الموضوع: بفكر في الريو . رأيكم ايه ؟؟؟

المشاركة الأصلية كتبت بواسطة Ahmender

انا ركبت سيراتو قبل كده ماكانش فيها مزيكة حسب الله خالص :d وركبت اكتر من حاجه كوري ماكانش فيها اصوات. يمكن تابلوه حضرتك اللى فيه مشكلة.
وموضوع الفرق فى السعر فمفيش فرق.. يمكن الريو هتكون اغلى لانى هجيبها زيرو.. انما السيراتو كوبيه هجيبها استعمال 2011
الشارك كل ماسأل حد ماينصحنيش بيها خالص.. ومالقتش حاجه استعمال نضيفه وسعرها مقبول خالص. والجديدة غالية عليا. غير طبعا موضوع قطع الغيار خصوصا الاكسسوارات مهم جدا جدا.. انا موعود بكسر المرايات والاكصدامات بسبب اخطاء الغير

أنا عن نفسي جربت في الكوري حاجتين الهيونداي ماتريكس والكيا الريو
الماتريكس كان فيها اصوات من البلاستيك اللي ورا الدركسيون كان في البدايه صوت خفيف ومقبول وزاد اوي عند الـ 60.000 كم وكان مزعج بشكل كبير وراح لوحده بعد الـ 70.000 كم والحمد لله مظهرش تاني ده غير اصوات من عتد باب الراكب الامامي فضلت لحد الـ 145.000 كم لحد ما بالصدفه قابلت موضوع بيتكلم عن حل للموضوع ده عن طريق استخدام wd-40 ورشه على اقفال الابواب وفعلاً جربت ده والحمد لله راحت بس بعد ما كانت جننتني
لما حبيت اشتري كنت قكرت في الريو وبصراحه نظافه خامات تابلوه الريو والفرش طمنتني جداً اني مش هلاقي المشاكل دي لان فعلاً التابلوه بيديك احساس عالي بكفائه التقفيل لكن للاسف خاي ظني في النقطه دي بالتحديد لان لقيت الاصوات من التابلوه مزعجه بشكل كبير واللي عرفته بقى لما بدأت أدور في الموضوع ده أن المشكله دي عند ناس كتير من ملاك الريو ومش في مصر بس لأ دي كمان بره مصر فيها نفس المشكله وده أنا متاكد منه
مش عارف يقى السيراتو فيها الموضوع ده ولا لأ بس أنا بقى عندي شبه أقتناع ان دي مشكله في الكوري بشكل عام لانها حصلت معايا في الهيونداي والكيا
مش هقولك اني ندمان اني جبت الريو لانها بالنسبه ليا الانسب عشان أنا مش عاوز اجيب حاجه صيانتها مكلفه لكن لو كان موضوع اسعار قطع الغيار والصيانات ده مش فارق معايا كان هيبقى من الافضل اني اشتري حاجه تانيه زي الشارك او الياريس او الكورسا ومكنتش هشتري كوري بصراحه
بخصوص السحب هي معقوله اوي والـ 1400 cc مش خانقين العربيه والتكيف مش مؤثر عليها لان العربيه 107 خصان وده كويس اوي بس طبعاً ماتور السيراتو اعلى
بالنسبه للثبات مش هقدر افيدك اوي لاني مش غاوي السرعات العاليه بصراحه ومش بجري على سرعات عاليه عشان اقدر افيدك
بخصوص الشارك لو ببتكلم على شارك 1500 cc فبصراحه أنا معرفش عنها حاجه لكن الشارك الجديده الماتور الـ 1600 cc أنا مشفتش حد بيشتكي منها بصراحه لا في السحب ولا في الثبات يمكن اكبر شكوي يتبقى من ارتفاع اسعار قطع الغيار
وعموماً أنا تحت امرك في اي اسئله بخصوص الريو وبالنسبه للسيراتو الشباب بقى هيفيدوك اكتر
وانصحك تدخل قسم المتسوبيشي وتشوف راي ملاكها افضل هما اقدر على انهم يفيدوك فيها
وربنا يوفقك للافضل

المشاركة الأصلية كتبت بواسطة chicomowafy

انا معاك ان سوزوكى ارتيجا مغامره بس هى مغامره محسوبه الى حد ما اولا لما تعرف ان فى حجوزات للعربيه ل 7 او 8 شهور قدام وان الاوفربرايس فى المعارض وصل ل 13000 جنيه نقدر نعرف حجم اهتمام الناس والاقبال الهائل عليها لدرجه ان فى ناس شغالين فى التوكيل بتاعها مودرن حاجزين بالعربيتين وده معناه ان العربيه حتنتشر كويس وبناء عليه حتتوافر قطع غيار ليها والوكيل طبعا ملزم بده على الاقل طول فتره الضمان .
ثانيا لما تشوف مواصفات وامكانيات العربيه والاوبشن اللى فيها تعرف انها تستحق المغامره والانتظار لان abs مثلا او الطاره المالتى او الجنوط الاسبور دى كماليات فيها وجودها فى الريو مثلا يكلفك اكتر من 13000 الف جنيه غير انها 7 راكب و1400 يعنى استهلاك بنزين معقول طبعا مش بحاول اقنعك بيها بس بنقلك تجربتى الشخصيه لانى بحثت كتير وشوفت كل العربيات اللى فى الفئه دى وسالت اصحابها وكلمت توكيلات واتنقاشت مع ناس كتير واتفرجت على فيديوهات ومنتديات كتير لحد ما حجزت الارتيجا لانى من الاخر شايف ان العربيات الكورى بقا مبالغ فى سعرها اوى ومش بتديك الكماليات اللى تحسسك انك راكب عربيه جديده زيرو الا لو دفعت حقها وفى النهايه ربنا يوفقك وييسرلك الاصلح ان شاء الله.

أنا فعلاً متوقع نجاح للارتيجا بس يظل توقع لحد ما يتحقق بالفعل
عموماً تستلم ان شاء الله على خير وتعملنا تقرير بيها هنا وان شاء الله تبقى عند حسن ظنك