هام جدا جدا : لسكان 6 اكتوبر . مشتريكن مع انهى شركه انترنت ؟؟

السلام عليكم

انا مش لاقى حل مع شركه انترنت مصر " بهجت " الى مشترك معاها و ححول لشركه تانيه مع اول الشهر الجاى ...

بقالهم اسبوعين من اول رمضان مش عارفين يحلو المشكله ... و عمالين يقولولى كلام تخريف و دلوقتى انا داخل ب الدايل اب :sad:.

كنت عاوز اعرف افضل مزود انترنت فى 6 اكتوبر ..... لان الموضوع ده بيختلف جدا من منطقه لاخرى .

هل
تى اى داتا

لينك دوت نيت

نايل اون لاين

ولا شركه تانيه .................

ياريت تقولولى على الشركه الى مشتركين معاها اخبارها ايه فى:-

1- الدعم الفنى .
2- سرعه حل المشاكل .
3- سرعه الداون لود .
4- اعتماديه الخدمه ." عدم انقطاع الخدمه "
5- المده مابين التقديم " الاشتراك " فى الخدمه و بدأ تشغيلها الفعلى .

شكرا جزيلا لكم .

طيب بصفه عامه ... انهى احسن لينك ولا تى اى داتا ؟؟؟ ولا شركه تانيه ؟؟؟؟

انا اما كنت ساكن في اكتوبر كنت مشترك مع لينك دوت نيت وكانت سرعه عاليه وخدمه عملاء ممتازه بصراحه ..

اقتباس:

---

انا مش لاقى حل مع شركه انترنت مصر " بهجت " الى مشترك معاها و ححول لشركه تانيه مع اول الشهر الجاى ...

بقالهم اسبوعين من اول رمضان مش عارفين يحلو المشكله

---

هو ايه المشكلة الظبط؟!

قولنا كده يمكن حد تكون عدت عليه المشكلة و يعرف حلها ايه!

اقتباس:

---

المشاركة الأصلية كتبت بواسطة actronx

انا اما كنت ساكن في اكتوبر كنت مشترك مع لينك دوت نيت وكانت سرعه عاليه وخدمه عملاء ممتازه بصراحه ..

---

شكرا لحضرتك .... ادى اول مشاركه لصالح لينك دوت نت....و مستنى باقى الاراء

اقتباس:

---

المشاركة الأصلية كتبت بواسطة NaderNabil

هو ايه المشكلة الظبط؟!

قولنا كده يمكن حد تكون عدت عليه المشكلة و يعرف حلها ايه!

---

اولا شكرا على اهتمامك يا نادر باشا ..... المشكله طويله و ممله للغايه

المشكله فى خدمه الدعم الفنى الى معندهمش ادنى انواع الخبره او الاحترافيه فى التعامل مع المشاكل ... وحافظين اسطوانه كل ماحد يكلمهم يقولوه عليها .. ولما اقتراحتهم الفاشله ماتحلش المشكله ... يحاولو يقنعو العميل باالخزعبلات و التخاريف و الاوهام ... لمجرد ان محدش عاوز يروح السنترال و يشوف المشكله من هناك ولا لا .

المهم المشكله تتلخص فى الاتى

من بدايه رمضان الخدمه كانت بتقطع يومين و تيجى يوم .. الموضوع ده حصل 5 مرات لحد دلوقتى .. و حاليا مافيش نت " غير ان حصل مشكله تانيه حقولها فى الاخر " .

كلمتهم اول مره وانا عارف انى حسمع الكلام الفارغ الى دايما يقولوه و يضيعو بيه وقتهم و وقتى على الفاضى المهم كلمتهم

- ايوا يا فندم ياريت تفصل كل التلفونات الى فى البيت و توصل على الخط الرئيسى ...
اتأكد من الاسبلتر
شيل الكنفجريشن و نزله تانى ................
بلا بلا بلا .. الخ الخ الخ

عملت كل الحاجات ديه اساسا من قبل ماكلمهم ... و عملتها تانى و انا متأكد ان العيب مش من عندى

قالولى طيب يا فندم هات سلك جديد من البوكس للكمبيوتر و جرب !!!!!!!!!!!
و كلام فارغ من ده كتير (( اساسا الخط مافهوش ادنى انواع التشويش و الصوت نقى و مفهوش اى تداخلات ... وده معناه ان السلك سليم )) .. غير ان كل السلاك انا بنفسى شاريها و مبقالهاش سنه و موصل توصيلاتى صح بال RG's و كله تمام .

و برده مش مقتنعين و كلمتهم المره الخامسه قالى اكبر نكته فى العالم ... طيب يا فندم غير مكان السلك علاشان ممكن يكون ماشى جمب كبل كهرباء او كابل تكيف !!!!!!!!!!!! هبل طبعا .. وانا اساسا معنديش تكيف .. و غير كده ما السلك فى مكانه من سنه .. ايه الى جد يعنى ولا قنبله هيروشيما انفجرت فوقيه وانا مش واخد بالى !!!!
قالو طيب هات المودم نجربه
نزلتلهم المهندسين و جربو الموديم ... البيه الى هناك " استعبط " وقالى المودم كان فى مشكله واحنا حلناها ( هههههههههههههههههه ) ... و و طبعا انا علاشان عارف انه كلام فارغ واستعباط .. سالته بسخريه و ايه المشكله الى حلها " الباششويش " قالى هو كان فى مشكله واتحلت !!!!!!!!!!!!!!!!! رجعت البيت الوضع كما هو و مافيش كونكشن

رجعتلهم انهارده تانى المهندسين فى عز الحر ... وقولته غير المودم .... غيرلى المودم ... رجعت البيت لقيت المودم بايظ و مش بيتعرف .

بجد انا مش فاهم انى شركه محترمه فى العالم .. تطلع جهاز مودم بايظ من الشركه ....؟؟؟ يعنى طلعوه من غير ما حد يجربه !!!!!!!!!!!!
غير ان المودم ده كان مستعمل و واضح انه متبهدل !!!!!!! طيب جربه قبل ماتدهونى بدل ماترجعنى المشوار ده تانى !!!!!!!

انا بينى وبين انى اشتكيهم فى جهاز تنظيم الاتصالات خطوه ....... لو حد استفزنى اكتر من كده حبلغ عنهم بدون تردد .

الغريب ان مع كل الحوارات الفاشله ديه ... انا بعاملهم بمنتهى الزوق و بشكرهم .. و كل سنه انتا طيب ... و تعبتك معايا و هما معنهدمش ادنى انواع الاحساس المفروض انى اكون بالنسبالهم عميل مميز .. انا مشترك معاهم من اكتر من سنتين و حتى لما غيرت سكنى فضلت معاهم المفروض يكون فى اهتمام شويه !!! شئ غريب :ANSmile23:

حضرتك روح لينك دوت نت
شركة ممتازة و لو عندك مشكلة مش بيسكت غر لما يحلها
انا اول لما اشتركت كان عندى مشكلة النت كان كل 5 دقائق يقطع
كلمتهم و راح باعت واحد اسنترال و المهندس اللى راح كلمنى من هناك بنفسه و قالى مافيش مشاكل فى السنترال و انا هاجيلك دلوقتى
و فعلا بعد 10 دقائق جالى و لقى خط التليفون فى مشاكل راح مغير سلك الخط كله و اتحلت المشكلة و مدفعتش ولا مليم و نفس اليوم بليل الشركة كلمتنى بيطمنوا لو فيه مشاكل تانى ولا لاء وانا بقالى 5 سنين مشترك معاهم

على فكرة انا مش شغال فى الشركة :)

اقتباس:

---

المشاركة الأصلية كتبت بواسطة Hacker5

حضرتك روح لينك دوت نت
شركة ممتازة و لو عندك مشكلة مش بيسكت غر لما يحلها
انا اول لما اشتركت كان عندى مشكلة النت كان كل 5 دقائق يقطع
كلمتهم و راح باعت واحد اسنترال و المهندس اللى راح كلمنى من هناك بنفسه و قالى مافيش مشاكل فى السنترال و انا هاجيلك دلوقتى
و فعلا بعد 10 دقائق جالى و لقى خط التليفون فى مشاكل راح مغير سلك الخط كله و اتحلت المشكلة و مدفعتش ولا مليم و نفس اليوم بليل الشركة كلمتنى بيطمنوا لو فيه مشاكل تانى ولا لاء وانا بقالى 5 سنين مشترك معاهم

على فكرة انا مش شغال فى الشركة :)

---

شكرا يا مستر هاكر

ادى تانى مشاركه لصالح لينك

انا فعلا شكلى حشترك مع لينك

انا ساكن في أكتوبر في الحي الثالث
ومشترك من أكتر من 6 شهور مع تي داتا
الخدمة ممتازة جداً
ونادرة الانقطاع
باعتبر نفسي مجربتش خدمة عملاؤهم لغاية دلوقتي
بس في المرات النادرة اللي بتنقطع فيها باكلمهم بيقولولي انهم فعلاً على السنترال بيعملوا اصلاحات هاتستغرق وقت ساعتين وفعلاً قبل ساعتين الاتصال بيرجع
أنصحك بيها جداً من غير ما أقارنها بـ لينك دوت نت لأني مجربتهاش

اقتباس:

---

المشاركة الأصلية كتبت بواسطة alijandroo

انا ساكن في أكتوبر في الحي الثالث
ومشترك من أكتر من 6 شهور مع تي داتا
الخدمة ممتازة جداً
ونادرة الانقطاع
باعتبر نفسي مجربتش خدمة عملاؤهم لغاية دلوقتي
بس في المرات النادرة اللي بتنقطع فيها باكلمهم بيقولولي انهم فعلاً على السنترال بيعملوا اصلاحات هاتستغرق وقت ساعتين وفعلاً قبل ساعتين الاتصال بيرجع
أنصحك بيها جداً من غير ما أقارنها بـ لينك دوت نت لأني مجربتهاش

---

الف شكر على النصيحه

حضرتك مشترك بأنهى سرعه .. و اقصى سرعه للداونلود كام ؟؟

و لما اشتركت معاهم الخدمه اشتغلت بعد كام يوم ؟؟

انا ماانصحش بلينك شركة ممله وكل شويه النت يفصل
وخدمه العملاء زي الزفت
انا كنت مشترك معاهم والحمدلله غيرت ل تي داتا بصراحه لاوجه للمقارنه شركة اكتر من ممتازة انا مشترك من اكتر من سنه عندهم نادر جدا لما ينقطع النت
وبصراحه انا عمري ماقابلت حد مشترك مع لينك وبيشكر فيه

على فكرة تى اى داتا عاماة اجمد حاجة بس فى فل الفترة الخيرة انقتعت الخدمة على السنترال الى انا تبعة انا مش اكتوبر........المهم كنت هجيب اتصالات موديم ولقيت عرض فودافون اجمد فجيبتو وخاصة لو انت ناوى على لاب توب دنيا تانية شوف اية احسن شبة عندك فى البيت والاماكن الى بتتنقل فيها وتكون لاقطة ثرى جى عشان السرعة تشد معاك لو عايز السكة دى كلمنى عالايميل او الموبايل او الخاص وهفهمك كل جاجة عنو وانظمة الاشتراك لكن لو ارضى وخلاص خليك مع تى اى داتا

بص يا باشا انا هجبلك من الاخر
الي حصل معاك دا ممكن يحصلك في كل الشركات
انا اشتركت مع لينك ثم تي داتا ثم رايه و اخيرا دلوقتي فودافون :)
اي مشكله كانت بتحصلي كل الشركات ديه بتعمل نفس الكلام الي صحل معاك خدمة عمله مش فاهمين اي حاجه بيعدوا يحوروا و خلاص و لو حسو انك فاهم و عارف المشكله منهم او اتخنقت معاهم هيقلولك دي مشكله عامه في السنترال (الجمله ديه اتقلتلي و الله مع ال 3 شركات بعد ما يخلصوا كل التلكيكات الي حضرتك قلتها ديه) ومش بيكون في حاجه في السنترال و انا متأكد او يقولك كلم قسم الفواتير من عندهم الخدمه مقطوعه تكلم الفواتير يقولك انا عندي زي الفل كلم الدعم الفني (الكلام ده في رايه بالذات):diablo1:
بس فودافون ليا معاها شهر اهو حتي الان هم احسنهم و لو عايز ارشحلك حاجه من 3 دول يبقي احسن الوحشين te data بس حط في دماغك (انساااااا خدمة العملاء في اي شركه في مصر:))

اقتباس:

---

المشاركة الأصلية كتبت بواسطة MohabSaeed

الف شكر على النصيحه

حضرتك مشترك بأنهى سرعه .. و اقصى سرعه للداونلود كام ؟؟

و لما اشتركت معاهم الخدمه اشتغلت بعد كام يوم ؟؟

---

انا مشترك بسرعة 256 داونلود غير محدود
لما اشتركت كان حظي ان يوم ما عملت الاشتراك بالظبط كابلات الانترنت البحرية اتقطعت في الواقعة الشهيرة :)
الخدمة اشتغلت بعد اسبوع بالظبط
وان كان كله قاللي انها بتاخد يومين تلاتة بالكتير
بس يمكن طولت معايا عشان ظروف العطل الشهير وقتها
نصيحة لو قررت الاشتراك انسى تماماً مكتبهم اللي في سنترال الحي السادس
واتعامل مع فرع شارع شهاب في المهندسين
الفرع ده مهما كان مزدحم اللي شغالين هناك قلبهم حامي جداً وبيخلصوا في وقت قياسي ومفيش وقت انتظار طويل

والله يا جماعه انا مش عارف اشكركم ازاى

انا فعلا خلاص قررت اشترك مع تى اى داتا ... بس مستنى شركه بهجت تجيبلى الكانسليشن نمبر ..... و بيقولو بياخد 21 يوم !!!!! مش فاهم ليه .. و مصاريف الغاء 35 جنيه برده مش عارف بتاعت ايه .... كل ده مش مشكله المهم اخلص منهم ده حتى لنا كان ليا لسه اسبوعين حتى نهايه الشهر اتنازلت عنهم علاشان اخلص ... و دلوقتى رجعت للدايل اب :(

انا فكرت اشترك مع اتصالات بس موضوع الحد الاقى ال6 جيجا مش حينفع معايا لانى ممكن فى شهر انزل 30 جيجا .. و ممكن فى شهر انزل 2 جيجا .. فعاوز داونلود مفتوح + انى معنديش لاب توب فا الموضوع مش حيفرق معايا اوى .

مره تانيه الف شكر لحضراتكم على النصايح الغاليه .

يا باشا ولا يهمك احنا فى الخدمة