صباح الورد على الشباب
يوم الأحد اللي فات بالليل لقيت باب تانك البنزين متكسر. الباب المدور اللي بيغطي غطاء التانك !!! واحد محترم تقريبا كان بيرجع بضهره وكسرهولي ومشي في ستين سلامة
منظر فتحة التانك كان عرة بصراحة بالاضافة الى تأثيرها النفسي المهبب على واحد محسوك زي اخوكم ، المهم يوم الاثنين اتصلت بمصطفى بطاح في الوكالة وسألته على باب التانك وقالي انه موجود ، خلصت الشغل وروحتله لقيت عنده غطاء واحد بس لكن من النوع اللي بيفتح من جوه من يدوي من بره زي اللي عندي طبعا ماينفعش عندي. قاللي مفيش قدامك غير انك تنزل تشوفه جديد في التوفيقية ، اتمشيت لغاية التوفيقية وروحت عند بدروسيان وسألته عليه ولقيته. تخيلوا سعره كام ؟ 410 جنيه ياحضرات !!!
حتة بلاستيك مدورة بـ 410 جنيه !!! طبعا ماخدتوش وكملت لف روحت عند عادل شحاتة قريب من بدروسيان قاللي مش موجود.
روحت البيت وخدت العربية ونزلت عند الصيرفي في جسر السويس برضه معندوش
روحت مكمل على شارع دمشق ، سألت عشم نوار وسامي فخري مش موجود. روحت مكمل على يافا
الحمد لله طلع موجود عنده وبرضه الماني الصنع زي اللي كان عند بدروسيان. سعره كان 350 جنيه وبالعافية وبطلوع الروح خدته منه ب 330 جنيه والسمكري خد 10 جنيه تركيب.
باقي فقط اني اروح ارشه يوم الجمعة لأن الجديد بيكون لونه ابيض.
دلوقتي كل قطع غيار العربية فيها تركي وتايواني ، تايوان وتركيا مش قادرين يعملوا لنا الباب ده ويكون ثمنه 60 جنيه مثلا ؟!