الموضوع: تقرير صيانه ال 90 الف للياريس

المشاركة الأصلية كتبت بواسطة hopeless20

السلام عليكم

نبتدي منين الحكايه ؟
رحت Fit & Fix عشان ارصص واظبط زوايا وأملي نيتروجين للياريس
الراجل رفع العربيه وبيتفرج ع الكاوتشات قالي لا يا باشا الكاوتش ده مينفعش وخساره فيه الترصيص والنيتروجين انت لازم تغيره .. قولتله يا باشا ازاي بس دي فرد ميشلان بس بصراحه انا معرفش هي ماشيه اد ايه بس النقشه لسه بخيرها
قالي لا دي رتحت عليها ومتمشيش اكتر من كده .. ولازم كمان تكشف ع العفشه وتشوف المشكله فين ؟
انا اصلا معندش مشكله بس قولت اظبط العربيه قبل الصيانه
المهم سالت ع الكاوتش بكام قالي البوتنزا الياباني 15 185 60 ب
751 جنيه الفرده
وكمان مفيش
قولتله طيب خلاص بقه مفيش نصيب
قالي يا باشا استني بس هشوفهالك هنا ولا هنا .. بص انا عندي 4 فرد كنت جايبهم لواحده بس عشان خاطرك ممكن اديهوملك
قولتله لا معيش فلوس هعدي عليك وقت تاني وهربت منيهم

سألت ع نفس الفرده في بريدجيستون لقيتها ب 680 يعني فرق 70 جنيه في الفرده ؟!!


المهم بعد الحوار ده قولت مبدهاش بقه اروح اعمل صيانه ال 90 بدري شويه (العربيه عامله 89 لسه) رحت غسلت العربيه نت تحت غسله حلوه عشان الصنايعي يبقالوا نفس يشتغل ولو في حاجه تبان من الطينه و نزلت ع المتحده اللي في المعادي صقر قريش وبدأت

استلموا مني العربيه سألني فيها ايه ؟ قولتله مفيش يدوبك صيانه ال 90 .. انا كنت مغير زيت الفتيس ع ال 85 الف كيلو

اول حاجه نضف فلتر الهوا .. وحساس الايدا وكشف ع البوجيهات لقاها لسه شويه .. زيت الموتور والفلتر برضه لسه شويه فاضلهم 4 الاف كيلو .. وكشف ع زيت الفرامل وزود مياه الريدياتير
فك العجل كله وكشف ع التيل الامامي مظبوط .. والخلفي خلاص .. قولتله غيره .. ونضف الامامي .. وقالي الجنط فيه حتت معوجه ولازم تستعدلها .. بعت الاربع كاوتشات لمحل جنبه رصص .. وفعلا مكان الرصاص اختلف تماما .. وقالي الكاوتش ميشلان ما شاء الله ولسه فاضله شويه .. ع اول الصيف اللي جاي بس احتياطي متمشيش فوق ال 120
وغيرت الكرتيره الخلفي يمين عشان كانت واقعه والشتا دخل
وغيرت فلتر البنزين .. وده لوحده حكايه .. مكانه مقرف بس هما ما شاء الله عارفين شغلهم كويس .. الفلتر كان منزل طينه معرفش ازاي كنت سايبه كده بصراحه
الاكصدامات كانت مفككه شويه ربطها وركب كلبسات وشويه حاجات كده


كل ده مخدش ساعه .. وطلع واحد اجرب معاه العربيه

التكلفه :
1- كارتيره خلفي 95 جنيه
2- تيل خلفي 275
3-فلتر بنزين 675
4-ترصيص عجل واستعدال جنوط 60
5-مصنعيه 200 جنيه

المجموع 1305

الاختلاف بعد الصيانه :
ثبات اتغير بشكل كبير جدا وملحوظ اعتقد الترصيص فعلا مهم واستعدال اي خبطه في الجنط اهم .
الكيك دون والسحب اتغيروا تماما .. العربيه فعلا كانت مخنوقه .

معرفش اسعار قطع الغيار كده غاليه ولا لأ بس لو كانت ارخص شويه كنت هبقي مبسوط اكتر