احنا عندنا جراج تحت البيت لكن لما نخرج أنا باحاول أبعد عن المحلات لكن لما يكون مافيش مكان إلا قدام محل باركن و لما يطلع لي واحد و لسه هيتكلم أقول له بابتسامة و ذوق "خمس دقايق بعد إذنك"
الأسلوب ده غالباً بينفع، و أحياناً ينفع مع شوية برطمة بالكلام، و أحياناً يتنح معايا و ده حصل مع واحد ضخم الجثة كده فضل يتكلم كتير و أكلمه ببرود و أدب و في الآخر قلت له بالحرف "مش عايز كتر كلام، ركنت العربية و هاقضي مصلحتي و أرجع. و لو ماكنتش اتكلمت كتير كان زماني خلصت"
و سبته و مشيت

والدي المحترم دايماً يقول لي بلاش كده و اركن بعيد لا يهوي لك العجل. أقول له يا سلام بقى لو حد هوى لي العجل والله مش هتضايق. عندي كومبريسور بيشتغل على الولاعة و لو مزاجي رايق والله والله أسيب له العربية نايمة قدام محله و أروح بيتنا بمواصلات


بس حكاية "ده محل أكل عيش" دي رخمة قوي. كان في كبابجي في العمارة اللي جنبنا لزق له مواقف كتير بصراحة لكن في مرة كنت واقف في البلكونة شفته بعيني بيقطع فروع من شجرتنا اللي تحت البيت و يرميها و فهمت كده أنه شايف الشجرة بتداري اليافطة بتاعته
اتغظت جداً و استنيت شوية و نزلت له و سألته "هي الشجرة دي مالها صغيرة عن إخواتها ليه، حد بيقصها لوحدها؟" و قلت له: على فكرة مش الشجرة هي اللي هتقطع رزقك يعني!!!!!
قال لي: ولاد الحرام الشوارعية بيقطعوا الشجر و يتخانقوا بيه
قلت له: ياه. عارف نفس ابن الحرام ده هيعمل ايه بعد كده
قال: ايه؟
قلت له: هتيجي بكرة تلاقيه خزق لك اليافطة العشرة متر بتاعتك بفرع الشجرة
اتاخد و ارتبك و سبته و قلت حسبي الله و نعم الوكيل
والله كنت هاقطع له اليافطة بس ربنا خده و هو في السجن حالياً أكل العيش هناك أحسن :)

الواحد نفسه يكون هادي و محترم بس الناس مش مساعدة