لا يا باشا ترتيلة بس انا طبعا عايز اعرف ازاى اختبر كفاءة الحاجات اللى حضرتك قلت عليها يعنى موبينانت البوجيهات والكابلات و طرمبة البنزين وفيه حاجة تانية انا لما بشغل العربية بشم ريحة بنزين طالعة من الشكمان لكن البوجيهات نفسها انا لسه مغير اصلي
عرض للطباعة
بص يا افندم انا هاحاول على قد ما اقدر افتكر لك الاختبارات الخاصه بالحاجات ديه
أهم حاجه لازم تشتغل والعربيه بارده جدا وطفاية الحريق تبقى جنبك (لا قدر الله احتياطى طبعا)
اى حاجه حضرتك هاتجربها هاتبقى على مسئولتك الشخصيه (يعنى من الاخر ولا اعرفك)
الموضوع مقسوم نصين
النص الاول بنزين - والنص التانى حرق بنزين
بسم الله الرحمن الرحيم نبدأ بالنص الاول
ضخ البنزين
البنزين بتنقل من التنك الى الرشاشات عن طريق طرمبة البنزين(1) بعدها يمشى فى الخراكيم ومنها اجزاء معدنيه بتبقى فى بطن العربيه (2) وبتوصل الى الرشاشات اللى على طول بتبقى قافله لكنها بتفتح لما تاخد امر من كنترول العربيه(3)
يبقى خرجنا من الكلام ده ب 3 نقاط ... الطرمبه - مواسير البنزين اللى فى باطن العربيه - الرشاشات
الطرمبه
علشان تجرب الطرمبه ليها تجربه بسيطه جدا - هات عربيه زى عربيتك ودوس بنزين جامد وشوف استجابة الموتور سريعه ولا بطيئه - لا لاقيت ان موتورك صوته بيعلى ببطئ يبقى احتمالية وجود مشكله فى الطرمبه موجوده - لكن مش أكيده - التجربه الصح ولازم يكون عندك خبره فى النقطه ديه - انك بتفك خرطوم البنزين اللى داخل للرشاشات - وزجاجه شفافه تحطه الخرطوم وحد يفتحلك الكونتاكت - المفروض تشوف اندفاع البنزين جوه الزجاجه عامل ازاى - لو ضعيف - يبقى بالسلامه طرومبة البنزين وعايزه تغير موتور أو تتغير كلها (طبعا تقدير ان ضخ الطرمبه قوى أو ضعيف لازم يكون بالخبره او انك تقارن بين عربيتك وبين عربيه تانيه لسه مغيره طرمبه جديده)
المواسير
ابسط من البساطه - نام تحت عربيتك ويكون معاك كشاف (حتى لو كنت الصبح) وافضل ماشى مع المواسير اللى فى بطن العربيه .............. ومش هاكمل اكتر من كده
الرشاشات
بص يا باشا - الرشاشات مقسومه لجزئين - جزء كهربائى وجزء ميكانيكى - بالبلدى كده - الرشاشات عامله زى حنفية الميه على طول مقفوله - لما تاخد امر بتتفتح على الاخر لكن لوقت وعلى حسب احتياج الموتور - يعنى ممكن تلاقيها فاتحه فى الطبيعى من 0.6 ثانيه الى 1.2 ثانيه وكل ما زاد وقت فتحاها كل ما زاد ضخ البنزين لغرفة الاحتراق - خلصنا الرغى نيجى للشغل
علشان تعرف هل الرشاش شغال ولا لأ (يفضل والعربيه مرتله) تفك الجاك اللى راكب على كل رشاش واحد ورا التانى لغاية لما تلاقى الرشاش اللى فاصل(لما تفك الجاك او الفيشه هاتلاقى العربيه مرتله زى ما هيه لا زادت ولا قلت) - بعدها لازم تحدد هل الرشاش مسدود ولا فاصل كهرباء........ هاتعرفها ازاى ......... زى الشاطر تبطل العربيه وتبدل جاك الرشاش اللى فاصل مع اللى جنبه - وتعيد التجربه تانى - لو المشكله اتنقلت للرشاش السليم يبقى ديه مشكلة الجاك او الفيشه بتاعت الرشاش (وده وارد جدا مع السخونه) ....... لو فضلت زى ما هيه يبقى الرشاش بتاعك بايظ
معلومه اخيره مبنيه على القراءه وليس الخبره - رشاشات الهيونداى معمره جدا جدا جدااااااااااااااااااا ونادرا ما بتبوظ
وبكده يا معلم يبقى حضرتك خلصت جزئية ضخ البنزين
هاقوم اعمل شاى وارجعلك
وكالمعتاد مفيش حاجه ببلاش - لو اى حد استفاد بالكلام
برجاء الدعاء لوالدى بالرحمه والمغفره ولوالدتى بالشفاء
بخصوص النقطه ديه - فى الاغلب بتبقى عيب رشاشات - ان الرشاشات عندك بتسيل (يعنى مش بتقفل 100%)
وده عن تجارب ملوش غير حل واحد ---- رشاشات جديده
بخصوص التنظيف بالالترا سونيك انا وجهة نظرى انه اكذوبه
اشترى رشاشات استيراد بضمان اسبوع وعلى التجربه وفى الاغلب مشكلة هاتتحل
المفروض على كلامك ان العربيه تكون مش بدور بسرعه الصبح - هل ده بيحصل معاك ؟؟ بالاضافه ان استهلاك البنزين عندك يبقى عالى هل ده برضو حاصل معاك؟؟؟؟
الجزئيه التانيه - حرق البنزين
البنزين بيحرق فى غرفة الاحتراق عن طريق شراره جايه من البوجيه
البوجيه بتوصله الشراره من السلك اللى راكب عليه
السلك اللى راكب عليه بتوصل له الشراره من الموبينه
يبقى سعادتك تعمل ايه (خلى بالك انك ممكن فى التجارب ديه تتكهرب كهربه محترمه جدا ممكن توصل لدرجة ان ايدك تتحرق من قوة الصاعقه)
أول حاجه من عند الموبينه هاتفك كابل ورا كابل وتجربه - التجربه بأنك تبعد الفيشه عن الموبينه ما يوازى 2سم تقريبا - المفروض انك تفضل شايف الشراره اللى طالعه من الموبينه وواصله الى الكابل - المفروض انك وانت عامل كده الموتور مايتأثرش ولو فيه تأثير يكون بسيط جدا
المفروض ان الاربع مخارج بتوع الموبينه يبقوا زى بعض - لو لاقيت الشراره اللى خارجه من الموبينه واحده فى الاربع مخارج تبقى موبينتك سليمه
الاختبار التانى الكابلات
المره ديه هاتفك الكابلات من ناحية الموتور وتبعدها عن راس البوجيه وتشوف الشراره اللى رايحه للبوجيه قويه ولا لأ - بالاضافه هل الشراره بتخرج من الفيشه ولا من جنب الفيشه أو من جنب الكابل (فى الحالتين لازم تغير الكابلات بكابلات أصلى جديده وسيبك من الكلام اللى هاتسمعه عن تجربه)
ملحوظه رفيعه بعد اذنك
وانت بتجرب الموبينه والكابلات لازم الموتور يكون بارد - لو حضرتك معندكش خبره احتمالية انك تقطع كابل من كابلات البوجيهات هاتزيد عن 102 % (يعنى مبروك على طب أسنان يا معلم)
اما بخصوص البوجيهات - لو كل اللى فات مظبوط يبقى تجرب بوجيهاتك القديمه - او انك تفك بوجيهاتك وتجيب حله قديمه وتحطهم فيها وتسيبهم على النار لمدة 15 دقيقه - وبعدها تركبهم تانى
ربنا يوفقك وياريت بعد أذنك لما تحل المشكله تبقى تقول لنا عملت ايه
استاذ ابو مرواناقتباس:
أول حاجه من عند الموبينه هاتفك كابل ورا كابل وتجربه - التجربه بأنك تبعد الفيشه عن الموبينه ما يوازى 2سم تقريبا - المفروض انك تفضل شايف الشراره اللى طالعه من الموبينه وواصله الى الكابل - المفروض انك وانت عامل كده الموتور مايتأثرش ولو فيه تأثير يكون بسيط جدا
المفروض ان الاربع مخارج بتوع الموبينه يبقوا زى بعض - لو لاقيت الشراره اللى خارجه من الموبينه واحده فى الاربع مخارج تبقى موبينتك سليمه
الاختبار التانى الكابلات
المره ديه هاتفك الكابلات من ناحية الموتور وتبعدها عن راس البوجيه وتشوف الشراره اللى رايحه للبوجيه قويه ولا لأ - بالاضافه هل الشراره بتخرج من الفيشه ولا من جنب الفيشه أو من جنب الكابل (فى الحالتين لازم تغير الكابلات بكابلات أصلى جديده وسيبك من الكلام اللى هاتسمعه عن تجربه)
بعد التحيه على اسلوبك العلمى فى تحديد المشكله ومحاولة حلها
فى نقطه هامه عايز اوضحها هنا
موضوع سلوك البوجيهات والموبينه الواحده ده فى مواتير التكنلوجيا القديمه فقط
اما المواتير الحديثه وبخاصه الهيونداى والكيا
فليس بهم موبينه مركزيه ومجموعة سلوك بل بيهم موبينه منفرده موجوده على رأس كل بوجيه لتقليل الفاقد فى الشراره لأقل مستوى
والصوره هنا تبين قصدى
http://i757.photobucket.com/albums/x...psbbe7cf0c.jpg
عصام باشا بنفسه اللى بيرد عليه
حبيبى والله يا ابوفارس
فاكرنى ولا لأ من ايام الدايو
يارب تكون بخير انت واسرتك الكريمه
شكرا جدا جدا على المعلومه
انت عارف انى خبرتى كلها كانت مبنيه على اللانوس ولسه ببدء فى الالنترا
لكن برضو هنرجع لنفس النقطه وهاستأذنك تصحح لى الكلام
المشكله ديه يا أما ضخ بنزين زائد أو ناقص - يا أما حرق مش مظبوط
وعلى كلامك يبقى متهيألى ان فيه موبينه من اللى على رأس البوجيه تعبانه وعايزه تتغير
الدليل على كده انه بيشتكى لما العربيه بتسخن
اللى مستغرب له حكيت البنزين النى اللى بيشمه الصبح مع الدواره - هل ممكن تكون صدفه ان الرشاش بيسيل وفى نفس الوقت موبينه بايظه