مرايات كهرباء لنيو اكسنت

**houseiny** · 17-11-2013 10:16 PM

عملت تجربة كويسة وحبيت انقلها لحبايبنا هنا في المنتدي
كان عندي مشكلة ان نيو اكسنت 2010 مرايات مانيوال مش كهرباء ، ومع تلميعة البواب كل يوم الصبح المرايا بتتعوج ، وبيطلع عيني عشان اعدلها كل يوم
روحت للكهربائي بتاعي عشان نشيل المرايتين المانيوال ونجيب 2 كهرباء ، سألت في التوكيل قالولي الواحدة ب990 جنيه غير الضريبة والتركيب والرش والزرار يعني المجموع يعمل 2978 جنيه شامل كل حاجة ، قولت يا واد بلاها التوكيل ننزل نجيب استيراد ، سألت في الحرفيين قالولي 400 الواحدة والزرار 200 والرش ب100 يعني المجموع 1100 ، الكهربائي قالي سيبلي الموضوع ده ، طلعنا على الوكالة ، وروحنا على واحد واقف بفرشة في الشارع ، فكينا المرايتين ، وخدهم فكهم وكان في قاعدة داخلية مكسورة غيرها ، وركب 2 موتور كهرباء وجيبنا زرار ب80 جنيه : والمرايتين اتكلفوا 220 جنيه بكله ، يعني المرايتين بالزرار والتركيب اتكلفوا 350 جنيه شامل كل حاجة يعني مش مكمل تمن مرايا واحدة استيراد ولا رش ولا غيره . والحياة زي الفل . حبيت اقل التجربة للشباب وربنا يجمعنا في الخير دايماً

**msobhy** · 17-11-2013 10:30 PM

الله ينور يا باشا بجد
يا ريت بس التفاصيل ومكان الكهربائى ده

**saddam** · 18-11-2013 01:39 AM

صديقي المواطن
شكرا لتنويرك إخوتك أعضاء المنتدى الكرام بكل ما هو جديد في عالم التوفيقات واﻹفتكاسات والقضاء على العوائق ومتحرمناش من كل جديد ويا ريت تبعتلي رقمه عالخاص أخليه يجرب حظه في وحده من مرايات عربياتي جايز أعتمده جنب الأسطوات اللي شغالين في عربياتي عشان مش ملاحفين واللي شدني لموضوعك خبرته في اﻷمريكاني
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**michohat** · 18-11-2013 10:49 AM

بعد اذن حضرتك علشان انا معايا نيو اكسنت عاوز اعرف هل مرايات كهرباء معناها اني اتحكم فيها من جوه واقفل وافتح كف المرايه الفيبر واعدل من وضعيه المراية نفسها

لو كده يا ريت بعد اذن حضرتك عاوز نمره تليفونه ولو امكن بس لو تصور الزرار والمرايات بعد التركيب
لاني ناوي بإذن الله اني اعمل كده
لان المرايه عندي كفها كبير وبلاقي مشاكل ان الناس بتخبطها وهي بتفاديني مثلا في شارع ضيق