مشروع مكتبة للادوات المدرسية

**ahmedelzeeny** · 30-11-2013 01:34 AM

المشاركة الأصلية كتبت بواسطة zarif

بص ياباشا
انا هبدأ معاك خطوة خطوة
اول حاجة التشطيب الداخلى للمحل اللى عندك
سيبك من الدهان والديكورات والكلام القديم والمكلف دة
انت هتدهن السقف بس ابيض
وباقى المحل كلة خشب تجليد من الارض للسقف وحوامل متنوعة الاطوال ورفوف ازاز
وبس خلاص

وعشان يبقى الكلام بالتفصيل
خشب التجليد هوة دة

اللوح مقاس 244 * 122 سعرة بيتراوح ما بين 120 الى 135 ج
وبتجيب لة مجرى معدن بعد الفتحات اللى فى اللوح تقريبا 8 فتحات
المجرى المعدن ب 8ج
والبلاستيك ب4ج

وبتجيب الحوامل او الشوك اللى بتركب في وسعرها على حسب الطول بيتراوح ما بين 85 قرش الى 3ج على حسب الطول

ودى الل انت بتعلق عليها المعروضات او البضاعة

وبتجيب حوامل رفوف زجاج ودى بتبقى محملة وسعرها بيتراوح ما بين2 الى5ج على حسب الطول

الكلام دة كلة بيبتباع فى العتبة فى القاهرة جنب حلوانى تسيباس اللى فى العتبة هتروح هناك هتلاقى سوق كامل متخصص فى تجهيز المحلات

احسب حسبتك وشوف الدنيا اية

وبعد كدة نخش عل الواجهة بتاعة المحل
وبعد كدة نخش على البضاعة

تمام معاك لحد كده يا ريس بس عشان اكون واضح معاك انا حوار تجهيز المحل ده والواجهه واليفط والدعايا هيبقى سهل بالنسبه ليا لان ده شغلى اما اللى انا عاوز استفسر عنه هو اسعار البضاعه مثلا وربحها بيبقى اد ايه ف انا عاوز افهم المشروع عشان متبقاش مغامرة وطبعا الارزاق بيد الله بس ادينا بنعمل الللى علينا

**ahmedelzeeny** · 30-11-2013 05:07 PM

uuuuuuuuuup

**مصطفى-حسن** · 01-12-2013 01:43 PM

المشاركة الأصلية كتبت بواسطة ahmedelzeeny

تمام معاك لحد كده يا ريس بس عشان اكون واضح معاك انا حوار تجهيز المحل ده والواجهه واليفط والدعايا هيبقى سهل بالنسبه ليا لان ده شغلى اما اللى انا عاوز استفسر عنه هو اسعار البضاعه مثلا وربحها بيبقى اد ايه ف انا عاوز افهم المشروع عشان متبقاش مغامرة وطبعا الارزاق بيد الله بس ادينا بنعمل الللى علينا

طيب قولى رأس المال تقريبا اد اية ؟؟؟؟
والمكان اللى هتفتح فية - شعبى - وسط - هاى كلاس ؟؟؟؟

**ahmedelzeeny** · 02-12-2013 06:51 PM

وبالنسبه لمكنه التصوير شفت كتير بيشكروا فى الريكو افشيو ايه رايك فيها؟؟؟؟؟؟ وياريت لوتفيدنى بالاسعار

**مصطفى-حسن** · 02-12-2013 07:05 PM

المشاركة الأصلية كتبت بواسطة ahmedelzeeny

وبالنسبه لمكنه التصوير شفت كتير بيشكروا فى الريكو افشيو ايه رايك فيها؟؟؟؟؟؟ وياريت لوتفيدنى بالاسعار

انا مليش خبرة فى مكن التصوير فمش هعرف افيدك
بس الى اعرفة ان المكنة لو مش تمام اللى هتكسبة منها هتصرفة عليها صيانة
حصلت مع واحد صاحبى وفى الاخر باع المكنة

المشاركة الأصلية كتبت بواسطة ahmedelzeeny

المكان الى حد ما قريب من الجامعه بس هو بيخدم اكتر مدرسه ابتدائى ومدرسه تانيه اعدادى بيتهيألى ده حضرتك هتعتبرة وسط اما ميزانيه البضاعه مثلا فى حدود30الف

كدة انت اساسى هتشتغل فى الحاجات التافهة (بضاعة معينة انا بسميها كدة)

وتشمل كل ما يجذب انتباة الجيل بتاع ابتدائى واعدادى واسعارها تحت 10ج وخد عندك بقة..... مدليات - دلايات - سلاسل - صور - لعب اطفال - دباديب صغيرة - ........الخ
والكلام دة كلة 5000ج هيغرقوك من الاصناف دى

وربحيتها النص بالنص او 40% اصل و 60% مكسب

وبعد كدة هتاخد من كل بستان زهرة

يعنى من مجال الكمبيوتر هتجيب الحاجات السريعة والمطلوبة ( ماوس - كيبورد - دراعات بلاى استيشن - كابلات داتا وساتا - كابلات باور - بادة ماوس - كابلات Usb - تطويلة usb - مشترك Usb - اراجة - كاميرا نت

دى الحاجات المطلوبة واللى بتمشى بسرعة كاكسسوار كمبيوتر ....غير طبعا حاجات اكتر من كدة بكتير بس دول اللى بيمشوا بسرعة ومبيركنوش

والتشكيلة دى هتبقى فى حدود 2000ج او 3000ج

ودول بييجوا من مول البستان اللى فى التحرير او من مول سوق العصر اللى جنب اشارة روكسى دى اماكن الجملة بتاعتهم

بكرة بقة هكمل معاك

**mesaharaty** · 16-12-2013 03:05 PM

يا أستاذ مصطفى ... الله يكرمك ويبارك فيك
ألف شكر على المعلومات القيمة
لكن مستنيينك تتم جميلك علينا بباقى المعلومات والنصائح

**مصطفى-حسن** · 18-12-2013 11:51 AM

نكمل المعلومة
هتشتغل بعد كدة فى مجال البصريات بس هتاخد منة البسيط واللى بيتباع بسرعة اللى هوة النظارة الشمية فقط سيبك من الشنابر ونظارات القراءة عشان تقيلة فى البيع وبتاخد وقت

هتحتاج استاندات عرض وهتجيبها من نفس المكان بتاع خشب التجليد اللى فى العتبة وفية منها اشكال كتير وسعرها بيبدأ من اول 35 ج للاستاند الصغير وبعد كدة السعر بيزيد على حسب الحجم لحد 600ج

النظارات نفسها هتجيبها من الممر بتاع الساعات اللى فى العتبة قدام المطافى فى وشها الناحية التانية ودة ارخص مكان جملة ليها

1500ج هتغرقلك الدنيا وربحيتها 50%
ولما تيجى تشترى مش لازم تاخد علب كاملة ممكن تاخد من كل علبة قطعتين او تلاتة عشان تعمل تشكيلة كويسة...والموضوع دة عادى

لما تخش على البياع قولة انك هتاخد جملة