الموضوع: عاوز رائيكوا فالعروسة ديه

أنا هقولك رأيي من وجهة نظري لأني معرفش شخصيتك. أولا هيه كبيره شويه عليك وانت لسه صغير وسهل تتجوز واحده لسه 20 سنه وهتعرف قيمه الفرق ده قدام ومش بعيد.

تاني حاجه من ناحيه مقفله فالاعتدال حلو في كل حاجه يعني لو مقفله جدا هتخنقك وهتلاقيها دايما متأخره عنك خطوه. يعني مثلا واحد صاحبي متجوز واحده من النوع الخام اللي متربي في كهف ومبيطلعلوش صوت كده عايز أقولك هيه بنته مش مراته مع انهم عندهم طلفلين بس هيه أخرها الرضاعه بس وغير كده ملهاش في أي حاجه يعني هوه اللي قاعد بالطفلين على رجله طول ماهو في البيت وطول ماهو في الشغل بنته كل ساعه لازم تكلمه (بنته عندها سنتين ونص) ده غير انه هوه اللي بيغيرلهم وبيديهم الدوا وكل حاجه جوه البيت وبره البيت هوه اللي بيعملها يعني عمرها ما تعرف تتسوق لوحدها أبدا.

فوق كده كمان مبتعرفش تستقبل ضيوف يعني مفيش الترحيب الصح ولا كده ولا نورتونا ولا ياريت تكررو الزياره تاني ولا أي حاجه من دي كأنها مش موجوده حتى لو قعدت مع حد متعرفش تفتح حوار ولا تسأل أي أسئله بتجاوب بس ولو محدس فتح كلام معاها مش هتنطق حتى لو انت اللي في بيتها ضيف. فيه موقف مثلا بتتصل بجوزها في الشغل التليفزيون مش شغال. طب اتأكدي ان الفيشه في الحيطه. أيوه خلاص الفيشه كانت مخلوعه طب سلام. وهكذا بقى كل شويه فيه كذا موقف كده بتلاقيها دايما متأخره بخطوه عن اللي حواليها.

هوه قبل الجواز كان نفسه في واحده من النوع ده جدا بس دلوقتي بعد جواز 3 سنين وشويه مبقاش مستحمل وبقى حاسس انها عبء عليه وكأنهم زي ما قلتلك بنته مش مراته. مش شرط طبعا تكون البنت اللي بتتكلم عندها تكون في المرحله دي بس حبيت أوضحلك الصوره بتبقى عامله ازاي في مواقف الحياه اليوميه.