الموضوع: ميجان 2006 ولا جيلى باندينو زيرو

بخصوص الميجان دي :
1- لازم كشف التوكيل حتى لو مكلف ( هو ب550 جنيه) , و بالمرة يطمنك بخصوص تأثير الحادثة على جسم العربية نفسه , لو طالت الشاسيه او فتحت ايرباج يبقى بلاش خالص , و كمان حالة تيل الفرامل و الطنابير و الحاجات دي

2- هو بيعمل صيانتها فين ؟ لو في التوكيل يبقى هاتعملي الصيانات في معادها و خلاص , او لو قادر يضمن لك معاد تغييره لطقم الكاتينة بالذات فتغييريه لما ييجي معاده , و الا يبقى هاتعوزي تغيري طقم كاتينة و ده هايكلف الف و شوية

3- سواقة الاتوماتيك سهلة جدا

4- بالنسبة للميكانيكية الميجان عايزة اللي يشتغل فيها يبقى الصنايعي بتاعها فعلا , يعني لو مش في التوكيل او في مركز معتمد يبقى اقل واجب عند حد في صقر قريش

بخصوص المقارنة بين العربيتين :
1- كعربيتين عيب اصلا يتقال كلام زي ده
2- كقطع غيار انا مش عارف قطع غيار الباندينو ايه , بس الميجان غالبا اغلى بس الله اعلم بقد ايه , هي تقريبا بسعر الكوري الجديد حاليا او اقل شوية (الاكسنت ار بي مثلا قطع غيارها اغلى على ما اسمع ) , و متوفرة في التوكيل و برة التوكيل


لو انا مكانك فنظرا للفرق الرهيب بين العربيتين هاجيب الميجان (لو قال الكشف ان حالتها كويسة)

المشاركة الأصلية كتبت بواسطة أميرة بهجت

طب معلش سؤال ساذج شوية .... هو التوكيل بتاعها فين وياترى باروح فى أى وقت ولا ازم آخد ميعاد والسعر اللى حضرتك قلته دة ثابت؟ وبعدين اصراحة فى ناس بتقول لى مفيش عربية بتروح التوكيل الا ويطلعوا فيها القطط الفطسانة .... ولو فى ميكانيكى حضرتك بتتعامل معاه ممكن ترشحهولى يكون خير

والف شكر على الاهتمام

التوكيل فروعه في العبور و المقطم و القطامية و ابو رواش و ده لازم بالحجز
فيه فرينش موتورز مركز معتمد , ده في الرحاب و الشروق و اظن عين شمس و ده باسبقية الحضور
فيه مركز معتمد الميكانيكيون العرب , بس الناس كلها بتشتكي منه جامد

بالنسبة لنقطة القطط الفطسانة , هي مش بالظبط القطط الفطسانة , هي كل حاجة شغالة باداء اقل من نسبة معينة بتتكتب , يعني حاجات بتبقى استهلكت شوية لكن ما باظتش يعني و بيكتبوها , بس مقابل كده المشاكل الحقيقية بتطلع برده و ده المهم خصوصا في الاجزاء الكهربائية مثلا
الناس هنا بتعرف تقرا تقرير التوكيل كويس يعني

بالنسبة للميكانيكي ففيه طارق في الهرم , و فيه الصنايعية بتوع صقر قريش هتلاقي ناس هنا بيتعاملوا مع ناس هناك بس انا باتعامل هناك مع كهربائي بس