السلام عليكم و رحمة الله
انقل ليكم تجربتي لعل حد يستفاج منها فيما بعد و يمكن المناقشة تفيدني و تفيد جميع اﻷعضاء
البداية
إعلان على إحدى مواقع النت سيارة بيكانتو 2010 1100cc
فابريقا بره و جوه
كاملة ...سنتر زجاج أمامي كهرباء تكييف كايت سي دي باور إنذار
المطلوب 62 ألف
استبن لم يستخدم- 35000 كم-صيانة بالتوكيل
في البداية والدي ربنا يحفظه هو اللي راح شافها و هو مالوش فالعربيات أوي و سايق شاهين من 2002 و قبلها 132 فيات..يعني أي عربية حديثة هتبقى بالنسبة له ناعمة و فراملها ممتازة
المهم هو راح شافها و قالي مبدئيا العربية عاجباني و هجيب ميكانيكي يبص عليها و خلاص
أنا رفضت و قلتله ﻷ لازم نروح التوكيل (من واقع خبرتي مع الميكانيكية مع ال206 أكتشفت أنهم مبيفهم ش حاجة)
قابلت الراجل تاني يوم بعد محجزت فحص فالشركة العالمية بالتليفون (توكيل كيا و رينو) بحجر النواتية عند الترعة
شفت العربية من برا على السريع مفيهاش غير خدوش بسيطة جدا زي مالراجل قال و حتة بسيطة عند الفانوس الخلفي شمال واخدة فرشاة..سألته عليها و قالي ده مش رش و لا حاجة دي مجرد لون
بعدها سيبناها للتوكيل عشان يفحص قالينا تعالوا كمان ساعتين
المهم رجعنا بعد ساعتين كانت العربية خلصانة..دفعت 330 جنيه
:H_angry[1]::_Alshmokh11::_Alshmokh11::_Alshmokh11::_Alshmokh 11::_Alshmokh11:
التقرير جاء كالتالي
يلزم تغيير سكاترا
4 جنوط
طقم دبرياج
كبل دبرياج
ترصيص
يوجد تسريب زيت و لكن لا نستطيع تحديد سببه ....لازم تكشف فالعامرية
السمكرة و الدوكو برضه لازم تكشف فالعامرية لكن لا يوجد شئ واضح
الكهرباء تمام
طبعا صاحب العربية قعد يقولي دول بيهولوا و التوكيل دايما كده
خدت العربية و ركبت معاه...بس لﻷسف مكنش في مكان أجري أخري 90
الدبرياج تقيل أوي و لازم تكبس البدال لﻵخر
الفرامل جيدة لكن ال206 أفضل
صوت الموتور واطي
مشيت فأماكن وعرة بعض الشئ لم أسمع أي صوت من العفشة
المهم قلت للراجل تمام بس 61 ألف كتير عليها
صمم على الرقم
قلتله بينا تليفونات
دخلت لمهندس الصيانة فالتوكيل و سألته عن رأيه عن العربية ككل و عن السعرالمطلوب فيها
قالي آخرها 56 ألف
قلتله إزاي عربية بقالها 35 ألف كيلو بس فيها كل المشاكل دي قالي سوء استخدام
المهم إعتذرت لصاحب العربية و تراجعت عن الشراء و لبست 330 جنيه غير المشوار
ايه رأيكم هل تصرفت التصرف السليم و لا العربية كانت فرصة كويسة
و هل فعلا التوكيل بيهول
و هل في أماكن فحص محترمة فاﻷسكندرية الواحد يروحها أرخص من التوكيل و موضوعية في فحصها
برجاء آراءكم و مقترحاتكم و تقييمكم للتجربة