السايس والبلطجة , فى كل زنقة فى مصر فى سايس عايز فلوس بلطجة , ايه الحل ؟

**amr011111** · 13-11-2013 11:58 AM

المشاركة الأصلية كتبت بواسطة amr011111

بصراحه فئه ضاله بنت ستين فى سبعين.

استسهال للم الفلوس فى المهندسين مسعرينها ب 5 جنيه. وتلاقى واحد منهم حاجز بجرادل مكان ل 30 عربيه فى 5 جنيه
ب 150 جنيه فى اليوم فى الشهر ب 4500 جنيه احسن من اى وظيفه بس المؤهلات انه يكون بلطجى.
لدرجة ان فيه سايس بيجى الصبح بموتوسيكل من منطقه شعبيه
يعنى مهنه وواحد من لا مهنة له.

بس للأسف مفيش حل فى الموضوع ده ومواضيع تانيه كتير فى حياتنا على ما اعتقد
الدول العربيه سبقانا بسنين فى احترام الادميه وتطبيق القانون على الكل

تكمله للكلام اللى فوق ممكن كمان تبقى دافع 5 جنيه
ويطلب انك تسيب لسيادته المفتاح

سايس منهم طول النهار يركب العربيه ديه ويشيلها من هنا ويحط ديه بدالها مش فاهم هتفرق معاه ايه لما يسيب العربيات فى مكانها
ده غير سايس تانى وقف فى وسط الشارع والعربيه دايرة ونزل خد السندوتش وبياكله جوه يعنى واخد فلوس ومش بيحافظ على الحاجه

ده غير بيطلعوا بالعربيه امريكانى وطبعا صاحب العربيه يجى يسوق العربيه يلاقى العفشه بايظه ويقول ديه عربيه مش بتستحمل وهوه مش عارف ايه اللى بيحصل فى عربيته وهوه سايب المفتاح

وطبعاً العربيه ممكن تتخبط عادى جداً والسايس مش فارقه معاه مش هتاخد منه حق ولا باطل
هيقولك واحد خبطها وجرى ملحقتوش وهكذا

**elbaramawy** · 13-11-2013 12:53 PM

انا شغال في وسط البلد والله بدفع 10 جنيه يوميا للسايس

**abdelrahmanahm** · 13-11-2013 01:26 PM

أنا كمان شغلى فى وسط البلد وبدفع لواحد من دول بالشهر وقبل كده كنت بدفع 5 جنيه فى اليوم . اكتر حاجه بتجننى لما بلاقيهم واقفين قدام مول فى مكان فاااااااااضى زى 6 اكتوبر مثلا والركنات على قفا من يشيل وتلاقى واحد طالعلك يقولك ده باركنج يا بيه.. ببقى عاوز اديله باللى فى رجلى

**أحمد كمال** · 13-11-2013 02:53 PM

المشاركة الأصلية كتبت بواسطة eng_hatemfathy

ويعتقلوا دول ليه لما بيساعدوهم فى اعمال البلطجة
لسه من اقل من 5 دقايق بقول ربنا يخرجنا من البلد دى على خير مع اعتذارى لكلمة بلد فلم اعد اراى المكان الذى نحيا فيه المسمى مصر الا حظيرة خنازير كبيرة -كل خنزير يملك الحق فى التغوط اينما شاء وكيفما شاء ولا مانع ان يقض وطره على مرأى ومسمع من الحضور وليس لاخر ان يعترض
لم يعد هناك قانون ملزم وان وجد فلا يطبق الا على الضعفاء ومن لا ظهر له -اصبح التعامل مع الاشخاص بالهيئة ومن كانت هيئة انسيال دهب وكوليه ذهب وعلبة مالبورو يحترم ومن كانت ترتدى الميكرو والاستوماك بودى -هؤلاء يحترمون ويحملون فو ق الرؤوس وما دونهم قد يهان او يمتهن
ولتقرأوا مهازل الاكمنه وخاصة فى اوقات الحظر ومن الذى يمر ومن الذى يوقف بالساعات
لم يعد لطبيب او مهندس او عالم احترام وانما يحترم اصحاب ال50% ويحملوا على الاعناق
اصبح الطالب اكثر شرفا من معلمه والحارس اكثر شرفا من سيده وهكذا
نسأل الله العفو والعافية

لقد فتحت الجرح و دعكته بماء النار :( ربنا يسامحك :(

**مهند-النجار** · 13-11-2013 03:26 PM

انا بخلع سايس اية ونفخ اية
الدنيا زحمة الصراحة بماين 2 ج بالكتير ظز ف الفلوس انا عارف ان المسالة مش مسالة فلوس بس بدل مضطر اتعارك او اعرض عربيتي لضرر

**3ateef** · 13-11-2013 05:41 PM

المشاركة الأصلية كتبت بواسطة abdelrahmanahm

أنا كمان شغلى فى وسط البلد وبدفع لواحد من دول بالشهر وقبل كده كنت بدفع 5 جنيه فى اليوم . اكتر حاجه بتجننى لما بلاقيهم واقفين قدام مول فى مكان فاااااااااضى زى 6 اكتوبر مثلا والركنات على قفا من يشيل وتلاقى واحد طالعلك يقولك ده باركنج يا بيه.. ببقى عاوز اديله باللى فى رجلى

عملتها واديتهم بالجزمة, كانوا عيال من الملجأ.
حاجة تقرف.

**ahmed4000** · 13-11-2013 05:54 PM

فى وسط البلد بياجروا الباركنج (الرصيف) بالشهر وكمان مش مضمون يعنى لو جيت متاخر يقولك اتخرت ليه؟:

**AHMED.ALY** · 13-11-2013 09:05 PM

انا كنت رايح بنك فى النيل سيتى اول ما وصلت لقيت شويه ستات بيقولوا تركن يا بيه فضلو يسلمونى لبعض لحد ما وصلت عند كوبرى امبابه المهم كنت مستعجل قفلت العربيه ولسه ماشى واحده ندهت على المعلمه الكبيره وقالت لى حاسب الحاجه دفعت لها 5 جنيه قالت الجراج 10 جنيه قولت لها انا راجع بعد نصف ساعه قالت كله زى بعضه بصراحه انا خوفت على العربيه وكنت مستعجل رحت دافع وامرى لله وربنا يريحنا من الاشكال ده وحسبنا الله ونعم الوكيل

**ahmed_badawy14** · 13-11-2013 10:03 PM

النهارده بقي عرفت الدنيا ماشية ازاي في حوار السايس ده .... و ديه غالباا بتبقي من الحي و الي شغلبين في الحي بالاتفاق مع امناء الشرطه في كل قسم في الحي و لتاخد مثال و ليكن مثلاااا حي مصر الجديده منتطقة صلاح الدين و ميدان الاسماعيليه .. تمام ... الراجل بياخد حته الركنه ب 80 جنيه من الامين .. و يسيبلهالرصيف من 8 ل 3 مثلاااا تجيب 100 تجيييب 1000 هو ملوش فيييه .. فعشان كده السايس الحرامي تلاقيه زي فرقع لوز بيجري علي اي ركنه عربيه سواء طالعه او داخله و الادهي من كده انه تلاقيه لابس بتاعه فسفوي او برتقاني قال يعني عشان تبع الحي .... و حصلتلي مره ركنت ادام محطة سراي القبه الي كانت من احلي المحطات من حيث المدخل دلوقتي بقي كلها بياعييين و جزم متعلقه و كتاشي و حاجه هم ... المهم ... ركنت لقيت خرتيت طلعلي و قالي 3 جنيه ... قلتله نعم ... قالي انا تبع الحي .. قولتله هات الوصل قالي مفيش وصل ... و مسكت فيه و دبيت خناقه معاه .. و للاسف البلد ديه عينيها اتعودت علي الزباله و الخراب .. و فيه حتت في مصر كانت تحفه زي روكسي و الكوربه .. شوف دلوقتي بقت عامله ازاااي خرابه