ميجان 2006 ولا جيلى باندينو زيرو
السلام عليكم ورحمة الله
بصراحة المنتدى رائع وأفادنى كتير وربنا يجازى كل اللى بيفهم اناس خير ... لكنى لسة محتارة بردو .... معروض عليا ميجان 2006 بتاعت جارنا وهو محترم جدا وانا الصراحة باثق فيه وجبت ميكانيكى يشوفها امبارح ومقالش كلمة زيادة عن اللى اتقالى لى من جارنا كالاتى:
العربية عملت حادثة مما أدى لتغيير الكبوت والرفرف الأمامى فقط دون المساس بأى شئ آخر والعربية عاملة 89 ألف كيلو والعربية مش متهانة والراجل بيعاملها كويس وممكن تمشى بيها كويسة لحد 500 ألف دة غير الرفاهية اللى فيها .... وطبعا أتوماتيك مطلوب فيها 60 آخر كلام ... فياترى ممكن حد يفيدنى فى بعض استفسارات كدة زى مثلا:
1- السعر مناسب ولا لأ؟
2- أجيب باندينو زيرو بنفس السعر واريح دماغى ولا لأ؟
3- ايه الحاجات اللى أغيرها ضرورى فى الميجان لو اشترتها " تيل فرامل ، سير كاتينة ،زيوت ، أو أى حاجة تانية" وياترى العربية بيكون معاها ايه ملحقات؟
4- أنا اتعلمت مانيوال ومعايا الرخصة بس مسوقتش عربية قبل كدة فهل ينفع إنى اسوق أوتوماتيك كدة على طول؟
5- لو فى عربية تانى زيرو كويسة غير البادينو ممكن أجيبها ب60 وارح دماغى من المستعمل؟
آه فى حاجة تانية اتقالت لى بخصوص قطع الغيار انها غالية ومش كل الميكانيكية بيفهموا فيها وان سعر اعادة البيع حيكون اقل بكتير من 60.
وطبعا انا باشكر حضراتكم تانى واتمنى منكم الافادة لانى حارد على جارنا النهاردة واعذرونى على الاستفسارات الكتير.
