الموضوع: بسبب التوكيل ساترك محبوبتى بيكانتو

معلش هاصدعكوا شويه استحملوني.
بس انا كاتب الموضوع ده علشان الناس تاخد بالها وتستفيد.
انا من الاشخاص المشجعين ان العرية لازم تتصلح في التوكيل ولهذا كنت بروح اعمل كل الشغل فى التوكيل سواء كان صيانة دورية او اصلاحات.

المهم جت صيانة ال ١٢٠٠٠٠ لـ عربيتي البيكانتو وروحت التوكيل الساعة ٨ الصبح اعمل الصيانة واستلموا العربية وتأخروا اوي في الصيانة فا طلعت من الاستراحة اشوف التأخير ليه.
لقيت العربية مع واحد لابس احمر وخارج بيها بره التوكيل.
انا عرفت انو خارج يجربها المهم فضلت واقف لغاية لما رجع اخد حوالى ١٠ دقائق و قبل ما يدخل التوكيل فضل واقف تحت ماطلعش (لو مروحتش توكيل ابورواش في مطلع كده قبل البوابة) هو فضل واقف تحت. انا قلت بيظبط حاجه.

لقيت السكرتيرة نزلتله وركبت معاه في عربيتى ولف ومشى انا طبعا واقف مذهول. اخد حوالى ربع ساعة اول ما رجع سالته عن اسمه ودخلت طلبت المشرف.
حكتله اللى حصل. تخيلوا الرد ؟؟؟؟؟
معلش أصل السكرتيرة بتروح ساعة بدري علشان بترضع فا تلاقيه اخدها في طريقة.
انا اغمن عليا علطول بعد الرد ده.
المهم المشرف اتاسفلى وزى كل حاجه فى مصر. ما هو خلاص اعتذر انت عايز ايه يعنى ندبحة.

استلمت العربية وبعدها بكام يوم كدة حسيت ببرجله فى العربية ماحطتش في دماغي.
وعدي بتاع اسبوعين وانا بحس بالبرجلة كل يوم الصبح بس كنت مشغول جدا فا نفضت لغاية لما افضى.
لغاية لما جت في يوم ادور الصبح مارديتش تدور فا دورتها زق. واول ما اشتغلت طلعت دخان ابيض كثيف.
رجعت التوكيل كشف على العربية وقالولى العربية عاملة طحينة. ايه طحينة يعنى ايه؟
يعنى يا فندم المياه دخلت على الزيت وعملوا طحينه لازم نفتح الماتور.

تانى صدمة سألته هو الموضوع ده بيحصل بين يوم وليله قالى لا. طيب ما انا كنت هنا عندكوا بعمل صيانة ازاى ماكتشفتوش ده ؟؟؟ يا اما بقي الغلطة دية من عندكوا !!!!! وفترة صمت
قالى مش من عندنا يا فندم ماينفعش. وعلشان نشوف المشكلة بس لازم تدفع ألف ونص.
وبعد كلام كتير ورغى وتوكيل بيحاول يخلى مسؤليته وخلاص بغض النظر عن اى شئ.
احدت العربية ومشيت وروحت صلحتها ب ٤٠٠ جنيه عند ميكانيكى محترم جدا جدا فى اكتوبر.

الموضوع مخلصش هنا لسه لسه.

معرفش ايه اللى خلانى اتهف فى دماغى تانى واروح اعمل صيانة ال ١٦٠٠٠٠ عندهم
دخلت حكيت لمهندس الاستقبال كل حاجه حصلت قبل كدة وقلتله يا ريت مايتكررش اى حاجه من دية تانى.
المهم بعد الكشف قالى العربية محتاجة اسطوانة وديسك وحاجات تانيه كتير الصراحة انا مكنتش حاسس باى مشاكل فى العربية فاقلتلوا غير اللى انت عايزة بس بلاش طقم الدبرياج وخلصوا العربيه وكعيت ٣٥٠٠ جنيه ومشيت.
العربية مابتسحبش خالص مش عايزه تعدى ال ٨٠ كلمت المهندس قالى تعلالى بكرة
وانا ماشى بليل فى نقس اليوم جيت انور الكشافات الاماميه مش عايزة تشتغل لازم افضل منور النور العالى.

تانى يوم رحتلة و حكيتلة اخدوا العربية و فضلت معاهم ٦ ساعات و بعدين قالى احنا غيرنا ضفيرة الكشافات كلها على حسابنا ب ٤٠٠ علشان ماكتشفنهاش فى الفحص النهائى. انا الصراحة اتبصت قلت فعلا التوكيل اتغير ومشيت و تانى يوم سافرت شرم الشيخ وانا مسافر موضوع السحب ده ظهر تانى. فا كلمت مهندس الاستقبال تانى قالى لما ترجع بالسلامه تعالى التوكيل وهانشوف المشكلة ايه.
المهم رجعت واذ فجٱة العربية عطلت بيا واتقطرت لحد الشغل و بعدين قطرتها للتوكيل ٨ الصبح.
المهندس قالى السحب ده بسبب الدبرياج فا قلتله بكل هدوء اوك غيره وشوف المشكلة اللى خلت العربية تقف وصلحها.

قالى اوك بس هاتاخد يومين قلتله ماشى وانا علي مضض ومشيت.
وعدي اليوم كله و تانى يوم وفى اليوم الثالث اتصل بي وقلى العربية خصلت يا فندم تعالى استلم.
قلتله المشكلة كانت ايه ؟ قالى غيرنا طقم الدبرياج فا قلتله والعربية طيب وقفت ليه قعد يتوه فى الكلام كده كان فى حاجه انا محدطتش فى دماغى و قلتله بهزار اهم حاجه مش تزيد عن ٢٥٠٠ قالى لا.
وروحت فعلا علشان استلمها فا استقبلنى المهندس وقعدنى فى مكتب بعيد عن كل العملاء و استنيت ٢٠ دقيقة لغاية لما جالى المشرف قالى يا فندم عربيتك بتجيب زيت من الشكمان وعايزه اصلاح ب ٢١٠٠٠ جنيه.

ثالث صدمة تفقدنى النطق.

نعم ؟ ايه ؟ ازاى ؟ انت مش قلتولى اتصلحت. قالى انا لما لقيت فيها مشكلة قلتلهم ميشتغلوش فيها
وفى هذه الاثناء انا فاقد التركيز والاهليه و النطق.
قتلته ازاى ماكتشفتوش حاجه زي ديه فى الصيانه قالى احنا مابنعملش كشف على الحاجات ديه الا لو العميل اشتكى.
فبعد كلام كتير ورغى وناس نصابه و شغل رخيص.
بيسالنى ها نشتغل قلتله تشتغل ايه يا عم.
سالته هيا دايرة قالى ندورهالك قلتله هاتها واخدتها ومشيت وانا فى قمة الحزن و الهم
ولما روحت اعدت اراجع على العربية ولقيت.

قبل الصيانه داخل مابشتكيش من اى مشكلة
بعد الصيانة خارج بـ
- السيارة تحتاج الى عمرة او طقم شنابر على احسن تقدير.
- عوامة تنك البنزين بايزة وكانت هيا السبب فى ان العربية وقفت. لانها ادتنى قرايات غلط.
- البطارية باظت تماما مش عارف ليه. مع انها جافه وشاريها من سنة ونص و ماشتكيتش منها قبل كده.
- الدبرياج تقيل جدا و العربية مابتسحبش. العيب ده ظهر فجٱه.
- باب السائق لا يفتح نهائى برده مش فاهم ايه العلاقة.
- الكشافات الامامية اللى صلحوها بعد الصيانة على حسابهم.
- السماعات فيها مشاكل ومش شغالة.

اللى خلانى اكتب انى اكتشفت انى اضحك عليا لما قريت ان فى واحد من ملاك الستروين الجديده عمل شكوى فى حماية المستهلك و التوكيل عمل معاه جو رخيص وكلمه قاله تعالى استلم علشان يلبس فى الحيط.
وعلشان كل الناس تستفيد ومايقعوش فى المشاكل اللى انا وقعت فيها. ويخدوا بالهم من الحركات الرخيصة اللى بتعملها التوكيلات.
حرقة الدم اللى انا فيها ماتتوصفش.
انا قررت ابيع العربية فى وقت صعب جدا بالنسبة ليه. اول عربية جبتها فى حياتى.
ويمكن لما اكتب هنا واتكلم فى الموضوع اهدى شوية.
شكرا ان الموقع سمحلى اكتب تجربتى هنا واسف على الاطالة.

المشاركة الأصلية كتبت بواسطة sonybony

التوكيلات في مصر زباله زباله زباله

انا مش عارف أمتى البلد ديه هايبتدوا يحترموا فيها الناس وتعبهم و شقاهم