الموضوع: تجربة شنيعه مع البنك الاهلى المصرى العقيم البيروقراطى

بصراحة ما حدث لى مع البنك الاهلى المصرى احزننى للغاية ان يكون مستوى اكبر بنك مصرى بهذا التخلف والعقم
ما حدث ان جدتى كان لها مبلغ مالى بفرع البنك الاهلى فرع احمد عرابى بالزقازيق ثم توفيت جدتى ولكن الورثة ومنهم والدتى تركوا المبلغ كما هو ثم توفيت والدتى من حوالى اربع شهور وفكرت من حوالى اسبوعين ان اصرف انا واخبى واخوتى نصيبها من حساب جدتى بالبنك الاهلى ونتصدق به على روحها
وكان البنك الاهلى قرر معاقبتنا على هذا التفكير الشنيع من وجه نظر البنك طبعا

....ما حدث هو ان احد ابناء خالى كان قد سلم شهادة وفاة جدتى بالبنك وعندما توجهت للبنك فوجئت بفقد اصل اعلام وراثة وشهادة وفاة جدتى .......... ازاى معرفش والموظف يقولى انا مخدتش حاجة

....قلت مش مهم وجيت يوم تانى وجبت شهادة وفاة والدتى وجدتى واعلام وراثة امى وجدتى وتوكيلات من اخوتى لابى لصرف نصيبهم بدل ميحضروا كلهم فقالولولى بالبنك لازم كل الورثة يحضروا للبنك لتصفية تركة جدتى قلتلهم لية قالولى لازم كدة فاحتديت عليهم لغرابة وعدم منطقية المطلب وعلشان انا صفيت تركات بنوك قبل كدة ومكنش لازم حضور الورثة كلهم وكان يكفى حضور واحد فقط لتقديم طلب التصفية

....ولما احتديت وعليت صوتى قالولى طب تلات اربع الورثة وبعدين رسيت ان كفاية انا واخواتى وابى وكانى فى سوق بفاصل فى قفص طماطم

.... جيت يوم تالت ومعى ابى والتوكيلات والاوراق وقعدنا مع موظف خدمة العملاء والذى لا يفقه شئ عن خدمة العملاء يقعد دقيقة معانا ويسيبنا عشرة دقايق ويا ريتها رسيت على كدة .... الافندى بعد ممضينا على طلب التصفية واقرار تانى كدة وابويل لوحدة مضى حوالى 32 توقيع اتضح ان الافندى عمل الطلب غلط وقالنا معلش هعمل الطلب تانى

.... قلت معلش فى نفسى واصبر وعملنا تانى ومضينا تانى ثم الصاعقة الافندى وللمرة التانية غلط فى الاوراق وبعد ما مضينا شخروميت توقيع انا ووالدى ............. وهنا بصراحة مستحملتش واديته الى فية النصيب وسيبته وروحت لنائب المدير واعتذرلى وبعت لموظف تانى من قسم العمليات بالبنك وعملنا الورق فى عشر دقايق ومعرفش مجبوهوش لية من الاول وخدنا معاد على يوم الاتنين للصرف ومشينا

استنوا لسة التقيل جاى

.... رحت النهاردة انا ومعايا والدى والتوكيلات وخدنا اذون الصرف ورحنا علشان نصرف فالموظفة الى فى المراجعه قالت لوالدى توكيل اخويا الكبير مش نافع ......... لية ....... اصله عدى علية عشر سنين ولازم تاريخة يتجدد كل خمس سنين اقولها طب هما مقالوش لية ليا الكلام دة اول مرة جيت فيها ... قالتالى كل برود ماليش دعوة

.... فنتشت التوكيل منها ورحت للمدير المرة دى وحكيتلة الى حصل فجابها وقالها فين التعليمات الى بتقول الكلام بتاع تجديد التوكيل ... طبعا طلع مفيش والهانم بتخترع من دماغها وتقولة اصل السجل التجارى لازم كدة فية ...طب والتوكيل العام اية علاقته بالسجل التجارى..... المهم اجبرها على الصرف وكانت الهانم طبعا كارهة نفسها

.... جينا نصرف من موظف الشباك طلب صور البطايق وصور التوكيلات .......... لية ما احنا قدمنا صور البطايق والتوكيلات قبل كدة ..... فيقول اصل دى اتقدمت فى قسم العمليات انما هنا الصرف ......... طبعا اذن الصرف لاخواتى مكتوب فية ان الصرف بالتوكيل رقم كذا بس طبعا لا حياة لمن تنادى ، المهم كنت عامل حسابى سبحان الله وكان معايا صور للبطايق والتوكيلات واديتهملة وصرفنا

ودى كانت حكايتى مع البنك الاهلى المصرى فرع احمد عرابى الزقازيق

صحيح نسيت اقولكوا ان المبلغ الى صرفنه اول عن اخر هو 6283 جنية ليا ولوالدى واخواتى التلاته
مبلغ باهظ بردة مش كدة

الى نطلع بيه من القصة دى
1- ان الموظفين ماشيين سابهللة وبالهابولى وكل واحد تعليمات على مزاجة
2- المدير ونائبة محترمين بس عايشين فى انفصال تام عن الموظفين وميعرفوش هما بيعملوا اية لان الموظفين مبيردوش يدخلوا حد للمدير وان دخلته كدة على سهوة لما لقي بابة مكتبة مفتوح
3- على فكرة المدير اصغر بكتير فى السن من نائب المدير ومعرفش ازاى
4- مصر بلد متخلفة اداريا بشكل شنيع وحتى الموظفين الى بيخوا مرتبات كبيرة بردة زى بتوع البنوك محتاجين اعادة تاهيل وخصوصا بتوع خدمة العملاء
5- من ادوات قضاء المصالح بالجهات الحكومية الصوت العالى ومتسيبش حقك ابدا

اجيرا كل الى خرجت بية من القصة دى ان ضغط دمى بقى عالى
وعايزين البلد دى يقوم ليها قومة ............ فى المشمش

المشاركة الأصلية كتبت بواسطة eng wael

طيب لو كان المبلغ مع احترامى للمبلغ اللى كنتو بتصرفوة اكتر من كده مليون جنيه مثلا كانو عملو ايه
هيا دى مصر

كانزا طلبوا منى شهدة من اتنين موظفين لا تقل درجتهم عن الدرجة السادسة انى على قيد الحياة
ههههههههههههههههههههههههه ههههههههه

المشاركة الأصلية كتبت بواسطة saddam

صديقي المواطن
لا أعرف إصرارنا إحنه الشعب المصري على التعامل مع بنوك حكومية وإنت عارف إنه زحمة وموظفي بنوك الحكومة مبهدلين ودون المستوى فكريا وثقافيا وإجتماعيا ودايما زحمة عالفاضي كله جاي يصرف معاشات وطبعا مفيش موظف حيهتم بيك زي القطاع الخاص ﻷن هو بيبقبض مرتبه من الحكومة وملوش دعوة بيك ومش حنتكلم عن النظافة ولا ملابس الموظغين ولا اﻹتكيت ولا برستيج الموظفة والموظف ده من ناحية البنك
أما فيما يخص حضرتك فحتى لو كنت صاحب حق فمينفعش تنصح الناس إن أخذ الحق في مصر في الخناق والصوت العالي ده لا يليق بيك ومش عايزين نعمم هذه الثقافة المسيئة لنا
وهذا ما لزم بيانه ودمتم
وبالتوفيق وإلى.اﻷمام ومن نصر إلى نصر
ودمتم للنضال

ولا انا مطلبتش التغامل مع البنك الاهلى ولكن نصيبى ان الفلوس كانت فى البنك العقيم دة
ثانيا كنت اتعامل ازاى مع ناس عاملة تفتى وتفاصلنى فى الورثة الى المفروض يحضروا والى بيخترع تعليمات من دماغة

اقولكوا على المفاجاة المحترمة
حكيت ماحدث معى لصديق لى يعمل محاسب بالبنك الاهلى ولكن فى فرع اخر
تخيلوا ان ردة كان ان الفرع دة اتعمل علشان اصحاب الوسايط لانه مفيهوش شغل ومريح وبالتالى ان الى شغالين فية خبرتهم قليلة للسبب دة
واقسم بالله العلى العظيم ان دة كان مضمون ردة عليا
يعنى الدولة بتعمل فروع لاصحاب الكوسة تريحهم وتطلع عين الناس
لك الله يا شعب مصر