باختصار شديد انا من القاهره وبقالي فتره بتردد على محافظه " قنا " لظروف شغل وحبيت أشتري عربيه اقضي بيها مصالحي هناك و رسي اختياري على البيجو 504 لانها تستحمل وصيانتها هنا متوافره عكس كتير من العربيات اللي محدش يفهم فيها هنا
وقررت اشتري العربيه من القاهره وأنزل بيها " قنا " لفرق السعر لان العربيه مطلوبه بشدا في "قنا"
وبالمره لما هاجي ابيعها كمان سنه ( كحد أقصى ) هابيعها باغلى من ماشتريتها بيه بحيث تغطي على التكاليف اللي صرفتها عليها وممكن كمان اطلع بهامش ربحي بسيط
بس المشكله بقى اني مافهمش في البيجو والعربيات القديمه عامه خالص
كل معلوماتي عن العربيات الجديده ( موديل 2000 وطالع ) ومش معلومات متمرسه كمان
فياريت حد يسلطلي الضوء على اهم النقاط اللي أركز عليها لما اجي انقي العربيه اللي هاشتريها
(مع الوضع في الاعتبار اني هسافر بيها من القاهره لقنا "مسافه 600 كيلوا تقريبا " وممكن اخد الطريق الصحراوي الشرقي " ماعليهوش خدمات تماما وفي حتت فيه مافيش شبكه موبايلات شغاله بس طريق قصير جدا وناااااعم جداااا )
وايه أحسن نظام ممكن أشتري بيه العربيه ديه ( مبايعه ولا توكيل بالبيع ... الخ ) " مع الوضع في الاعتبار ان هابيعها في " قنا " ان شاء الله خلال سنه
وياريت حد يقولي رينج الأسعار بتاعها في القاهره
ولو في حد عارف رينج الأسعار في قنا ياريت يعرفهولي
انا كل اللي توصلت ليه حتى الان هو اني هاشتري مو 79 gl ان شاء الله
ياريت تفيدونا بسرعه يا اخونا , ولكم جزيل الشكر