الموضوع: هيونداي سوناتا

السوناتا فى منها 3 فئات
مانيوال 2000cc و دى سعرها 150000 و عليها عرض فى رمضان ب 143000 , اوتوماتيك 2000cc و سعرها 165000 و بعد العرض 158000 و الاخيرة اوتوماتيك 2400cc و سعرها 185000 و بعد العرض 178000.

اولا العربية شكلا جميلة جدا , واسعة جدا جدا جدا من جوه يعنى تبقى مرجع الكرسى على الاخر و اللى قاعد وراك فارد رجله و مستريح على الاخر.

امكانيات العربية (اولا ال2000cc)
ABS+EBD , Steptronic , Multifunction steering wheel , Cruise control , Parking sensors , 1 Airbag ,
فرش جلد , جنوط 16 (بصراحة الجنوط ضيعت شوية من حلاوة العربية غير ال 17 خالص) , تكييف automatic (تاتش يعنى) , Radio Cd + mp3 + usb , ستارة خلفية يدوية.
امكانيات العربية (ال2400cc) الرزيادة عن ال2000
تابلوه ابانوس شيك جدا , كرسى السائق كهرباء , airbag اضافية للراكب الامامى , مفتاح لغلق الairbag.
غير طبعا فرق الموتور , ال2400 161 او 162 حصان مش عارف بالظبط .

العربية ثابته جدا جدا جدا على الارض فوق ما تتخيل , هتعجبك اوى اوى اوى على طريق وادى النطرون او العين السخنة و انت ماشى على اى سرعة انت عايزها هتشوف ثبات رهيييييب جدا على الارض(حتى لو على 200 , انا اخرى بجيب 190 بمشى عليها شوية و بعدين بخاف و اقوم راجع ل 170-160 و اكمل بالسرعة دى طول الطريق, محاولتش ازود عن 190 بس هى اكييد هتجيب بسهولة).
نفس الكلام بالنسبة لوسع العربية , من ناحية الموتور طبعا مش هكلمك على الفرق بين ال2400 و ال 16000 , او ال2000 و ال1600 مع ان العربية ضخمة جدا
فى رايى العربية شيك جدا جدا و احلى من العربيات اللى بنفس سعرها (مع انى برده بحب الجيتا جدا) و دا طبعا اذواق .
فرامل العربية قوية جدا , التكييف قوى جدا جدا لدرجة انت من كتر السقعة و فاتحه على اول درجة فى عز الصيف و قعدت فى العربية بتاع نص ساعة ممكن تسقع و تقفل التكييف دقتين كدا .
بصراحة من الاخر لا تقارن اطلاقا بالجيتا و الاوكتافيا و الفكترا , العربيات دى مع التكييف و خصوصا الاوتوماتيك و مع حجمها الضخم تحس انها مبتسحبش نهائيا و انا شفت بعينى.

تقفيل الجيتا و الاوكتافيا و الفكترا من جوه بس احسن سنة منها (هى بتتقفل فى مصر) , العربية انا عامل بيها قرب ال 35000 كيلو (بستخدمها كتير) عمرى ماظهر معايا اى مشاكل ميكانيكية او اى حاجة من الكلام دا و لا اى ملاحظات عليها و السؤال دا بيسالهولك علطول فى التوكيل فى ملاحظات , لم يظهر فيها اى من العيوب الغربية اللى بنسمعها عن التقفيل فى الفرنا و الكلام دا.

كل اللى ظهر فيها بس و دى حالة خاصة قطعتين من داخل العربية اتفكوا زى مثلا الكرسى الكهربائى ليع غطا بلاستيك بيتفك و يتركب تحت الكرسى مكانش متركب كويس و خدت بالى منه فى محطة البنزين و العربية بتتنضف و القايم بتاع حزام الامان ليه كلبسة مكنتش متركبة كويس , انا عارف انها حاجات هبلة اوى اوى و بتركب فى دقيقة و انت واقف مكانك بس انا قلت اقول كل حاجة علشان ابقى وضحت كل حاجة بالظبط و عموما انا سالت قالولى الكلام دا فى اول دفعة بس علشان العامل كان لسه بيتعامل مع عربية جديدة , للعلم هما مشددين اوى ان متظهرش و لا فتفوتة فى العربيات علشان العربية ليها منافسين و فى نفس الوقت بيكسبوا منها كتير اوى و لسه جديدة عليهم فمهم اوى سمعتها بالنسبلهم, على فكرة الحاجات اللى قلتلك عليها دى ممكن تتفك من اى عربية حتى المرسيدس و فعلا بتحصل بس انا قلت اقولك عليها برده فى الbmw بالذات كتير.

بالنسبة للتوكيل انا شايفه ممتاز جدا جدا و العربية بتخش و بتخرج خلال ساعة و نص ساعة بالكتير كمان تكون دافع و محاسب و ماشى, اهم حاجة تكون حاجز بالتليفون (للعلم اعتقد فى ميزة فى التعامل مع السوناتا فى التوكيل يعنى اعتقد بيدخلوها علطول اول متوصل بالعربية لو حاجز و بيخلصوها علطول و اعتقد غبور بيعمل كدا علشان بيكسب كتير من العربية سواء فى سعرها او قطع الغيار فيهمه اوى سمعت العربية , يعنى حسب ما لاحظت فى معاملة مختلفة و السبب انهم بيقلبوك جامد اوى و هشرحلك دلوقتى, يعنى ناس بتشتكى من تاخر العربيات من مركات هيونداى التانية و انهم بيوسخوها و حاجات كدا مع انى علطول اول ما بخش المركز بياخدوا العربية على الورشة علطول بس برده دى حاجة مش مأكدة و الكلام دا لاحظت ان حد تانى قاله ), عموما دى مش قاعدة دى حاجة انا ملاحظها.
عيوب العربية :
ال 2400cc : عليها ضريبة ترخيص سنوية 2% من تمن العربية و بتقل كل سنة 5%, يعنى اول سنة 3700 جنيه ترخيص بس دا غير طبعا بقية مصاريف الترخيص , دى الضريبة الجديدة بس و كل سنة تدفع نفس الضريبة مع خصم 5%.

عيبها سعر قطع الغيار : مبالغ فيها جدا جدا جدا جدا , تيل فرامل امامى 1000 جنيه (اعتقدر رخصوه 100 جنيه بقا 900) , تيل خلفى 650 جنيه, فانوس واحد امامى 1750 و نفس الكلام للفانوس الخلفى , يعنى من الاخر هتتقلب هتتقلب , على فكرة اعتقد الاسعار زى او اغلى من الالمانى.

العربية كورى صحيح بس مش معنى كدا ان الالمانى احسن منها , مفيش حاجة اسمها كورى و المانى , فى حاجة اسمها عربية و عربية , انا شايف انها احسن من كل العربيات الالمانى اللى فى فئاتها السعرية.

السوناتا ضمانها 3 سنين او 100000 كيلو .
للعلم انا مش منحاز للعربية علشان عربيتى , بالعكس انا بحب الاوكتافيا و الجيتا و خصوصا الجيتا جدا جدا جدا و لو انا كنت جبت الجيتا كنت هبقى مبسوط اوى اوى اوى , بس لو انا نازل دلوقتى بعد ماجربت السوناتا لمدة سنة و كام شهر هجيبها تانى علطول واساسا انا كنت هشترى الجيتا قيل مايجمعوا السوناتا و بحبها جدا.

عيب صغير تانى فى العربية انها مش متدلعة زى العربيات الالمانى اللى بنفس تمنها و دا بسبب غبور (الله يسامحوا) او حاجات مبتنزلش بيها بره يعنى شالوا منها الESP (دا مش موجود حتى فى الجيتا و الاوكتافيا و الفكترا ) , مفيهاش فتحة سقف و لا زينون و لا تلاجة و لمفتاحها عادى مش زى التانيين (فى الشكل , زى مفتاح اى عربية هيونداى ) , و مفيش مرايات بالطى الكهربائى , مفيش مرايا اللى فى النص اللى بتعكس الضوء (غبور شايلها), مفيش Bluetooth , مفيش 6 airbags, كدا يعنى , بس الصراحة برده هى مبهرة جدا جدا عنهم فى العربيات اللى بنفس السعر , يعنى الجيتا الكاملة ب 212000 و الفكترا الكاملة ب 220000 و الاوكتافيا الكاملة ب 230000 حاجة كدا, اغلى فئة فى السوناتا ب 185000.

بعدين العربية فئة اعلى من منافسينها و بره بتنافس الكامرى و الاكورد (تقريبا بنفس تمن الكامرى و الاكورد اغلى من الكامرى و السوناتا ال2 بحوالى 2000$ يعنى 11500 جنيه!!).

ارجو اكون افدتك واى سؤال انا فى الخدمة

الصراحة افدت جدا شكرا جدا جدا ليك السيارة دى انا فى الامارات لما سوقتها مصدقتش بصراحة انها صناعة هيونداى الدقة الموجودة فى تفاصيل السيارة هايلة جدا، الكفاءة عالية جدا طبعا سعرها فى الامارات حوالى 55000 درهم بس و دا طبعا اقل من اى سيارة تانية 2400 سي سي قولت اشوف اخبارها فى مصر ايه و كلامك ده ادانى ثقة اكتر فى العربية انا كنت بفكر اما سوناتا او اوكتافيا بس سوناتا 2400 المستوردة ( على حد علمى ) تكون افضل بكتير من الاوكتافيا 1600 الفولى لودد من ناحية الاداء و الشكل و التفاصيل الدقيقة اما بالنسبة للتكنولوجيا العالية الى اتكلمت عليه مش عيوب كبيرة قوى لواحد عايز اداء قوى من السيارة

السؤال الاخير : معدل استهلاك البنزين ؟؟؟؟؟

كمان ارجو التثبيت من الادارة و الاشراف العضو سمعه قادم تقرير ممتاز و اعتقد يستحق التثبيت

السؤال الاخير : معدل استهلاك البنزين ؟؟؟؟؟

معلش انا كنت عملت edit و زودته بس يظهر كان فات 6 دقايق فمتكتبش.
معدل استهلاك البنزين بيبقى مكتوب على كمبيوتر الرحلات و هو حوالى 60 لتر لكل 540-560 كيلو بس طبعا دا معدل يعنى مثلا لما تمشى على 160 كم الرقم دا بيتغير تماما كدا يعنى بس دا المتوسط , انا شايفه معقول لو استخدام العربية جوه المدينة اما بره المدينة فهو مكلف شوية على الطرق السريعة يعنى و دا يعتبر من عيوب العربية يعنى حاجة تعيب ال2400cc عمتا حتى لو فى مرسيدس مش عيب سوناتا.

استهلاك البنزين فى عربية 2400cc اكيد اكتر من عربية 1600cc بس الصراحة انا محستش انها مشكلة خالص.

بالنسبة لسعر العربية فى الامارات انا كنت سالت و لقيت ان فى 3 فئات 2400 فى الامارات, type 12 , type 13 , type14
دى اسعار موديلات 2009
على فكرة 2009 مختلفة فى الامارات عن اللى بينزلها غبور , العربية من جوه مختلفة تماما و احلى بكتير و تابلوها ازرق (مع ان التانى اللى بينزل مصر حلو اوى برده) و فيها bluetooth بس اعتقد دا مبينزلش فى الخليج , على فكرة هيونداى فى الخليج بتمسح كل الكماليات الجامدة اللى فى العربيات زى ما غبور بيعمل بالظبط و علشان كدا سعرها رخيص فى الامارات (الكامرى و الاكورد اغلى منها فى الامارات).
type 12 و دى اقل فئة فى ال2400 كان تمنها حسب ماقالولى 60000 درهم و دى فيها 1 airbag بس و multifunction steering wheel و Radio cd + mp3 , فرشها قماش.
اما الفئة اللى بعدها و دى فيها زيادة جهاز انذار (ريموت كنترول) , cruise control , مسند يد , طارة جلد , خشب و برده الفرش قماش.
اما اعلى فئة اللى ب 76000 و دى نفس الكماليات اللى بتنزل مصر (ماعدا فتحة السقف) 2 airbags , تكييف تاتش , ABS , parking sensors , remote control , فرش جلد , مسند يد , تابلوه + طارة خشب , cruise control , كرسى السائق كهرباء , computer للرحلات (دا موجود فى السوناتا المصرى بس نسيت اكتبه), فتحة سقف (مش موجودة فى مصر).

دى الفئات التلاتة اللى موجودة فى الامارات , انا كنت نسيت اسال على سعر الفئة الللى فى النص.
الميزة الرهيبة كمان فى السوناتا المستوردة انهم حاطين فى 2009 موتور جديد 2400cc بس 171 حصان و طبعا بيستهلك بنزين اكتر , دا غير الفتيس ال5 نقلات , فى مصر 4 نقلات بس دا غير طبعا الinterior الجديد فعلا رهيييب .
من بره اختلاف بسيط اوى اوى.

على فكرة سعر العربية فى امريكا اغلى بكتير من سعرها فى الخليج و بتتباع بنفس تمن الكامرى فى امريكا (تقريبا) علشان فيها حاجات كتير اوى مبتنزلش الخليج زى ال 6 airbags و ESP و sensors بالهبل يعنى لو حد حط ايده قدام الشباك و هو بيقفل يوقف لوحده , دا غير التحكم المنفصل فى التكييف لكل راكب و حاجات تانية كتير علشان تبقى بنفس كماليات الكامرى الامريكى و بنفس السعر , فى مصر و الخليج انا بعتبر العربيات بتنزل فاضية , على الاقل فى الخليج مفيش جمارك , هنا الجمرك على ال2400cc حوالى 135% + 45% ضريبة مبيعات + 8.5% ضريبة تنمية , يعنى بلاش تستورد السوناتا و تدفع جمركها هتبقى غالية اوى اوى اوى
عموما يا ريت حضرتك توضحلى استخدامك للعربية ازاى يعنى مثلا حضرتك عايش فى الامارات و هتنزل مصر اجازات و لا عايز تنزل عربية جمرك فى مصر و لا عايش فى الامارات و مش نازل مصر علشان اقدر افيد حضرتك اكتر ايه اللى ينفع احسن.

يا ترى كمان العربية اللى حضرتك بتتكلم عليها موديل 2008 و لا 2009؟

كمان ارجو التثبيت من الادارة و الاشراف العضو سمعه قادم تقرير ممتاز و اعتقد يستحق التثبيت

دا تقرير عادى ميستحقش يتثبت , شكرا على ذوق حضرتك.

بالنسبة لموديل العربية الى ركبتها هنا هى 2008

اما بالنسبة لاستخدامى للعربية انا ناوى انزل نهائى و كنت بفكر اشترى عربية من مصر بيتهيألى سوناتا هتكون افضل اختيار ليا

حاجة اخيرة هو الموديل ال 2400 سي سي ده مش مستورد يعنى المفروض يكون الكماليات فيه غير المجمع محليا ولا ايه ؟

يبقى حضرتك كدا تشترى العربية من مصر
السوناتا فى مصر ال2400 و ال2000 الاتنين تجميع محلى بس المكونات بتبقى مستوردة يعنى بيستوردوا القطع و الاجهزة و يركبوها فى مصر.
اما السوناتا المستوردة فى مصر ال2400 سعرها هيعدى ال300000 علشان كدا فى عربيات كتير بتتجمع فى مصر مثال المرسيدس C-class,E-class,S-class و قريبا ال GLK و BMW مثال ال3 series و ال 5 series و ال 7 series و ال x3 , نيسان صنى و x-trail و دايو نوبيرا و لانوس و هيونداى سوناتا و فرنا (مصانع مختلفة دلوقتى ) و brilliance galena w splendor و jeep cherokee و chevrolet aveo و شوية عربيات صينى و peugeot pars و عربية هندى (ماهيندرا).
كل دا بيتجمع فى مصر.
السوناتا ال2400 بتاعتى تجميع محلى برده(التجميع بيختلف عن التصنيع) , التجميع مجرد تركيب بس.
موديل 2009 فى السوناتا نفس شكل 2008 فى الامارات و نفس الموتور و نفس كل حاجة و بنفس الoptions بتاعت ال2400 اللى ب 76000 درهم.

ربنا يبارك لك فيها ويديك خيرها و يكفيك شرها. أنا كنت عاوز اسأل عن متانة البودى مقارنه بالأوكتافيا و الجيتا.

السوناتا ال 2400 اول ما نزلت كانت كوري وب 250 الف بصراحه تحفه بس غاليه برضو