مساعدة عاجلة في موضوع جواز

السلام عليكم ازيكم ياجماعة عاملين اية؟
زي ما كنت قلت قبل كدة انا شفت بنت كدة والحمد لله طلعوا ناس كويسين جدا والبنت انا استريحت ليها اوي الصراحة يعني.
دلوقتي المفروض اننا داخلين علي حوارات الاتفاق علي الامور المادية
التجهيز هما قالو هنجهز سوا بالنص (الاوض بالسجاد بالستاير بالنجف)
الاجهزة في الغالب هتكون عليا كلها
باقي الشبكة بتكون في حدود كام لو اسرة كويسة ماديا يعني تكون في حدود كام كدة
والموخر
والفرح اللي انا عاوزها تكبر دماغها منو الصراحة يعني بس مش عارف اقولها ازي
واية اللي بيتكتب في عقد الجواز والقايمة والحاجات دي
ياريت مساعدة لاني فعلا معرفش اي حاجة عن المواضيع دي خالص؟؟؟؟
برجاء المشاركة عاجلا لو سمحتم
وجزاكم الله كل خير

اقتباس:

---

المشاركة الأصلية كتبت بواسطة ham_855

السلام عليكم ازيكم ياجماعة عاملين اية؟
زي ما كنت قلت قبل كدة انا شفت بنت كدة والحمد لله طلعوا ناس كويسين جدا والبنت انا استريحت ليها اوي الصراحة يعني.
ألف مبروك مقدماً
دلوقتي المفروض اننا داخلين علي حوارات الاتفاق علي الامور المادية
التجهيز هما قالو هنجهز سوا بالنص (الاوض بالسجاد بالستاير بالنجف)
الاجهزة في الغالب هتكون عليا كلها
باقي الشبكة بتكون في حدود كام لو اسرة كويسة ماديا يعني تكون في حدود كام كدة
والموخر
بالنسبه للشبكه شوف انت محدد رقم بكام ووالدك يقول فى الاتفاق ان هنجيب شبكه فى حدود كذا
والفرح اللي انا عاوزها تكبر دماغها منو الصراحة يعني بس مش عارف اقولها ازي
علشان متحصلش مشاكل قدام لا قدر الله الاتفاق فى الاول على كل حاجه مهم جداً يعنى لو مش عاوز فرح تتفق معاهم ان فى الاخر هيبقى كتب كتاب فى مسجد

واية اللي بيتكتب في عقد الجواز والقايمة والحاجات دي
بالنسبه اللى بينكتب فى القايمه المفروض كله بينكتب فى القايمه بس ممكن اوضة الاطفال متكتبهاش

ياريت مساعدة لاني فعلا معرفش اي حاجة عن المواضيع دي خالص؟؟؟؟
برجاء المشاركة عاجلا لو سمحتم
وجزاكم الله كل خير

---

الرد فى الاقتباس
اهم حاجه انك تحدد كل حاجه انت عاوزاها لان ده جواز وتتفق على خطوط عريضه

متابع

متابع جدا

متابع

اولا مبروك وربنا يتمم بخير
نصيحتي اذا كانت البنت واسرتها بالمواصفات اللي بتقولها خليك مرن واعتقد انهم كمان لو شايفينك مناسب لبنتهم هم كمان هايكونوا مرنيين
1- الشبكه دي حسب مقدرتك وتقدر تقولهم من الاول ان حدودك كام في الشبكه وصدقني لو هم ناس محترمين زي مابتقول موش هايدققوا اوي بس لو تقدر تجيب شبكه كويسه ماتستخسرش لان ده ليه انطباع كويس في نفسيه العروسه وبتخللي شكلك وشكلها كويس قدام الناس لكن بدون تحميل زائد علي ميزانيتك
2- الفرح عاده بيكون بالنص وممكن تتفقوا انكم تلغوه لكن بالاقناع موش بالضغط وماتنساش ان كل ام واب بيستنوا اليوم ده علشان يفرحوا باولادهم
3- العفش بقا في نظامين الاول انك تدفع مهر واهل العروسه تجيب العفش لكن لازم تكزن الامور واضحه المهر ده مقابل ايه يعني هل يشمل الاجهزه الكهربائيه والنجف ولالأ
النظام التاني انكم تتفقوا ان كل حاجه بالنصف وده افضل لكن برضه الامور لازم تكون واضحه
لانه مثلا تتفقوا ان اوضه النوم والسفره والليفنج بالنص دول مافيش فيهم اختلاف
لكن ممكن اهل العروسه يقولوا ان المطبخ عليك لانهم عندهم الصيني والاستانلس مثلا
وممكن يقولوا الاجهزه والنجف عليك وهما عليهم السجاجيد والستائر مثلا
ده النظام اللي ماشي حاليا واؤكد لك انهم لو ناس كويسيين التفاهم هايكون سهل جدا
وشويه عليك وشويه عليهم المركب بتمشي
والف مبروك وربنا يتمم بخير اه نسيت اقولك موضوع القايمه في ناس بتصر عليها وناس لا القايمه بيتكتب فيها عدد الغرف نوم -سفره .... بدون ذكر قيمتهم الماديه وانهم بغرض الاستخدام في الحياه الزوجيه ولايكتب دهب او الشبكه لان اصلا الفاتوره باسمها

السلام عليكم ورحمة الله وبركاته ...

اقتباس:

---

المشاركة الأصلية كتبت بواسطة ham_855

السلام عليكم ازيكم ياجماعة عاملين اية؟
زي ما كنت قلت قبل كدة انا شفت بنت كدة والحمد لله طلعوا ناس كويسين جدا والبنت انا استريحت ليها اوي الصراحة يعني.
اولا : الف الف مبروك وربنا يتمم على خير ان شاء الله ...

دلوقتي المفروض اننا داخلين علي حوارات الاتفاق علي الامور المادية
ثانيا : اعمل صلاة استخارة وانت رايح تتفق معاهم ...

التجهيز هما قالو هنجهز سوا بالنص (الاوض بالسجاد بالستاير بالنجف)
الاجهزة في الغالب هتكون عليا كلها
ثالثا : الاتفاق دايما حسب اصول المنطقة اللى قاعدين فيها يعنى العريس بيجيب كذا وكذا وكذا والعروسة بتجيب كذا وكذا وكذا ودى بتختلف من منطقة الى اخرى بس مادام بالنص يبقى كل حاجة بالنص الا اذا كان هم عندهم حاجة من الاول جايبنها فبتجيب حاجة قصدها ...

باقي الشبكة بتكون في حدود كام لو اسرة كويسة ماديا يعني تكون في حدود كام كدة
رابعا : بالنسبة للذهب حسب مقدرتك بعد ما تحسب توضيب الشقة والعفش بس فى حدود المعقول وحسب اللى ماشى فى المنطقة اللى قاعدين فيها ...

والموخر
خامسا : بالنسبة للمؤخر اللى تتفقوا عليه بس خلى بالك المؤذون بياخد نسبة 10% منه فكلما زاد المؤخر استفاد المؤذون ...

والفرح اللي انا عاوزها تكبر دماغها منو الصراحة يعني بس مش عارف اقولها ازي
سادسا : بالنسبة للفرح ممكن تعمل حاجة بسيطة كده تفرحوا بيها وتكلفة اقل زى تأجر مركب فى النيل بيشيل حوالى 40 فرد اخواتك واصدقاءك واخواتها واصدقائها وتلفوا حوالى ساعة فى النيل او ساعتين او تروح مطعم تتعشى فيه مع حد من اخواتك وحد من اخواتها او مع صديقك الانتيم وزوجته ...

واية اللي بيتكتب في عقد الجواز والقايمة والحاجات دي
سابعا : بالنسبة للقايمة ديه بقى يامعلم بتبقى فى مصلحة العروسة يعنى كل حاجة بتتكتب فيها علشان لو حصل اى حاجة تقعدك فى الشقة على البلاط لو سبتلك الشقة ههههههههههههه ...

ياريت مساعدة لاني فعلا معرفش اي حاجة عن المواضيع دي خالص؟؟؟؟
برجاء المشاركة عاجلا لو سمحتم
وجزاكم الله كل خير

---

اخيرا : المرونة اهم شئ فى الموضوع لانها مش تجارة ديه جوازه وبناء اسرة جديدة يعنى الاتفاق برضاء الطرفين ودايما لو الاسرتين شاريين بعض بتبقى الامور سهلة جدا ،، وعلى فكرة اى مشاكل بتحصل فى الحاجات ديه بتبقى مبتتنسيش ابدا ...

يعني ياجماعة اللي موجود دلوقتي
من ناحية الشبكة قد اية يعني بكام
والمؤخر نفس القصة
لو التجهيز بالنص
المطبخ (خشب ) بيكون علي مين
الاجهزة الكهربائية عليا دي ان عارفها

اقتباس:

---

المشاركة الأصلية كتبت بواسطة ham_855

يعني ياجماعة اللي موجود دلوقتي
من ناحية الشبكة قد اية يعني بكام
والمؤخر نفس القصة
لو التجهيز بالنص
المطبخ (خشب ) بيكون علي مين
الاجهزة الكهربائية عليا دي ان عارفها

---

أولا ألف مبروك وربنا يتتملك بخير

بما اني عريس موديل 2013 هههههههه

احب اقولك الاتي

المؤخر ده لازم تعرف ان كل 10000 جنيه عليها 400 جنيه رايحه للمأذون يعني حط دي في اعتبارك

الشبكه دي براحتك وبردك بالاتفاق بتقولهم والله انا كل اللي معايا مثلا 5000 جنيه للشبكه او اكثر زي ما تحب وحظك ان الذهب العيار 18 نازل دلوقتي الجرام ب 207 جنيه

ونصيحة بلاش التجهيز يكون بالنص خليها مثلا انا هجيب الخشب والسجاد وانتم عليكم الكهربا والستاير والنجف ولو في تنجيد بيكون بردك علي العروسه بس دلوقتي مبقاش في تنجيد بعد المراتب السوست ما ظهرت والانتريهات الجاهزه فكدا كدا هتلاقي نفسك انتا موفر عليهم موال التنجيد

المطبخ بيكون علي العروسه مسمعتش ان العريس بيجيب مطابخ والافضل يكون الوميتال عن الخشب

انا قولتلك علي تجربتي وتجربة ناس كتير غيري وربنا يوفقك لما فيه الخير

وبالنسبة للفرح ممكن تبقي في ساعة صفا كدا تتكلم انتا وخطيبتك وتتفقوا مثلا انكم لو مش هتعملوا فرح تاخدو فلوس الفرح دي وتطلعوا بيها عمرة او رحلة اسبوع لشرم وهيه ما هتصدق وهتلاقيها بتقولك بلا فرح بلا بتنجان اهو علي الاقل تستفيد بالفلوس دي في اجازة عسل احسن ما يترموا في ساعتين في قاعه والناس تديك عين تجيبك الارض اسئلني انا عن البلاوي دي

االف مبروك مقدما
انا عريس قديم من 8 سنين
بس يا معلم
لازم تكون واضح مع نفسك يعني ازاي انت شايف امكانياتك الماديه عامله ازاي و امكانيات نسيابك
يبقي تقول علي هتقدر عليه لان انت اكتر واحد عارف امكانياتك
ومش عايز احدد لك ارقام عشان لو قولتك ارقام زياده عن امكانياتك هتكون مضايك
بالنسبه للشبكه دي هديتك للعروسه كل واحد علي حسب امكانياته و بحبحا شويه
بالنسبه للفرش حوار النص ده جميل بس لكل الشقه
بالنسبه للفرح انا عملت حفله صغيرو كلفتني حوالي 8000 عشان كان نفسي اسافر يرة في شهر العسل
بالنسبه للقايمه انا مضيت ورقه علي بياض و قولت لحمايه حط الي انت عايزة فيها عشان انا كنت بحب مراتي وشاريها
و علي العموم خليك واثق ان الطيبون للطيبات و بالتوفيق في رحله ربط الساقيه

انا داخل افيدك بالنسبة للفرح لاني كنت زيك كدا
انا وعدتها هي واهلها اني بدل الفرح هنروح عمرة لما الامور تتيسر فوافقوا وفعلا هيحصل قريب ان شاء الله
ف حاله انهم موافقوش فكر تاني ( بس دا مش معناه ان البنت مش كويسة)
انا كتبت الكتاب وسافرت ولما رجعت الفرح كان عباره عن اني كنت دابح عجل وعزمت البلد كلها علي الاكل وخلاص وانا واقف طبعا بس كنت بسلم علي الضيوف. بالليل اخدت العروسه من بيتها وروحنا اتصورنا بفستان الفرح وروحنا البيت في الزفة. لما وصلنا البيت كانت الناس اللي اكلت الصبح منتظرين يباركولنا وخلاص علي كدا
عاوز اقولك ان الموضوع دا كلفني برده بس انا عملت كدا لاني مش بحب جو الافراح والرقص و بحب اكرم ضيوفي
الشبكة حتي لو انت ميسور قولهم 20 الف .... هما عاوزين يزودوا يبقي اهلها اللي يدفعوا الزيادة دي او حسب ما انت شايف

متابع وبشدة
طيب والمطبخ (الالوميتال او الخشب بيكون علي مين لو التجهيز بالنص يا جماعة)
اصلي شكلي هدخل في حوار جواز قريب

اقتباس:

---

المشاركة الأصلية كتبت بواسطة red_1024

متابع وبشدة
طيب والمطبخ (الالوميتال او الخشب بيكون علي مين لو التجهيز بالنص يا جماعة)
اصلي شكلي هدخل في حوار جواز قريب

---

المتبع عاده ان المطبخ سواء خشب او الوميتال علي العريس والعروسه عليها الحلل والاطباق وطقم الصيني والاستانلس والاكواب والكاسات وماشابه طبعا الاجهزه الكهربائيه زي الخلاط والكيتشن ماشين علي العريس