الموضوع: فى حدود 100 الف افضل سيارة اوربى مستعمل

إن شاء الله تركب عربية كويسة بالمبلغ ده، المبلغ ما شاء الله كويس عندك خيارات متنوعة، المهم الانتقاء الجيد والتأني في الفحص والكشف على أي أي عربية تشتريها، أهم حاجة تركز على كلمة استعمال راقي ودي لازم تحسها بنفسك لما تشوف عربية مش مجرد كلام في إعلان، ومع شديد احترامي للبائع دايما صدق نفسك والمنطق ولو معاك حد خبير او متخصص.
بالنسبة لاختيارات عربية في حدود 100 ألف (اوروبي) فعندك:
1- سكودا أوكتافيا A5 موديلات منتصف الألفينات ودي عربية محترمة كانت معايا وقطع غيارها منتشرة من أي اوروبي ومطلوبة وبياعة
2- سكودا اوكتافيا A4 موديلات احدث شوية بسنتين عن اختها الكبيرة وشبابية اكتر وقطع غيارها ارخص وبرضه قطع غيار تمام ومعمرة وبياعة
3- رينو فليوانس موديلات حديثة وبرضه عربية مسمعة في السوق كويس بس من رأيي المتواضع عائلة سكودا اشيك وافخم
4- فولكس باسات 2003 (لو حابب تركب اوائل الألفينات ومعندكش مشكلة) عربية روعة بكل المقاييس وهتلاقي منها كتير بحالة ممتازة شيك جدا ومعدلات الأمان والكفاءة فيها عالية بس مش منتشرة اوي وبيعها اصعب شوية. وسعرها ميتعداش الثمانينات.
5- لو غاوي بقى اركب السيارة الملكية فولفو اوائل الألفينات s80 حاجة من كوكب تاني بس قطع غيار اصعب شوية وصيانات عند مراكز محدودة وبيع اصعب شويتين تلاتة، وموتور 2000
6- الرائعة BMW الفئة 5 موديلات 99-2000 مثلا ودي عربية طبعا مش محتاجة توضيح بس كل مافي الأمر سعة الموتور من 2000 وطالع 2300 وموديلها بعيد شوية
7- اوبل فيكترا c موديلات 2007 وطالع (بس 2007 مانيوال بس) عربية فخمة وشيك وقوية جدا وهتعجبك لو فكرت فيها.
8- بيجو 308 لو حابب حاجة عائلية وسعات تخزينية وشكل مطور برضه وموديلات قريبة.
وبالنسبالي أرشح لحضرتك حاجة من عائلة سكودا سواء 4 او 5، أو اوبل فيكترا C
وبصفة عامة الألماني دايما يكسب
اكيد ممكن يكون في خيارات تانية بس ده اللي دايما بيعجبني ومنه ركبت عربيات ولاقيتها بصراحة عربيات محترمة وقوية وكفائتها عالية، وآسف للإطالة وبالتوفيق.

اوكتافيا a4 او a5
بالنسبة للاولي هايكون سعر اقل من 100 بس موديل عالي وللتانية هايكون موديل اقدم شوية
والاولي مصاريفها محدودة جدا وحتي كااسعار اكسسورات
وفي الحالتين الاوكتافيا في وجهة نظري العربية المثالية لشوارع بلدنا ارتفاعها مناسب جدا وراحة وامان طبعا وقليلة الاعطال وسهلة البيع وسعر اعادة بيعها ممتاز
ممكن تفكر انك عاوز توفر شوية يعني مثلا تجيب ميجان هاتوفر من المبلغ دةكتيييييييير يعني ممكن تركب من 60 الف جنية
بس هاتروح صيانة اكتر من الاوكتافيا شويتين
ونصيحة عامة لو مش هاتجيب اي من العربيات اللي قولتك عليها اياك تشتري موديلات قديمة من اي عربية هاتكع كتير بعد كدة يعني تشتري من فوق 2003 لاننا داخلين 2014 يعني 11 سنة ودول مش شوية