السلام عليكم...أخبار حضراتكم ايه

أنا من يوم 2 - 11 في الصعيد عندي شغل في جميع محافظات الصعيد..المهم طلعت بالعربية من الجيزة لحد أسيوط مروراً بالفيوم وبني سويف والمنيا بمراكزهم.وأنا طالع من المنيا لأسيوط النهاردة علي الطريق الغربي والساعة 10.30 بالليل وماشي 160 لمبة الحرارة نورت وطفت مع صوت إنذار وطبعاً الطريق مخيف وكانت مجازفة إني أقف في الصحراء المظلمة دي في ظروف البلد الأمنية المهببة.المهم وقفت وفتحت الكبوت جيت أفتح غطاء القربة عشان أبص علي الميه لقيتها بتغلي وفارت.بطلت العربية واستنيت ربع ساعة لحد ما هديت والحمد لله كنت عامل احتياطاتي وواخد جركنين ميه.زودتها وكله تمام وقفلت القربة ( ملحوظة : غطاء القربة مكنش مقفول لآخره في الأول وده اكتشفته بالصدمة منهم لله في التوكيل ) المهم مشيت عادي لحد ما وصلت أسيوط الدنيا زي الفل.وأول ما وصلت الفندق عملتها تاني..كلمت ميكانيكي في مصر سألني المراوح شغالة عادي قولتله أه والحرارة مش بترفع عن 90..قالي كده دورة التبريد واخدة هوا كتير أكيد القربة مكانتش مقفولة كويس.ولازم تفضيها وتملاها تاني في محطة بنزين.

هل الكلام ده صحيح ؟ ولا في مشكلة أكبر من كده.أرجو المساعدة عشان أنا علي طريق سفر لحد أسوان وهرجع من أسوان علي الغردقة ومنها علي القاهرة.

معذرة للإطالة.