السلام عليكم
اولا انا بعتزر للاداره عن عمل عضويه اخرى وبجد انا فى قمه الاسف لانى عارف انه غلط واوعدكم بعدم استخدام العضويه الحاليه غير فى الموضوع دا بس
ثانيا :- والدى توفى من حوالى سنتين وكان سايب ميراث وارثه عن ابيه ربنا يرحمهم الميراث عباره عن قطعه ارض زراعيه حوالى ثلث فدان وعمى ليه مثلها وعمى الاخر ليه مثلها وقطعه ارض مبانى مقسمه برضوا على 3 لكل واحد نصيب فيهم ومنزل الاسره فى البلد وبرضوا المنزل على 3
طبعا فى حياه والدى كلمته كتير انه يخلص الميراث وكل واحد ياخد حقه يا يشترى يا يبيع علشان المشاكل وتجنبا لاى مشاكل بعد مده وفعلا والدى توفى وكل حاجه ذى ما هى ولمده سنتين تقريبا محدش فى اعمامى الاتنين اتكلم على الميراث خالص ولا اكنى ليه فيه عايشين فى البيت وخلاص والارض الزراعيه بيزرعها واحد فيهم وطبعا مش بنشوف منها اى حاجه
لحد لما من كام شهر اتكلمت بكل ادب انى عايز اعرف ميراثى ولو كل واحد يشترى من التانى حاجه بحيث ان كل واحد يكون ليه حاجه من بابها يعنى بدل التقسيمه الغريبه دى
حاليا انا مجبر اشترى نصيب عمى الاصغر فى الارض الزراعيه وابيعله نصيبى فى البيت وعمى الاكبر هيشترى منى نصيبى فى الارض المبانى بحيث انى اخد نصيب عمى الاصغر مقابل البيت والارض الفاضيه وتم تسعير الارض الزراعيه باغلى من ثمنها الطبيعى بحوالى 150 الف ( الفدان ب 450 وهما مصرين على 600 الف ) البيت تم تسعيره بثمن 1500 جنيه للمتر وكذلك الارض الفاضيه وحسب حسبتهم دى بدل ما هيكون ليا انا فلوس انا هدفع فلوس لانى سعر الارض عالى جدااااااااااااااااااااااا عن الطبيعى
مش عارف اقبل بالامر الواقع لان محدش فيهم عنده اى استعداد انه يشترى منى واحتسب عند الله المبلغ ال هخسره حوالى 70 الف ولا اقفلهم ونمشى رسمى بس فى الحاله التانيه هيكون فى مشاكل كتير وممكن يكبر الموضوع اكبر من كدا
ال مزعلنى اكتر ان والدى رحمه الله عليه كان شايلهم اكنهم اولاده بالظبط واكتر وعمى من كام يوم بيقولى احمد ربنا ان ليك اعمام هيدولك حقق اكنى بشحد بالظبط ال مزعلنى اكتر من الفلوس الاسلوب وانهم نسيوا اخوهم فى دقيقه وانهم معملوش اى اعتبار لاولاد اخوهم
انتم ايه رايكم امشى الموضوع واحس انى اتنصب عليا واتلوى دراعى بالعافيه ولا اقبل واحتسب عند الله واخد حقى وحق اخواتى واخلع من المشكله بتاعتهم دى
المفضلات