المشاركة الأصلية كتبت بواسطة Ramy Hazem
اولا واضح جدا انك متحيز للشارك وده باين من ردك ومش عيب علي فكرة , كل واحد بيشوف السيارة من وجهه نظره واحتياجاته
دي حقيقة... بس على فكرة انا متحيز ليها قبل ما اشتريها مش بعد ما جبتها... يعني مش متحيز علشان عربيتي... ورأيي بنيته من واقع تجربتي ليها ومقارنتها بغيرها وخصوصا الفلوانس اللي ما زلت بحبها...
ثانيا انت بتقول انها معاك بقالها 9 اشهر وماشاء الله عامل بيها شغل كويس بس سؤالي هو انت جايبها اي فئة ؟؟؟ وهل الي معاك 1600 ولا 1500 القديمة ؟؟
بفضل الله معايا أعلى فئة وكنت جايبها بـ167ألف... وطبعا الموتور 1600 من أول 2012 أصلا وبيطلع 117 حصان...
ثالثا للاسف الشارك فعلا نازلة فاضية وده كان احد اسبابي في عدم الاقتناع بيها بالاضافة الي وسائل الامان والوسائل الترفيه
وانا قلت قبل كده بلاش الشارك الفاضية لأنها هتحسسك انها عربية عادية في حين ان الكاملة منها بتحسسك انك راكب ياباني بطعم الالماني...
ثالثا محدش انكر قوة الشارك ولا عفشتها ولا ادائها المتميز بس كل ده محتاج راحة نفسيه وانت قاعد جواها وحاسس ان شكلها يستاهل الي انت دفعته فيها
راحتي النفسية فيها كانت من اهم اسباب تمسكي بيها... انا بحترم العربية دي من زمان بس من كتر ما سمعت فتي كتير عنها مكنتش متوقع انها تكون رائعة كده -على الأقل مقارنة بالبومة اللي قبلها واللي للأسف بعض الناس من غير ما تجرب الشارك بتحكم عليها على اساس انها زي البومة... وبالنسبة للشكل فماعتقدش حد مختلف على انه رياضي هجومي جذاب جدا...
رابعا هل انت عندك اي ملعومة ان الشارك هينزل منها فئات اخري ولا ده مجرد توقع ؟؟؟ لاني عرفت انها نازلة فئة واحدة يمكن علي الاقل السنادي ومش عارفين السنة الي جاية ممكن يحصل ايه
اللي اعرفه ان 2014 خلاص على وشك تنزل والمفروض تنزل كل الفئات... كلم دايموند على 16606 وهم بإذن الله يقولولك الخلاصة...
خامسا مش ال abs بس هو الي بيميز البيجو , الصراحة وسعها وامكانياتها وشكلها الداخلي والخارجي بالاضافة الي سعرها المنافس اوي بالاضافة الي ان ادائها كويس وقوية وثباتها عالي برده وده بشهاده الي جربوها
بالنسبة لي الـABS مع السعر ده هو الوحيد اللي بيميز البيجو... لأن موضوع الانتشار في الشارع والشكل اللي لسة نازل مبيفرقوش معايا خالص... كل اللي يهم واحد زيي بيقطع مسافات مرعبة باستمرار على طرق منيلة بنيلة ملقيتهوش بالـ167 الف غير في الشارك... ثبات وهمي وعفشة رائعة وغير مرهقة ووسائل أمان ووسع وشياكة ومتانة صناعة وتقفيل وشوية رفاهية برضه... وطبعا ده رأيي اللي يتفق مع شخصيتي واحتياجاتي الخ انما أكيد هيختلف مع كتي غيري...