و تم إستلام الGen2 وهذا تعليقي

**Blackened** · 18-09-2008 09:56 AM

الســــــــلام علــــيكم

بعد تحقيق و بحث و سؤال و قراءة هذا القسم الممتاز من أوله لآخره و عن إقتناع تام قررت شراء الجين2

و الحمد لله إستلمت الجين2 إمبارح مو 2008 مانيوال. أخدتها من المعرض لمرور بين السرايات في رحلة عذاب الترخيص و رجوعاً إلى البيت

خلال الفترة القصيرة ديه ... هذا هو تقييمي ل "سيارتي"

- العربية مريحه من الداخل و مالقتش فيها عيوب التقفيل (اللي مأدرش انكر إنها ممكن تظهر فيما بعد)
- سحبها ماشاء الله فظيع و ماتوها صاحي
- ال Handling فيها برضو فظيع و طارتها الصغيره بتساعد على التحكم فيها أحسن
- الساوند جامد بس انا جربتو راديو بس
- فراملها ممتازة و سريعة الإستجابة

.....

نيجي بقا للملاحظات الي خنقتني منها في اول يوم و ياريت لو في أي نصيحة من حد بخصوصها يفيدني

- الفتيس تقيل شويه و بالذات في ال مارشيدير .. رخم
- التكييف مش بيطلع هواء ساقع .. هواء عادي جداً .. البائع في المعرض قاللي دي مشكلة في الكومبريسور و هاتتصلح في صيانة الألف وواحد تاني قاللي دا بس عشان لسا بتليين العربية
و أنا الصراحة ديه اكتر حاجة خانقاني و عاوز اروح التوكيل دلوقتي اكشف عليها
- طلعت بالعربية من المعرض في المهندسين للمرور في بين السرايات.. و ركنت هناك و خلصت الإفراج الجمركي .. خرجت .. ادور العربية .. المارش مش لاقط بنزين .. و تعبت جداً لحد ما دورتها عن طريق توصيله للبطارية .. اصحابي قالولي عادي إن البطارية تكون نايمة لو العربية جديدة .. و انا قولت شمعنى نايمة دلوقتي و ماكنتش نايمة لما طلعت من المعرض .. على كل حال .. انا خليتهم يغيروا البطارية كلها لما رجعت العرض
..
هيه ديه المشاكل اللي قابلتني لحد دلوقتي .. و ياريتكم تبدوا آرأكم فيها عشان اعرف اتصرف إزاي ..

و ربنا يخليلكم عربياتكم و يبعد عنها شر الحسد

أخوكم

حســـــــــــــــــــــــ ين

**sa3dawy** · 18-09-2008 10:03 AM

الف الف الف الف الف مبرووووووووووووووووووك على جميلة الجميلات

**wildwest100** · 18-09-2008 10:19 AM

alf mabrook ya basha
rabena yedek 7'erha we yekfek shraaha

**m_marmoush** · 18-09-2008 10:35 AM

ألف مبروك وربنا يباركلك فيها
بالنسبه للتكييف أنت متأكد أن اللمبه اللى على بكرة سرعة المروحه بتنور لما بتشغل التكييف ولا لأ
لو مش بتنور دوس على البكره كلها من النص و حتلاقيها نورت وده معنا أن الكوبريسور أشتغل

**M_HaFeZ** · 18-09-2008 10:50 AM

الف مبروك على العربيه
بالنسبه لموضوع التكييف هو كان الافضل انك تتجنب تشغيله فى الالف كيلو اللى فى الاول
بس كويس اهى ملحوظه علشان فى صيانه الالف يحلوهالك ان شاء الله

**ahmedsiyam** · 18-09-2008 01:09 PM

الف مبروك يا اخ حسين

وخليك وراء العربية وتحاول تكتشف اى حاجة جديدة فيها علشان على قد ماتقدر تلحق تظبطها فى صيانة الـ 1000

والحاجات اللى انت بتقابلها دى عادى جدا لا تقلق لان هى دى بروتون

**momenhamdy** · 18-09-2008 02:09 PM

الف مبروووووووووك يا استاذ حسين
بس انا متهيألي ان حضرتك اول ما فتحت التكيف شغلت المراوح بس ما دوستش علي الزرار الي بين البكره ( و الله اعلم )

و الف مبرووووووك مره تانية و ربنا يباركلك و يديك خيرها و يكفيك شرها