الموضوع: عاوز أعرف مميزات وعيوب الريو

المشاركة الأصلية كتبت بواسطة mhkorayem

الموضوع ده انا عملتوا من سنه تقريباً والغريب بقى ان مفيش ولا واحد من ملاك العربيه رد عليا فيه لمده سنه كامله (هو أنا دخلت في صحرا ولا ايه يا جدعان ده انا لو بسأل على لامبورجيني كنت هلاقي حد جايبها وهيرد عليا)
المهم ما علينا أنا بعد ما جبت العربيه واستخدمتها لمده 7 شهور و 6000 كم قررت ارد على نفسي (عشان لو فكرت اشتريها تاني ولا حاجه :c_laugh[1]:)
العربيه الحمد لله كويسه بنسبه كبيره
- إداء معقول جداً
- استهلاك بنزين كويس اوي (واضح ان الشركه عالجت المشكله دي عشان كان في شكاوي قبل كده من النقطه دي)
- قطع الغيار اسعارها كويسه
- الوكيل مش هايل (نقدر نقول من احسن الوحشين) بس على الاقل موفر قطع الغيار بشكل جيد وبسعر مناسب واسعار المصنعيات بالمقارنه بوكلاء تانين معقوله غير انتشار مراكز الخدمه للعربيه في كل مكان لو مش وكيل هتلاقي مركز معتمد
- العربيه شكلها لطيف جداً خارجياً وداخلياً وخامات الفرش والتابلوه حلوه
- الشنطه بسم الله ما شاء الله واسعه (بالنسبه للسيدان)
- ارتفاع العربيه أنا كنت متخيل انها واطيه اوي وهحك بيها في كل مطب لكن الحمد لله ده محصلش معايا بشكل كبير يعني خلال 7 شهور انا محكتش في مطبات غير مرتين وكان احتكاك بسيط منهم مره كان راكب في العربيه 5 اشخاص كبار
بس طبعاً لازم يكون في عيوب وهي
- ضيق الكنبه الخلفيه شويه (بس ده طبعاً عيب نسبي ممكن يكون غير مؤثر عند ناس ويكون عيب كبير عند ناس تانيه على حسب احتياجات كل شخص وبالنسبه ليا الحمد لله مش فارق معايا)
- التكيف هو مش وحش وبيبرد وكل حاجه بس كنت متوقع منه اداء اعلى من كده
- عزل الاصوات اسفل السياره مش قد كده اوي يعني بسمع صوت اي زلطه او اي حاجه بتخبط في العربيه من تحت اثناء السير بعكس الماتور اللي مبسمعلوش حس داخل العربيه لو قافل الزجاج
- رغم اني مش بسمع صوت الماتور داخل العربيه وانا قافل الزجاج الا انك لو واقف بره العربيه والعربيه دايره هتلاقي صوت الماتور مش ناعم هو صحيح شيء غير مؤثر بس مش مبسوط منه بصراحه وخاصه اني معايا ماتريكس صوت الماتور ناعم وجميل بعكس الريو
- أكتر حاجه مستفزه جداً في العربيه دي وزي ما تقولوا الحلو ما يكملش هو اصوات التزييق والتخبيط اللي من التابلوه والابواب وانت ماشي ودي طبعاً سمه من سمات الكوري بشكل عام للاسف بس كان عندي أمل ملقيش الموضوع ده في الريو وخاصة ان خامات المستخدمه في التابلوه والفرش خامات نضيفه وكانت مدياني احساس بانهم خلاص اهتموا بقى بالفنش النهائي واني مش هلاقي غلطه بس للاسف واضح اني كنت غلطان في الموضوع ده وعليا بقى دلوقتي الاختيار بين تحمل مزيكه حسب الله اللي معايا دي طول ما انا ماشي يا افكني بقى من الكوري خالص واشوف بقى حاجه ياباني ولا اوربي بس اتكوي بنار اسعار قطع الغيار (بس مع تجربه سابقه في الماتريكس عندي امل ان الاصوات دي هتخف بشكل كبير مع الوقت ولحد ده ما يحصل هأضطر اعلى الكاسيت وامري لله)
خلاصه التجربه للي بيفكر يشتري ومحتار مش فارق معاك الفلوس وتكاليف الصيانه بعد كده خليك في حاجه تانيه غير الكوري عموماً ممكن بقى تشوف شارك او ياريس او كورسا واركب واستمتع
لو بقى عاوز حاجه مترهققكش بعد كده مادياً يبقى الكوري كويس والريو بشكل خاص عربيه كويسه فعلاً بس هتلاقي شويه حاجات بسيطه كده هتعكننك شويه حاول متركزش معاها وتعايش بس في الاخر انت راكب عربيه هتعيش معاك ومش هتخذلك

استهلاك البنزين عندك كام ؟؟ وكيل العربيه ولا خليجى ؟؟