المشاركة الأصلية كتبت بواسطة edodahab
السلام عليكم
انا جبت صنى الجديدة ٢٠١٤ و لسة عامل صيانة الالف فحبيت انقلكم انطباعى عن السيارة ، ممكن ميكنش فى كلام جديد بس اعتقد انه هيكون مفيد لاى حد بيفكر يشترى العربية و هحاول اكون موضوعى
اولا المميزات
العربية فعلا واسعة جدا من جوة و برة و كمان الشنطة و دة هتحسه قوى لما تشوف العربية راكنة جنب عربية تانية و تقارن حجمهم يعنى من الاخر تشيل العيلة مرتاح
استهلاك رائع للبنزين عربية موفرة بجد
يعني كام تقريباً ؟؟؟
ارتفاع السيارة اهم مميزات الصنى و بجد صعب اوى تحك فى اى مطب و كمان و انت راكبها هتحس انك اعلى من معظم العربيات اللى جنبك
الباور نااااااااعم و سلس جدا و مش محتاج اى مجهود
العفشة ناعمة و مريحة جدا
الفتيس الاوتوماتيك جميل و مش هتحس بأى نتش او نفض مع النقلات
التكييف تلاجة
صوت العربية هادى جدا لدرجة انك ممكن متسمعوش
عزل السيارة ممتاز و لو ماشى و قافل الازاز مش هتسمع صوت اى حاجة برة
فرامل العربية حديد و بيكلبش فى الارض و فعلا انقذ العربية اكتر من مرة
عوامل امان متوفرة زى ال abs ebd airbags
العربية فيها انذار و مانع السرقة و اوتولوك
انوار العربية جامدة جدا و كاشفة كل حاجة
المرايات الجانبية تبدو صغيرة لكن لما تركب تكتشف انك شايف كل حاجة وراك
تقفيل العربية من جوة محترم جدا بالرغم انه مصرى مع وجود اماكن تخزين كويسة
فين أماكن التخزين دي عشان أنا شايف انها تقريباً مفيهاش أماكن تخزين. يعني مفيش مكان في التابلوه تحط فيه الموبايل والمفاتيح ومفيش درج بين الكراسي الأمامية ومفيش أدراج تحت الكراسي وحتى درج التابلوه حجمه صغير جداً
الكاسيت صوته نقى جدا
اتزان العربية على السرعات العالية مقدرش احكم عليه عشان انا اكتر حاجة جبتها كانت ١٢٠ و كانت العربية مستقرة جدا
العربية فى مجملها مريحة و سلسة و سهلة جدا فى السواقة
ثانيا العيوب
الشكل الخارجى غريب شوية بالذات من ورا
التابلوه خاماته فقيرة و لون واحد يعنى لما تشوف تابلوه الكيا ريو تحس انك هتعيط بس الميزة فيه انه بسيط و سهل
الكاوتش الصينى هو اقذر ما فى العربية بيلم زلط طول منتا ماشى هتسمع مزيكا
سحب العربية و التسارع سيئ اتمنى انه يكون عشان العربيه لسه بتتلين مع العلم انى فى الصيانه قلتلهم الموضوع دة و كشفوا على العربية و قالولى مفيهاش مشكلة و ان شاء الله هتتحسن مع الاستخدام
شماسات التابلوه غريبة جدا يعنى مفيش غير مرايا واحدة ناحية السواق و مكان التخزين موجود برة مش جوة
ثالثا صيانة الالف
عملت الصيانة فى السبع زهراء المعادى، الصيانة عبارة عن تربيط عفشة و تغيير فلتر و زيت مع تنضيف جوه و برة و التكلفة كانت ٣٢٠
هما بيحطوا نوع زيت ايه؟؟
ملحوظة تم تفعيل الانذار مجانا
انا شايف ان العربية فى مجملها ممتازة و صفقة رابحة و هى احسن عربية فى الفئة السعرية دى
صنى الجديدة عربية عائلية ممتازة و انا مرتاح جدا بيها و ربنا يديمها نعمة و يكفينا شرها
اتمنى انى اكون مفيد لاى شخص و عذرا للاطالة
شكرا