الموضوع: سؤال للأباء و الامهات

السؤال المهم. الواحد مطلوب منه يدفع كام في السنه في المدرسه عشان العيل ميحتاجش دروس؟ ليه لازم دروس حتى في مدارس بتاخد 15 و 20 ألف في السنه لعيل في ابتدائي؟ أنا مش عايز عيالي ياخدو دروس في أي سنه حتى الثانويه العامه عشان يبقى اليوم فيه بركه لأن الدرس بيضيع قبله ساعه وبعده ساعه في المشوار والصرمحه مع الاصحاب وبيقل بركه اليوم ده غير اننا في ايام منتشر فيها الجريمه ومفيش اخلاق ومتضمنش ابنك ولا بنتك لما يخرج لوحده ممكن يجراله ايه.

المشاركة الأصلية كتبت بواسطة eng_hatemfathy

انا ضد تماما الارقام الفلكية دى فى المدارس وطبعا خارج قدراتى انا عندى 3 فى مدارس لو دفعت لكل واحد 10 الاف بس مش 30 زى ما حضرتك بتقول
يعنى 30 الف والرابع بكره يدخل يعنى اربعين الف طب هو الدخل السنوى كام علشان يخرج 40 الف فى المدارس بس
طبعا كلام فارغ
صحيح مدارس الانتناشيونال بتعلم تعليم راقى بس ليها سلبيات رهيبة ومش سهل توفير جو مماثل للجو الذى يشاهده الطفل لاقرانه
يعنى هلاقى ابنى جاى عايز اى باد وساعة تشوك ومصروف 600 جنيه فى الشهر وابصر ايه"على راى جدتى رحمها الله "
فمين هيقدر على الجو ده الا واحد مطحون فى الخليج ورامى ولاده فى مصر !!!!
ربنا يرحمنا ويبارك فى اولادنا جميعا

مهي هي دي المشكلة بقي...تدفع كتير او قليل مفيش فايده ...لازم تذاكرلهم في البيت برضه .والنقطة الي انت قلتها دي وجيهة فعلاً ولازم العيال تعيش عيشة اهلها و علي قدهم .

المشاركة الأصلية كتبت بواسطة Ahmed_Adham

السؤال المهم. الواحد مطلوب منه يدفع كام في السنه في المدرسه عشان العيل ميحتاجش دروس؟ ليه لازم دروس حتى في مدارس بتاخد 15 و 20 ألف في السنه لعيل في ابتدائي؟ أنا مش عايز عيالي ياخدو دروس في أي سنه حتى الثانويه العامه عشان يبقى اليوم فيه بركه لأن الدرس بيضيع قبله ساعه وبعده ساعه في المشوار والصرمحه مع الاصحاب وبيقل بركه اليوم ده غير اننا في ايام منتشر فيها الجريمه ومفيش اخلاق ومتضمنش ابنك ولا بنتك لما يخرج لوحده ممكن يجراله ايه.

مادمت قلت كده يبقي لسه مدخلتش في الدوامة يا حلو
علي كل حال تابع الموضوع لأنك حتحتاج تعرف الكلام ده

المشاركة الأصلية كتبت بواسطة khalid_mostafa

مادمت قلت كده يبقي لسه مدخلتش في الدوامة يا حلو
علي كل حال تابع الموضوع لأنك حتحتاج تعرف الكلام ده

أنا في الدوامه من شهرين بدور على مدرسه أقدم فيها لبنتي للسنه الجايه kg1 وجالي ذهول ان كل ما أسأل حد يقولي لازم دروس! طب ندفع كام يا جماعه عشان مدرس المدرسه يشتغل بضمير ويدي العيال كل اللي عنده مش يعمل فقره اعلانيه في المدرسه والفقره الكامله تبقى في الدرس بحساب تاني؟ الاجابه مفيش! طب ده المطلوب فعلا ولا ده استسهال من الأهالي؟

فيه سؤال عايز أعرفله اجابه. المدرس في المدرسه اللي بتاخد 15 ألف في السنه من العيل مرتبه الشهري كام من المدرسه؟ يعني كام يكفيه عشان يشتغل بضمير؟

طبعا فيه مدارس بتاخد 50 ألف وفيه 100 ألف مكان وبالدولار مش مصري بس دول ملناش دعوه بيهم دلوقتي.

المشاركة الأصلية كتبت بواسطة ramymechanics

المناهج بقت متخلفة جدا ومفيش أى مساحة للطفل يعيش حياته زى زمان .... يعنى هل يعقل بنتى فى تانية ابتدائى بتدرس جمع 3 أرقام زائد 3 أرقام باﻹضافة كمان والطرح باﻹستلاف و حاجات كتير بجد حرام .... أنا ومامتها مهندسين ومش ملاحقين عليها مذاكرة والبنت بتدخل تزحف للسرير وقت النوم يا كدة يا إما هتتأخر عن زميلاتها فالمدرسة

والمشكله كله في الاخر بياخد الشهاده ويركن ولازم واسطه أو فلوس عشان تعرف تشغل ابنك شغله تستاهل اللي صرفته على تعليمه. المنظومه التعليميه رابح فيها صاحب المدرسه والمدرسين انما الطلبه وأولياء الأمور بيدفعو ومايخدوش غير على دماغهم.

لو سألت في مدرسه هل لو ابني دخل مدرستكو هيحتاج دروس خصوصيه ولا لاء تحس من رد فعلهم كأنك كنت بتقولهم أنا عايزكو تطلعو ابني رحله للقمر على حسابكو!