تقرير نقل ملكية وترخيص ماروتي 2008
معايا ماروتي 2008 شاريها من سنة واربع شهور كان الرخصة فيها لحد شهر 11 شاريها بتوكيلين
قررت اروح أسجل وارخص
روحت الشهر العقاري عملت عقد بيع اتكلف 1185 جنيه وطلعت شهادة مخالفات وروحت المرور يوم السبت على أساس اني هاخلص في يوم
اشتريت شوية ورق و المثلث و الاسعافات ب 85 جنيه
لقيت الطفاية فاضية قالولي املاها من بافاريا روحت بافاريا قالي دي منتهية نديك واحدة جديدة وناخد القديمة وتدفع 111 جنيه قولت ماشي
اخدتها ورجعت على المرور الراجل اخد بصمة الماتور و الشاسيه وقالي يالا ،،! وأنا مش فاهم قالي العشرة جنيه بتاعتي يالا .
روحت للمهندس مضىعلى ورق الفحص و الظابط بص على الطفاية و مضى وقالي ادمغ الطفاية . روحت للراجل حفر عليها رقم الشاسية او الماتور مش فاكر . وقولتله هافحص فين قالي خلاص المهندس و الظابط مضوا يعني فحصت . طبعا من غير ما حتى يشوفوا العربية من بعيد
روحت للشباك .وبعد دوخة وشوية شبابيك ماخلصتش ورجعت تاني الأحد دفعت ضريبة سنتين عشان ناوي ابيع ان شاء الله فقولت بلاش ثلاث سنوات دفعت ضريبة 360 جنيه و تأمين 175 جنيه
والحمد لله رجعت الناهردة بالرخصة باسمي ومعايا سنتين
الموضوع اخد بالظبط 2000 جنيه