بعد الاستشارة والاستخارة الحمد لله استقريت على السبورتاج واستلمتها من يومين :) كان معايا لانسر بعتها امبارح.
السيارة:
ما شاء الله سيارة تستحق تمنها، المزايا اللي عجباني فيها سواء قبل الشراء او الان هي:
التقفيل ممتاز وشيك
العزل اكتر من رائع لدرجة اني كل شوية وداني تتعبني من فرق الضغط (زي الطيارة كده)
الماتور مالوش صوت خالص
تصميم السيارة الداخلي جميل
التابلوه ولوحة العدادات شيك جدا
وجود لمبة ايكو (اقتصادي) تنور طول ما انا بادوس بنزين بهدوء، اول ما اتعافى عليها تتطفي، معلماني الادب :)
معظم الحاجات تاتش زي باب الشنطة والتحكم في الكاسيت والبلوتوث ومثبت السرعة (بس جم عند التحكم في الكرسي وتربسوا وعملوه مانيوال)
الليدات اللي منوره على طول
اشارات المرايات
الارتفاع حلو جدا ومناسب للمطبات والطرق بتاعتنا
المعرض:
اشتريت من سمير ريان بأقل سعر في السوق، بعد ما اتصلت بمعارض كتير. استلمت في نفس اليوم (خلال نص ساعة تقرييا)، وبالليل اتصل بيا مندوبهم يقول لي قابلني بكره في المرور، رحت المرور وبعد عشر دقايق قال لي شوف مصالحك وتعالى ع الظهر، وعلى الساعة اتناشر الظهر كان متصل بيا ولما جيت استلمت اللوحات وركبتها. ناس محترمين في التعامل جدا جدا.