الموضوع: مصر تبدأ في خفض دعم الوقود تدريجيا في 2014

المشاركة الأصلية كتبت بواسطة mo7a_mo7a

اسلوب دعم الوقود الحالي فاشل ومكلف جدا جدا
ازاي بس معترضين؟
تعالو نفكر بالعقل

لو في 2 واحد معاه عربية 127 مكملتش 1000 سي سي والتاني معاه جيب او مرسيدس 2000 سي سي وانت طالع مين حيستهلك بنزين اكتر اكيد اللي معاه عربية اكبر وبالتالي كل ما كنت اغني وعربيتك اكبر تاخد دعم اكبر

بحسبة بسيطة بتاع ال127 حياخد دعم في السنة 900 جنيه وبتاع الجيب حياخد 12 الف جنيه واللي ماشي علي رجله مش حياخد ولا مليم
دا غير عربيات السفارات والقنصليات والسياحة اللي بتاخد دعم من الدولة !! طب لييييييه انا ادعم عربيات سفارة المانيا وسويسا ليييييييه
حاجة تانية انا اخويا بيشتغل في شركة ادوية ومدينوا عربية بيعمل بيها شغل الشركة وبيلف بيها مصر ليه الحكومة تقدم دعم لعربيات شركات القطاع الخاص؟؟؟ هم كانو بيبيعوا منتجاتهم بسعر مدعوم؟؟ طبعا لا

شركات الاسمنت والحديد والاسمدة بتاخد الطاقة عموما كهرباء وغاز وبترول بسعر مدعوم وتبيعلك المنتج بالسعر العالمي طب لييييه؟؟؟ يا اما يشتري الطاقة مدعومة ويقدملي سلعة رخيصة يا اما ياخدها بسعرها الحر ويبيع زي ما يحب وساعتها مش حيقدر يغلي لان المستورد موجوود وسعره معروف
انما الحكومة تدعمه من جيبي انا وجيب كل واحد بيدفع ضرايب وبعدين يبيعلك طن الاسمنت والحديد اغلي من المستورد؟؟ لا طبعا

شركات الاعلانات اللي مالية الشوارع باعلانات اسعارها خرافية تاخد كهرباء مدعومة تنور بيها اعلاناتها ليه؟؟
المطاعم والفنادق السياحية اللي الليلة فيها بمقام مرتب شهر ليه تاخد غاز وكهرباء مدعومة

................ الخ
واللستة طويلة


اننا ادفع الفلوس دي كلها للي ميستحقهاش وفي ناس مش لاقية لا تاكل ولا تلبس ولا تتعليم مش يبقا ظلم؟؟
طبعا ظلم واي واحد يقول غير كده يبقي يا اما مش فاهم يا امي بيستهبل

رفع الدعم عن الشرائح دي امر حتمي بل بالعكس ان استمراره امر غبي بيضيع فلوس البلد

يجي واحد يتفذلك ويقول طب انا عندي عربية 131 او 504 وموتورها كبير 2000 سي سي وبتاكل بنزين اعمل ايه وانا موظف غلبان:
الاجابة ان ترشيد الدعم مش علي اساس السعة اللترية للعربية بس انما الموديل وسنة الصنع
مينفعش ادفع العربيات القديمة سعر حر وعربية باسات 1400 سي سي تمنها 340 الف تاخد دعم

واحد تاني يقولي انا بقالي 20 سنة بحوش وجايب عربية نظيفة زيرو بالقسط ومقدرش ادفع بنزين غالي:
الاجابة ان الحلول كتير منها تقنين كمية محددة بكارت البنزين مدعومة واكتر من كده تدفع ويبقي انت ليك الاختيار اما ترشد استهلاكك بشكل معقول وتاخد البنزين مدعم او تلفلف بالعربية زي ما انت عايز وتدفع تكلفة رغباتك

واحد تاني يقولي انا معايا تاكسي وفاتح بيت ومينفعنيش المقنن بتاع الحكومة:
الحل اقلب غاز ويباقلك الاختيار اما تاخد الدعم في الغاز او تشيل تمن البنزين
ومحدش ينسي ان اقل مشوار بالتاكسي النهاردة ب 20 او 30 جنيه في الوقت الي تمن البنزين بتاع المشوار ميعديش 2 او 3 جنيه وبالتالي دعم البنزين مش مخلي السواقين مرخصين الاجرة ولا حاجة

التنظيم سهل انما المبدا لازم يكون واحد وهو
الدعم لمن يستحقه فقط

كلام سليم بس يطبق بشروط

أتفق مع من يؤيد رفع الدعم وأيضاً أتفق مع من يؤيد أستمرار الدعم
لكن ياساده دى أخطاء الحكومات المتعاقبه علينا من سنه 1990 إلى ألان
وبكل أسف الطبقة اللى عايزينها تدفع بدون دعم هما اللى فعلا بيستفيدو بكل حاجة مدعومه
والطبقة اللى عايزنها تستفيد بالدعم هما اللى الحكومات بتمص دمهم ليعيش أصحاب المليارات
وكل مايحصلون عليه زيت وسكر مدعم !!
حقاً أنها مصر التى تدار بعقلية القرن التاسع عشر ولم نرتقى لما يحلم به المواطن العادى
بل أستجبنا وأتحدنا مع أصحاب المصالح والنفوذ

((( لن تمس دعم الغذاء، الأمر سيكون مقصورا على الطاقة، ولن يمس الشريحة الدنيا من المواطنين"، اي الفقراء ومحدودي الدخل )))

أنا مش فاهم ازاي مش هيمس الفقراء والغذاء وهو بذكائه مجرد رفع اسعر الوقود هترفع اسعار كل حاجه في البلد
حسبي الله ونعم الوكيل

لو افترضنا حسن النية وقلنا قصده ع 95 ماشي
انما 92 و 80 وحيات امه ليروح وبسبب اللى بيحصل ف البلد فعلا !
شكلنا هنبهر العالم تانى ونعمل ثورة 3 !!!

المشاركة الأصلية كتبت بواسطة mahmoud ghanem

انا كمان مش فاهم ... يعنى لما الموكوووس محمد مرسى كان عاوز يرفع الدعم عن الطاقة بالكامل واستلمنا كروت البنزين بتاعت العربيات وكل شهر ليك 150 لتر مدعم كان زى العسل وتـكبـيـــــــــــر ..

ودلوقتى بقت حاجة تقرف وحكومة مش عارف اية وانقلاب ابن مش عارف اية

اتقوا الله .. وادعوا بالخير

تم التبليغ عن مشاركتك بسبب اسلوبك المتدني في عرض الأراء
علما بأنه لم يصدر قرار بالخرافات التي ذكرتها
فكرة وتم عرضها على الشعب قبل التنفيذ لكن حتى حدوث الانقلاب لم يصدر قرارا بهذا بسبب احترام رغبات الشعب