الموضوع: عايز اعمل مشروع برجاء المساعدة

بص هو انا مشتغلتش فى الحريمى "بالرغم ان مكسبه احلى وبيعه اكتر " ولكن اللى اقدر انصحك بيه من الشغل فى الملابس الرجالى هو انك لازم تحدد انت عايز تشتغل مع مين مع الطبقه المتوسطه وما فوق ولا المتوسطه وما تحتها لانها حتفرق فى حاجات كتير منها
*اولا المكان اللى انت اختارته المستوى اللى بينزله مين علشان ميكونش شغله هاى وانت تجيب شغل شعبي حتضيع نفسك او العكس يكون مكان شعبي وانت تجيب شغل هاى فالبيع يبقي ضعيف وتسمع تعليقات تحرق دمك
*ثانيا نوعيه البضاعه لان البضاعه المصري فى منها اللى بيتعمل فى مصانع صغيره عباره عن شقه وانتاج شعبي صرف ودى شفت منها واحد صدفه واتفرجت على شغله من باب الفضول واسمع ان فى شغل مصري من مصانع كبيره بيكون تقليد للاصلى بس محترم جدا وخامته حلوه جدا وده ينفع كمتوسط وفوق متوسط وشغل الاستيراد ده بتتعامل مع مكاتب ودى شغلها "حسب مبتعامل فى الرجالى " بيبقى ديفيليه بتتفرج على اللى موجود اول مينزل وتحجز الموديلات والكميات اللى انت عايزها وبتستلم حاجتك ومع علاقاتك مع اصحاب المكاتب بتاخد خصومات وبيفتحلك مرتجع واحيانا بيديك حاجات مميزه ليك وبس "طبعا لازم تبقى عشره عمر علشان يظبطك الظبطه دى " حتحتاج تحدد انت حتتعامل مع انهى فيهم وتنزل تلف على الناس اللى حتتعامل معاهم واكيد المصانع المصري الكبيره معاك سواء فى الشعبي او المستورد لانهم يمشوا كده وكده
وخللى بالك انك لازم تلف على اكتر من مكتب لو حتشتغل فى المستورد لان كل مكتب حتتفرج فيه على موديلات تعبر عن زوق صاحب المكتب اللى جايبهم وممكن ميمشيش معاك زوقه وميعجبكش فتلاقى زوقك عند واحد تانى لانهم بيشتروا غالبا من نفس المصانع بره بس مبياخدش كل الموديلات غير المصانع فى مصر انت شايف كل الانتاج قدامك وبتنقى بنفسك .
*ثالثا الديكور لان ده اللى حيحدد البضاعه اللى جوه شكلها ايه انت ممكن توضب محل ب 5000 جنيه وممكن توضب محل توضيب عالى الى ما لا نهايه فبرضه خللى بالك لو فاتح فى مكان شغله عالى اعمل حساباتك فى توضيب عالى وبيتكلف والصنايعيه بتوع الجبسن بورد والميتال بورد والاضائه اللى شغلهم عالى اسعارهم عاليه جدا "واسأل مجرب " فخللى بالك لو راس مالك مش حيكفى توضب كويس او حتاكل من فلوس البضاعه اتقل شويه لان انت حتاخد محل ايجار والمؤجر مش حيستنى عليك .

-خللى بالك كمان ان شغللى انا موسمى معرفش شغل الحريم كده ولا لا لان بصراحه اللى اعرفه ان الحريم مبيبطلوش شراء فاظن انت مش حتفرق معاك مواسم .
-نصيحه اخيره انا مبحبش الشراكه فى الشغل "عن تجربه" خاصه لو صاحبك او معرفتك علشان فلوس التجاره بين المعارف بتضيع ففكر لو تقدر تتعايش مع نفسك ماشي مش حتقدر اتفق مع شريكك على كل حاجه من اول راس المال للارباح والخساره لطريقه الاداره .
-توكل على الله وادرس الموضوع كويس ولازم تبقى عارف ان الشغلانه دى ممكن تخسر فى اولها "خاصه فى الوقت اللى احنا فيه ده وانك مأجر " عقبال متعمل زبون وتغرس رجلك فى السوق الزبون يعرف ان طلبه عندك بالسعر اللى هو عايزه وبالاسلوب اللى بيحب يشترى بيه .
وربنا يرزقك ويكرمك كده والمحل يبقى 10 وياريت لو حد من الزملاء له فى شغل الحريمي يفيدك اكتر منى .
تحياتى .