قصة غريبة حاسس إني بحلم بكبوس ( حسبي الله ونعم الوكيل )
السلام عليكم..بإختصار عشان مطولش علي حضراتكم.
طبعاً زي ما انتم عارفين إني في سفرية شغل للصعيد والبحر الأحمر بقالي 15 يوم تقريباً.طول الفترة دي ماشي بستر ربنا علي طرق لا تصلح للإستخدام الآدمي.وبحمد ربنا كل ما بوصل لمحافظة بسلام وأركن عربيتي بعد رحلة معاناه.
أنا بايت في الأقصر إمبارح في فندق اللوتس بتاع الشرطة أنا وزملائي اللي طالعين معايا.وبكرر ( بتاع الشرطة ) يعني مكان أمان وعليه حراسة وكل حاجة.والعربية كانت مركونة علي الجهة التانية من الطريق أمام الفندق.
صحيت من النوم الصبح الساعة 8 علي تليفون الغرفة واحد في الريسيبشن عارف عربيتي يقولي الحق عربيتك ملموم عندها ناس كتير.نزلت من الفزع بلبس هدومي علي السلم وأنا نازل.روحت عند العربية لقيتها مرفوعة علي كوريك من أدام !!!!!!!!!!!!!!!!!! والناس ماسكين شخصين شكلهم مسجلين خطر ومعاهم شنطة عدة فيها مفاتيح ومفكات !!!!!!!!!!!!!!! وأنا من الصدمة مش عارف أطلع الكلام من بقي.مدرتش بنفسي غير وأنا ماسك الاتنين دول بضرب فيهم ضرب أعمي والناس ماسكينهم وحاشوني بالعافية.وطبعاً من غير ما أعرف كانوا بيعملوا إيه في العربية. وحصلي حالة زي إنفلات أعصابي بقيت بشتم في الحراسة بتاعة الفندق اللي هما المفروض شرطة !! ووظيفتهم حماية ممتلكات الناس اللي نازلين عندهم.
المهم قررنا العيال وقالوا انهم كانوا بيحاولوا يسرقوا مبرد الزيت بتاع العربية من تحت !!!!!!!!!! أنا سمعت كده ومش مصدق إن وصل بينا الحال إن في حرامية في البلد محترفين لهذه الدرجة في سرقة السيارات ومحتوياتها.المهم بعد ما اتعمل معاهم الواجب وبوكس شرطة جالنا وخدهم وروحت عملت محضر بالواقعة رجعت للعربية نزلت تحتها لقيت المصفحة مفكوكة ومحطوطة علي الأرض تحتها.لفيت ساعة علي ميكانيكي عشان يربطها والنهاردة الأحد طبعاً وكله مأجز لحد ما يأست.وشايل المصفحة في الشنطة وقولت همشي بالعربية كده لحد الغردقة ( آخر مرحلة في السفرية الهباب دي ) وهناك أتصرف.
بالفعل استعنت بالله واتحركت قاصد كريم علي الغردقة خدت طريق طيبة الجديد وبعدها طريق سفاجا والقصير يعني حسبة 300 كيلو تقريباً..طول الطريق ماشي 160-180 مفيش أي مشكلة.لحد ما وصلت بوابات الغردقة .. فجأة بدون مقدمات لقيت لمبة الحرارة بتنور وتطفي.والشاشة مكتوب عليها Check the coolant go to the workshop
ركنت علي جنب بطلت العربية فتحت الكبوت وبفتح غطاء القربة عشان أبص علي مستوي المية.وخدت أكبر صدمة في حياتي
لقيت القربة مليانة علي آخرها ( طحينة ) ولونها أحمر.أقسم بالله عنيا دمعت من الصدمة.أنا بحافظ علي العربية ازاي يحصل كده.أدخل أفتح الكونتكت وأبص علي الحرارة ألاقيها 90 طبيعي !!!!!!
أشوف مقاس الزيت ألاقيه طبيعي ولونه طبيعي !!!!!!!!! أفتح غطاء التاكيهات اللي بيتحط منه الزيت ألاقي ريحة الزيت طبيعي ولونه طبيعي.بقيت هتجنن.أدور العربية الموتور صوته 100 100 ومفيهوش أي مشكلة.أنا علي حسب علمي إن لما تعمل طحينة في القربة يعني الزيت دخل علي المية يبقي جوان وش سيلندر.وإن السحب بيقل وصوت الموتور بيتغير.ده اللي أعرفه.لكن فوجئت إنها طبيعية ومفيهاش أي مشكلة والحرارة تمام.مفيش قصادي حل غير إني أمشي بيها بالراحة لحد ما أدخل البلد وفعلاً مشيت وكلمت عميل عندي دلني علي مركز صيانة بيشتغل الأحد.
روحت له كشف علي العربية وفاجئني..قاللي اللي باظ عندك الكويل بتاع التبريد ( اللي كانوا بيحاولوا يسرقوه ) وده بسبب إن في مسمار في الصمامات بتاعته ناقص وسمح بدخول زيت الفتيس علي مياه تبريد الريداتير فعملت طحينة في القربة !!
الغريب في الموضوع إن الفتيس كان بينقل عادي جداً دون أي خلل أو أي إحساس بالنقلات.
تم تغيير الكويل بآخر جديد بتكلفة 550 جنيه أصلي..وزيت فتيس بالفلتر وغسيل البودي فالف بتكلفة 1920 جنيه وغسيل دورة التبريد بالكامل وتغيير المية بتكلفة 80 جنيه وكشف شامل علي الموتور بـ 50 جنيه..وعمل ريسيت للكمبيوتر ( Basic settings ) بـ 60 جنيه.ومصنعية 200 جنيه.يعني الإجمالي 2860 جنيه.
بعدها تم تجربة العربية علي الطريق الصحرواي لحد سرعة 200 والحمد لله مفيش أي مشكلة من أي نوع....وحسبي الله ونعم الوكيل.أنا كرهت البلد دي بالغوغائية اللي فيها..وفعلاً احنا عايشين في زمن لا ملجأ لنا فيه سوي الله..ولحد دلوقتي أنا مش عارف أنام.مش مستوعب اللي حصل معايا.ازاي وصلنا للمرحلة دي .الحمد لله علي كل شئ.
