الغربة زمان كان مفهومها انك عايش عيشة صعبة ومبتشوفش اهلك
طب دلوقتي لو انت عايش عيشة صعبة في بلدك ويمكن مش أمن على حياتك اصلا ومبتشوفش اهلك اغلب الوقت.. يبقى تعريف الغربة دلوقتي أيه ببساطة ؟؟
عرض للطباعة
الغربة زمان كان مفهومها انك عايش عيشة صعبة ومبتشوفش اهلك
طب دلوقتي لو انت عايش عيشة صعبة في بلدك ويمكن مش أمن على حياتك اصلا ومبتشوفش اهلك اغلب الوقت.. يبقى تعريف الغربة دلوقتي أيه ببساطة ؟؟
الغربة فى رأيى انك متلاقيش وقت تفكر وتتامل وتحس انك انسان
جوة مصر بقى او برة مش فارقة !
الغربه مش الي انتو بتتكلمو عليه
انت في بلدك هتدخل تقعد مع الست الوالده مع اخوك مع حد قريب منك تحكيله همك انما في الغربه بتقعد وسط اربع حيطاني تكلم نفسك من كتر همك
لما تقع متلقيش حد في ضهرك
تبقئ كل علاقة باهلك وصحابك من ورا شاشة الكمبيوتر اللعين متقدرش تلمس الواقع الي هما عيشينه متشركهمش الفرحه او الحزن
الغربه يعني تخلص شغل وتروح تنام
تجهز لبسك بتاع بكره وتجيب الريموته وتحط الموبيل علي الشاحن وتظبطه علي 6 الصبح وتولع سجاره وتطفي النور وتمدد علي السرير تفتكر الكنزاية او الفاكهه الي في التلاجه تقوم تفتح النور وتجيب الحاجه من التلاجه ولو سكن جماعي مش هتلاقي الحاجه وترجع تقفل النور وتنام علي السرير تخلص السجاره وانت بتفكر هتعمل ايه بكره وايه الي حصل في الشغل النهارده وتخلص السجاره وتحط الطفايه تحت السرير او تزقها في اي مكان وتنام
وتصحي تروح الشغل ترجع من الشغل وهاكذا
لحد لما يجيلك افراج انك تشوف اهلك وكل الي بتحبهم وبيحبوك ولمدة محدوده وترجع تاني ودوخيني يا لمونه
الغربة دوامة نهايتها اما المرض او الموت
اللي بتنام عليه تصحي الصبح تلاقيه مطلوب منك الشغل مثل الانسان الالي ابن البلد بياخذ اجازة يغير فيها جو انت بتاخذ علي دماغك
تحياتي
ليس الغريب غريب الشام واليمن
ان الغريب غريب اللحد والكفن...
Sent from my Xperia Arc S using Forum Runner
هى ليه قلبت ضلمة كده؟ على حد علمى الاخ Terrible_DaRsH لسه خريج جديد فلسه امامه الطريق طووووووويل من الكفاح عقبال ما تضلم معاه شوية زى امثالنا :) و عشان محدش يزعل هتكلم عن الشيوخ امثالى اللى على شفا الاربعين ........ ولا بلاش كمان دول لحسن يزعلوا فهتكلم عن نفسى و بس :)
و عشان الاخ Terrible_DaRsH لسه خريج فريش فتلاقيه بيتساءل الاسئلة الوجودية اللى من النوع اللى فى عنوان الموضوع
عموما
لو الغربة الدافع لها اقتصادى يعنى بحث عن لقمة عيش فدى واجب للانسان على نفسه...... و يتساوى فى ده خريج جديد او شيخ اربعينى
لو الغربة الدافع لها الرغبة فى تغيير نوعية الحياة لحياة افضل...... فهنا هنبقى فى مفترق طرق...... هتلاقى اللى سهل عليه يترك خلفه كل الروابط اللى بتربطه بحياته هنا و يسافر...... و هتلاقى اللى بيتقطع ما بين روابطه هنا و الاهل و الاصحاب و بين الرغبة فى الحياة اللى نوعيتها افضل...... و هنا بقى بتدخل الفروق الفردية بين الناس عشان تحدد اختياراتهم و كله بتمنه لان كل حاجة فى الحياة دى بتمن
بس فى ملاحظة مهمة..... ان اللى بيبقى عايز يسافر لتغيير نوعية الحياة لحياة افضل عادة بيبقى عايز يعمل كده بعد ما قطع شوط فى حياته و صادف بعض النجاح (الذى يختلف تقديره من شخص لاخر) و ايضا حقق بعض الاستقرار الاقتصادى و الاسرى يعنى اتجوز و عمل عيلة و شغال فى شغل لا بأس به
الشئ اللى انا متأكد منه هو قاعدة ان كل حاجة فى الدنيا دى لها تمن...... عايز لقمة عيش هتتعب فى سبيلها و تمنها هو اللى بعض الاخوة اتكلموا عنه فى ردودهم السابقة فى الموضوع ده
عايز نوعية حياة افضل يبقى تمنها غالبا الانفصال عن الاهل و الاصحاب و انك تقلع نفسك من جذورها و تزرع روحك فى تربة جديدة و يبقى حواليك ناس جديدة هتبقى محتاج تتواءم معاهم و مع طباعهم و عاداتهم و ده كل ما بيكبر الانسان فى السن كل ما بيبقى اصعب
و بالتوفيق فى اختيارك ايا كان يا اخ Terrible_DaRsH :)
اشكرك لمشارتك المفيدة
بس انا متخرج من 3 سنين
الفكرة اني من قبل ما اتخرج وانا بفكر أني حياة كويسة في مصر وناس كتير كانت بتخوفني من شبح الغربة خاصة الأهل ..
حاليا مصر بالنسبة لي عائق كبير في تحقيق الأحلام وكل تعريفات الغربة اللي كانت بتتقالي موجودة حاليا في بلدي
لذلك انا مش شايف معنى للغربة بره اذا كانت موجودة جوا، التحديات اللي بمر بيها في مصر اعتقد مش هتختلف عن الخارج بكثير مع فارق الثقافات ومستوى الشعوب مقارنة بمصر ...
فهل كلمة غربة دلوقتي قبل ما الواحد يتخذ قرار ان شاء الله ليها نفس المعنى القديم ولا اتغيرت :)
الاحساس بالغربة عبارة عن تفاعل شخصى جدا بين الشخص و بيئته المحيطة و بتختلف درجته و طبيعته من شخص لاخر. . . التكنولوجيا ساعدت كتير فى التخفيف من الاحساس بيها بس برضه زى ما عبر احد الاخوة انك بتبقى عايز تدخل جوه سكايب مش بس تشوفه :-)
القرار فى النهاية قرارك و انت اللى هتتحمل تبعاته بس خلى بالك انك مازلت تعتبر فى عداد الخريج الجديد و دى ميزة مش هتستمر كتير و هتضمحل بمرور الوقت. . . و الميزة فى النقطة دى انها بتسمح بتجريب الفرص بأقل خسائر ممكنة. . . يعنى كأنك بتتنقل من شغلانة للتانية. . . بالتوفيق
انا عرفت معنى الغربة على حق
قبل ما اسافر قعدت اقول اطلع من البلد بنت التييييت دى إن شاء الله اشتغل زبال المهم اطلع من البلد الفاشلة دى وقعد اشتم كتير فى الشعب والبلد
اقسم بالله العلى العظيم انا اول ما اخدت التأشيرة على الباسبور قلبى انقبض وخفت
ويوم السفر وما ادراك ما يوم السفر فرجت عليا المطار من العياط عشان والدى واخويا واعز صحابى كانو هما اللى بيوصلونى وتعبت نفسيا جامد
ولما وصلت هناك حيث الصمت القاتل محدش بيونسك غير ربنا
مافيش لمة الشوارع فارغة حتى الخروجات ملهاش طعم ولا لذة زى مصر طبع الناس غير الناس المعاملة محدودة شغل وبس مش اكتر
كنت كل ما اكلم اهلى على السكايب واسمع صوت الاذان فى منطقتنا والناس و وصوت الجيران كنت بمووووووووت فعلا
ولا اكل ليه طعم ولا شرب ولا اى حاجة ليها طعم
اول ما جيت مصر قولت انا اسف يا بلدى على انى شتمتك وهنتك فى يوم من الايام
وبعيدا عن المشاعر والاحاسيس ورغم ان ظروف مصر الاقتصادية واقعة بس والله العظيم اقسم بالله مصر فيها بركة وخير وكرم وعز اكتر من اى دولة فى الخليج كله
فعلا مصر هى امى
واسف لو طولت
الى حد كبير هى كده فعلا ..... و الكلام ده اكده الاخ buksh فى كلامه ده:
كنت عايز اضيفلك حاجة كمان عن فوائد السفر و انت سنك صغير....... هى انك بتكتشف حاجات عن نفسك جايز مكنتش تعرفها قبل كده....... يعنى انا مثلا عرفت عن نفسى موضوع الاحساس بالغربة الفظيع ده من سن صغيرة اوى و بطريقة غريبة شوية....... اول ما اتخرجت جاتلى فرصة شغل فى شرم الشيخ...... روحت و قعدت و كان جو جديد و ظريف فى الاول...... بس بعد ما الخروجات و الفسح خلصت و لفيت البلد كلها...... ابتدى معنى العيشة المستمرة هناك يأثر عليا...... و ابتدت عيوب المكان تظهر قدامى....... اولا لقيت الناس اللى مستقرة هناك كعائلات قليلة جدا...... و ثانيا لقيت النموذج السائد هناك هو نموذج الشاب اللى عايش حياته بالطول و بالعرض فى حرية تشبه الى حد كبير ما هو موجود فى البلاد الاروبية...... و لقيت نماذج معروفة لشخصيات متكررة كتير كلها لها نفس النمط ده...... لدرجة انى ملاقتش حد يتوافق معايا فى الطباع و ممكن اتصاحب معاه بسهولة خالص....... كل ده تكشف ليا خلال السنة الاولى لشغلى هناك...... و كان من نتيجته انى مستحملتش اقعد اكتر من سنة لانى ما شوفتش مستقبلى هناك خالص...... و ما كانش ينفع اعيش بأسلوب حياة الشباب هناك لانه مش شخصيتى...... اضف لكده المكالمات اليومية اللى بالساعات للقاهرة للاهل و الاصحاب....... كل ده و انت المفروض فى نطاق بلدك لكن عدم التواءم مع المجتمع و البيئة المحيطة قتل عندك كل حاجة...... فكانت النتيجة الحتمية انى ارجع...... و الميزة ان دى كانت اول شغلانة ليا بعد التخرج و مقعدتش فيها كتير و بالتالى الخسائر كانت محدودة...... و الاهم كمان انى اتعلمت حاجات مهمة عن نفسى
مش شرط الغربه تكون خارج الدوله بس ولكن واحد مثلا من محافظات الدلتا شغال في القاهره بيخرج من بيته مع أول ضوء للنهار وممكن قبل كده كمان ويرجع البيت الساعه 8-9 ويادوب على ما ياكل يلاقي ولاده بينامو وينام هوه كمان عشان يلحق تاني يوم. وفيه برضه طالب الجامعه اللي ساكن في المدينه الجامعيه وبيروح بيتهم مره كل اسبوع ولو من الصعيد والجامعه في بحري هيروح مره كل اسبوعين تلاته شهر.
فيه اللي بيستحمل وفيه اللي مش بيستحمل وفعلا التحمل بيبقى حسب البيئه المحيطه وتكيف الواحد معاها هيتقبلها ويعتبرها وطن جديد ولا هيفضل مربوط بالوطن الاصلي دايما ويتمنى الرجوع كل دقيقه. وفيه ناس مش بتستحمل عشان سايبه حاجه حلوه في الوطن عايزه ترجعلها وفيه ناس بتستحمل الغربه عشان فيه حاجات سيئه في الوطن مش عايزه ترجعلها يعني مش شرط الواحد يتحمل برغبه من جواه ولكن ممكن تجبره الظروف على كده.
الغربة سلبيات فقط ؟؟
احساس بالوحدة والشعور بالخوف :) !
لأ فى اولها طبعا هتبقى مغامرة و ممكن تكون ممتعة خاصة لو انت بطولك. . . بس بعد كده و بمرور الوقت بترسى على احساس بالوحدة و العزلة مش لطيف. . . بس كل اللى بيخوض التجربة بيبقى عنده اسبابه. . . اللى مسافر عشان اكل العيش. . . و اللى صابر على الغربة للعمل على مسنقبل افضل لاولاده رغم انه هو شخصيا بينطحن. . . يالله الحق سافر و انت لسه صغير قبل ما تتربط :-)