-
الى شباب دمياط
السلام عليكم ورحمة الله
شباب نايل موتورز
باذن الله انا نازل اجازة الاسبوع الجاى 23 رمضان
وان شاء الله خلال الاجازة القصيرة (10 ايام) هشترى فيها العفش والشقه خلاص قربت تخلص
كنت عاوز مساعدة شباب دمياط يقولولي ايه احسن معارض المفروشات والاثاث فى دمياط (من حيث الجودة والامانه والسمعه)
علشان الحقيقة انا خايف يضحك عليا:original:
وياريت كمان لو المعارض ده بالعنوان وطريقه الوصول يبقى كتر خيركم
ولو حد عنده خبره سابقه فى موضوع العفش يتفضل يقولوها ويكسب فيا ثواب
-
اهلا بيك فى دمياط وان شاء الله تجيب اللى انت عايزه وميضحكش عليك
اولا حضرتك ان شاء الله اول ماتنزل ملكش دعوه بالسماسره خالص عشان دول يبيعوا ابوهم حضرتك تروح تلف على الاماكن اللى هاقولك عليها دى واصلا هتلاقى البلد كلها معارض موبيليا....طبعا لو جاى من القاهره هتاخد طريق اسماعيليه بورسعيد دمياط الداءرى وده له شرح مفصل فى الدليل السياحى لما تقرب على دمياط وبعد الكمين بعد ماتعدى قريه اسمها شطا هتكمل على طول لميدان الشهابيه المسافه اللى قبل ميدان الشهابيه دى حوالى 3 او 4 كم مليانه معارض اشهرهم اولاد الحناوى ده من اكبر صناع الموبليا فى دمياط وله برج ومعرض فى شارع جوزيف تيتو ورا سور المطار جنب بتروجت ممكن تتفرج تاخد فكره لما توصل ميدان الشهابيه هتاخد اليوتيرن وتكمل على طول هتلاقى كوبرى دمياط العلوى ماتطلعوش خليك تحت لحد اما تلاقيك طالع على الكورنيش هتاخد يوتيرن وشمال عشان تخش جوه البلد وخد عندك بقى انت هتبقى ماشى على الكورنيش هتلاقى على يمينك معارض كتير بس اللى انصحك بيهم فى الحته دى
اولاد على البدرى .....وعلى فكره له معرض فى شارع نادى الصيد بالدقى
يوسف العراقى ......وبرضه له معرض فى شارع فيصل بالهرم
هتكمل لما تدخل البلد بعد ميدان الساعه او البوسطه تاخد يوتيرن من عند النصب التذكارى وتخش من جنب عمر افندى لشارع التحرير اللى هو الشارع الاساسى فى المدينه هتلاقى قدام عمر افندى
اولاد شنشن ....وده من اكبر معارض الموبليا فى مصر وليه فرع تانى برج شنشن اخر شارع التحرير فى ميدان الدكتور مشرفه
....متولى العراقى وده جامد جدا جدا جدا وله فرع فى شارع مصدق فى الدقى
عندك برضه موبليات محمد شنشن فى شارع الجلاء بس دول غير شنشن اللى قبل كده
....احسن حد عنده انتريهات ....ابوسنه على طريق بورسعيد
....هشام القاضى برضع على طريق بورسعيد بس غالى مووووووت
فيه الناحيه التانيه لما تعدى كوبرى دمياط العلوى اسمها السنانيه فيها برضه معارض كويسه ....موبل للاثاث الفرنسى....كنوز ارت ...هاى كلاس...الشعراوى ..
...لو عايز قطع صغيره لوحدها انتيكات او مثلا طقطوقه او كراسى هزاز او اى حاجه من الحاجات اللى لوحدها دى تنزل شارع عبد الرحمن بتدخله من ميدان الشهابيه ممكن تجيبها خشب ابيض وتترش زى مانت عايز ....
بس حاول تنزل معاهم جامد تفاصل يعنى عشان هما بياعين كلام وتاخد بالك من العفش اللى هتاخده لايكون مخبوط او مجرح وان كل القطع كامله الرفوف والقواطع والزجاج والرخام ..وممكن تدى للناس اللى شغاله فى المعرض اكراميه عشان يلفوا العفش كويس وماتجرحش او يكسر منها حاجه
انا جبتلك الخلاصه دول احسن معارض موبليا فى دمياط ومصر وهما دول اللى اسعارهم عاليه شويه بس من الاخر شغلهم احسن حاجه
تنور دمياط ان شاء الله ومتنساش تاخد مشبك من عند البدرى
..mokhtar..
-
جزاك الله خيرا يا اخ مختار
انا عاوز موبليا وسط يعنى ولا غاليه اوى ولا رخيصه ( المعقول)
انا سمعت موضوع انك لازم تفاصل
يعنى لو قالك 20 الف ممكن تخلص على 13 الف ( صح الكلام ده)
-
المعقول هتلاقيه ان شاء الله وانت بتلف على المعارض هتلاقى كل الرينجات وتختار براحتك بالنسبه لموضوع الفصال عايزك يبقى نفسك طويل فى الحوارده بالمعقول وحسب الباءع يعنى اللى ب20000 بظروفها ممكن 17000 ممكن 15000 يعنى العمليه نسبيه
..mokhtar..
-
متشكر اوى يا مختار على اهتمامك ومشاركتك وادعيلى بالتوفيق
-
-
ربنا يوفقك لما فيه الخير
..mokhtar..
Content Relevant URLs by
vBSEO 3.6.0 PL2