنسبه للاستاذ جيفارا حضرتك يا فندم انا فعلا فكرت في البيجو بس مش عارف في ناس تقول عليها كلام عسل و جاتوه كمان و في ناس بتقول كلام (قبيح) عنها و لا مؤخذه انها مش اسد ولا حاجه لا انها مرات الاسد كمان فانا بجد محتار بيقولو مشكله سخونيه و كبالن و قطع غيار و مش اي حد يفهم فيها و مشاكل في العفشه و التقفيل المصري و الموتور الايراني و اعاده البيع الصعبه الشبه مستحيله
اما بالنسبه للاستاذ صدام حضرتك اعتبرني زي اخوك عايز تتدوخني و تخليني الف حةلين نفسي انواع العربيات اللي حضرتك قولتها عندي معلومات بسيطه عنها بس كل اللي اعرفو انها نااااااادره جدا و انا ضد العربيات النادره للمشاكل المعروفه كرسيدا دي مثلا كانت مع ابويا الله يرحمه من 22 سنه محدش بيعرفها هنا لما اقول اسمها تخيل بقي لو بدور علي قطع غيار العربيه الكولت غير معروفه شكلها غريب جداااا و باب واحد كمان غير عمليه بالمره بالنسبالي بالنسبه للكرولا القديمه فهي مش بتتباع كتير و اللي عدو حالتها كويسه مش بيفرط فيها و اللي بيبعها بيبعها بفلوس مبالغ فيها جدا 45 الف و يمكن اكتر كمان بالاضافه ان الياباني عموما مقدرش علي قطع غياره الحمد لله مستوره بس مش لدرجه اني اجيب قطع غيار ياباني او الماني (اكل العيش مر و الحياه صعبه)
بس في جميع الاحوال اشكر حضرتك جداااا علي التفاعل و الافادة بجد انسان محترم ربنا يباركلك
بس انا مش عايز اطلع عن المواصفات اللي انا عايزها عموما ربنا يسهل و مستني رأيكم و رأي باقي الزملاء