الموضوع: هى الأطفال جرالها أيه

المشاركة الأصلية كتبت بواسطة foxhonda2008

ههه بوص يا كبير
ان عندي سن 3 سنين و 1سنه مش عايز اقولك عاملين فيا ايه و في الشقه و لا كمان لما بنروح ناكل بره بفضل اعتذر للناس الي في المكان من كتر البهدله سكاكين علي الارض المناديل في كل حته
انا حكيلك علي موقف موت علي نفسي فيه كنا قاعدين بناكل في امان الله و مره واحده الشقيه راحت ماسكه ازازه الكاتشب و علي ست قاعده في ضهرنا واديلو يا معلم كاتشب علي الهدوم في ضهر الست و على شعرها بكتير ههه لدرجه اني مكنتش عارف اعمل لحد ما الست حسيت بالكاتشب جوه الهدوم وراحت مسرخه لما عليا كنتاكي كله و من ساعتها باكل في بيتي و حتي لما بنجيب اكل تيك اوي هووووووووم سويت هههههوم الخروج مع العيال قله قيمه
لا تقلق العيال شقيه شقاوت السنين

كلامك دة فكرنى بموقفين .. زمان أول ما خلفت كنت بسيب بنتى عند والدى ونخرج انا والمدام ناكل برة أو نتفسح لحد ما والدى ووالدتى قالولى حرام عليكم كدة البنت تكرهكم والجو دة قلتلهم ماااااااااااااشى خدتهم عزمتهم فى مطعم البرج هم وانا والمدام ومعانا البنت كان عندها حوالى سنتين أو 3 مش فاكر محصلة العزومة دى ... كوبايتين مكسورين وطبق شوربة سى فود على بنطلون والدى وعيش جوة كوبايات المية بعديها بأسبوع لقيت والدتى بتقولى انا نفسى آكل حمام برة بس بشرط تودى بنتك عند حماتك متجيش معانا
الموقف التانى من حوالى شهر رحت انا والمدام والعيلين على روسترى بتاع أرض الجولف ابنى طبعا حاطينه فى baby seat وعمال يحاول يشد السكاكين عشان يرزع بيها عالأزاز ويعمل الصوت اللى بيبسطه وفجأأأأة واحنا بناكل لقيته فوق الترابيزة بقدرة قادر وماسك معلقة بيحدفها قلت معلش عيل صغير قمت ماسكه على رجلى أتاريه عمال يشد فى شعر الست اللى ورايا ويلعب فى لامؤاخذة قفاها غير طبعا الموزاريلا اللى وقعت عالبنطلون والفرهدة والحاجات اللى عالأرض

كلمة السر -------- بطلهم فرجة على التليفيزيون --- هو سبب البلاوى كلها -- هاتحس بفرق 70% على الأقل و جرب بنفسك

المشاركة الأصلية كتبت بواسطة friendship7897

ربنا يحرص أولادكم وأولادنا من كل سوء
بس بجد الشقاوة دي نعمة من عند ربنا
لازم نفرح بشقواتهم دي
ونحمد ربنا عليها
ومش علشان راحتنا نتمنى لهم الأنتخة
وكمان لازم نستمتع بسنهم دا
لأنهم كل ما بيكبروا طلباتهم بتكتر وذنهم بيكتر
فأستمتعوا أستمتعوا أستمتعوا بهذه السنون
دا أنا بفرح لما أبني يرد عليا بالمنطق الغير منطقي ويتفزلك
وبكون عايزة أقرقشه لما يغني أغاني هابطة من بتاعة أفلام العيد ( ربنا ينتقم من السبكي واللي زيه )
وأسأله : أنت جبت الأغنية دي منين ؟
يقول لي من الفيس يا ماما ( وبين الكلمات - ياجاهلة )
بس أعتقد وعن تجربة لازم السن الصغير دون سن المدرسة يروح حضانة حتى لو الأم ربة بيت
منها الأم ترتاح من ذنه شوية وتعرف تشوف شغلها ،
وهو يتعود على بعض القواعد اللي هتيعلمها من مربية الحضانة ،
ولو ساعتين في اليوم ،
وهيرجع مرهق شوية فهتكون حركاته أقل .
وكمان فيه بعض المأكولات بتساعد في تهدئة حركاتهم
تفاح – موز – شمام – برتقال – الفراولة
تقليل السكريات وإستبداله بعسل نحل وتقليل الكمية
تقليل المشروبات الغازية وإستبدالها بلبن أو عصير قليل السكر
المأكولات التي تحتوى على الماغنسيوم زي التين والكاكاو والشيكولاته والتمر
والإقلال من المقرمشات وأكياس الشيبسي علشان فيها مواد حافظة بتصيب الأطفال بفرط الحركة
ولازم مننساش شرب الماء للأطفال لا يقل عن 2 لتر يومياً علشان بيخلص الجسم من المواد الضارة
وأهم ينشغلوا شوية بعمل الببيبي

بصراحة حضرتك معاكى حق ان الطفل اللى بيلعب دة نعمة لأنهم اما بيعيوا الواحد بيصعب عليه وبيقول يخفوا ويرجعوا يلعبوا مش مهم بس الواحد اما بيفرهد من الجرى وراهم او تصليح اللى بوظوه بيتجنن بردو .. أو المدام مثلا اما تكون لسة موضبة الشقة وتدخل الأوضة تلاقيها بقت عبارة عن ملاهى ولعب فى كل حتة أو أنا مثلا اما الاقى اباجورة مكسورة أو ابنى لسة من لسبوعين قلب التليفزيون عالأرض