رحلة من العناء والتعب فى البحث عن جثة داخل السيارة
من كام يوم بفتح العربيه لقيت ريحة حاجه ميتة جوا العربيه وانتو عارفين طبعا ان الماروتى عربيه صغيرة مفيش حاجه تقدر تستخبى منك ... المهم انى قلبت العربيه كلها وملقتش مصدر الريحه خدت العربيه مشوار وفتحت الازاز ولقيت الريحه اختفت ومبقتش موجودة ...!! قلت الحمد لله الريحة راحت
تانى يوم رايح الشغل الصبح بفتح العربيه وكأنى فتحت قبر يا جماعه :120146b الريحة زادت عن الاول
قولت مبدهاش رحت للكهربائى فضل برضه يدور معايا على اى حاجه فى قلب العربية قالى الريحة جايه من التابلوه وكده هنضطر نحله ... وفعلا حلينا التابلوه وبعد ماحليناه الريحة زادت اكتر قولت كده احنا قربنا من اكتشاف جثة القتيل يلا حل ياسطى والنتيجه ملقيناش حاجة جوا التابلوه :11: !! قالى يبقى اكيد جوا جهاز الهوا حليناه برضه ملقيناش غير تراب :_Alshmokh11: فضلنا مش عارفين الريحه جاية منين بعد ما حلينا التابلوه وفكينا السلوك كل دا طلع على الفاضى ولسه العربيه فيها ريحه !!
المهم فكينا الكارتيرة البلاستيك اللى تحت الرفرف ملقيناش حاجه ومن هنا مسكنا خيط يوصلنا للجثه لقينا الريحه زادت اوى وبعدها طلع الكهربائى زى محقق الشرطه وقالى القتيل موجود تحت القايم :w6266d
قولتله ازاى ؟؟ قالى عادى دخل من فتحه مالعربيه قولتله العربيه كلها مقفله والعتب اللى تحت القايم دخله ازاى ؟؟؟ رفع العربيه عالكوريك و نزل تحت ولقى فتحة فى أخر عتب العربيه ناحية الشكمان قالى ان الجثة دخلت منها قبل ما تموت
المهم كانت المشكله دلوقتى اننا ازاى نخرج القتيل دا من جو العتب بتاع السيارة ؟؟
فكيت الفرش اللى عندى فى ارضية السيارة لقيت العتب فيه فتحات صغيرة فدخلنا منها سلك عشان نحدد بالظبط مكانه فين ونزقه لبرة العربيه ...!! المهم ان الصنايعى بهدل الجثه والريحة زادت
جبنا خرطوم جلد وفضلنا نزق بيه مش عارفين نحركه من مكانه
لغايه ما ربنا هدانا وجبنا خرطوم ميه قوى وحطيناه فى الفتحات اللى جوا العتب بحيث ان اندفاع الميه تفتفت الجثه وتطردها بره العربيه وفعلا دا اللى حصل لغايه ما نزل من العربيه الاشلاء والبقايا اللى طلعت على الاغلب لفار صغير اتزنق ومعرفش يخرج واتخنق ... نضفت العربيه وراحت الريحه وجه الكهربائى ورجع كل حاجه مكانها ورحت بعدها وديتها المغسلهة وقولت للصنايعى لو عندك كيماوى رشه فى العربيه واشتريت معطر سائل بريحة الخوخ وحطيته عالدواسات بعد ما غسلت العربيه وروحت البيت والحمد لله الريحة اختفت تماما مالعربيه ,,,
