الموضوع: الإنطباع الأول - كيا بيكانتو 2008

الإنطباع الأول - كيا بيكانتو 2008

دة أول موضوع حقيقي أكتبه يا ريت يعجبكم.

أنا الحمد لالله أنا اشتريت الكيا بيكانتو 2008 هاف اوبشن

أولاً أنا جبتها من عربيات إلي في شارع الحجاز المهندسين قدام مسجد الحامدية الشاذلية، ناس محترمة جداً جداً بعد ما إتفرجت على كل البيكانتوهات اخترت الفضي. أنا من طبعي اني بفتش في الحجة أوي، المهم لائذة متقرحة حاجة بسيطة أوي، مندوب المبيعات قالي هجبلك عربية تانية من المخزن بس بعد ساعة عشان المخزن في أبو روش المهم جبهة و استلمتها.

المعرض في المهندسين و بيتي في مدينة نصر فطلعت بالعربية و أخدت 15 مايو و نزلت في الجزرة و طلعت كبري 6 أكتوبر و نزلت صلاح سالم المهم مشيت في كذا ظرف زحمة و فواصل كوبري و طريق مفتوح. و هو دة إنطباعي الأول:

1- الموتور ما شاء الله ناعم أوي.
2- العربية واسعة جداً من جوا أنا 182 سم و مليان شوية.
3- الموتور قوته حلوة على حجم العربية.
4- الفيتيس ناعم و سلس.
5- الفرامل بتبتدي من أول الدواسة على عكس المتركس عربية بابا فأنا حاسس إن رجلي طال على الفرامل.
6- العفشة ناشفة أوي أوي أوي، لحد دلوقتي فواصل 6 أكتوبر في ضهري.
7- الكرسي مريحة جداً مش عارف لو مكنتش مريحة كان اه حصل في ضهري.
8- الايريال طويل أوي! بس لسة مركبتهوش عشان لسة مركبتش الكاسيت.
9- التابلوه شكله حلو و اللون البرتقالي مريح لالعين.
10- خامات العربية من جوا تحس انها بلاستيك أوي ! بس في المجمل حلوة بالنسبة لعربية بالسعر دة.

ديه كانت ملاحظتي في ال-20 كم الأولنين مع البيكانتو.

دلوقتي المفروض اروح أرخص و اشتري الكاسيت و اركب سنتر و إنذار و فرش.

ربنا يديني خيرها و يبعد عني شرها.