تقرير صيانة ال 40 فى مركز speed services

**mastr_n** · 04-12-2013 02:17 PM

السلام عليكم ورحمة الله وبركاتة
العربية كيا سيراتو 2010 خليجى ودة تقرير صيانة ال 40 الف كيلو العربية
بعد التفكير والحيرة بين كذا مركز للصيانة ومابين التوكيل واسعارة المبالغ فيها والضريبة العالية
قريت الموضوع دة
http://www.nilemotors.net/Nile/28764...r-enghany.html
وقولت اجرب خصوصا ان انا مش عندى مشكلة الحمد لله دية مجرد صيانة دورية مش اكتر
المهم انا روحت المركز حوالى الساعة 12 الضهر وقابلت المهندس هانى بصراحة اقل مايتقال علية انة محترم وفاهم شغلة وعندة ضمير
بالنسبة للمركز
المكان ضيق مش بيستوعب ألا عربية واحدة بس على الرافعة الهيدروليك مش زى المراكز التانية
تخش تقعد على الأريكة وتشرب كباية كابتشينو ب 15 جنية ههههههه
بس بصراحة بعت جابلى 2 قهوة من برة الحق يتقال بردة
نيجى بقى للشغل اللى تم فى العربية
بعد ما العربية اترفعت وعمل complete check up زى مانا قولتلة بالظبط
كتبلى على المطلوب شراءة قول ياهندسة
وطبعا جمبة محل قطع غيا للقطع الصلية وأصر انى اجيب القطع الأصلية
1 - سير مجموعة 195 جنية
2- فلتر هواء 65 جنية
3-فاتر بنزين 125 جنية
4-بوجيهات زى بتاعة التوكيل بالظبط اصلى ب 125 جنية
5- تيل فرامل امامى اصلى ب 400 جنية ناقص من السوق لقيتة عند الجندى فى شارع دمشق
بالنسبة للزيوت والفلاتر

طبعا انا اتقفلت من شل وموبيل علشان تقفيل وتعبئة مصرى وقولت اغير لحاجة جديدة وللاسف كنت بحط زيت 5000 شل للاسف فققرت انى استعمل الزيت التخليقى ال 100000
وبعد الحيرة مابين ال وولف والفالفولين وال زادو اشتريت ال valvolin التخليقى
المهم اشتريت الأتى
1- زيت فالفولين ال 10000 ب 265 جنية
2- 3 لتر زيت فتيس اتوماتيك atf 320 اللتر ب 40 جنية التلاتة ب 120
3-فلتر زيت كورى ب 30 جنية
4- اشتريت علبة فلش للموتور ليكو مولى ب 35 جنية وحطيتها على الزيت القديم ودورت 10 دقايق ونزلتة بالفلتر

وخليتة يركب ثرموستات الكوعة علشان كان فى ميكانيكى قالى شيلها قبل كدة وشيلتها خليتة يركبها تانى وجبت جركن مياة خضرا ب 40 جنية

وتم تربيط العفشة وتلميع الموتور

انطباعى عن المركز هوة بصراحة مش فى امكانيات المراكز الكبيرة بس فى ميزة انك بتقدر تشوف العربية وتتكلم مع المهندس هانى فى كل حاجة انت عايزها وتحكيلة عليها وهوة على فكرة صبور جداا وعندة ضمير واسعارة بالنسبة للمراكز التانية ممتازة وكشفلى بجهاز كشف الأعطال كمان
التكلفة
50 جنية مصنعية صيانة
20 جنية تركيب سير المجموعة
10 تركيب الثرموستات
اجمالى 80 جنية
بصراحة الواحد صرف 1500 جنية بس العربية فاقت والسحب بقى ممتاز جداا وجارى تقييم الزيت الفالفولين بس على الطريق السريع استجابة العربية ممتازة الحمد لله

**Deshahcoka** · 04-12-2013 03:10 PM

الف مبروك و ربنا يباركلك يارب يكون عندنا ناس محترمة كدة في اسكندرية :) بدل التوكيل النصاب :)

**mastr_n** · 04-12-2013 03:13 PM

المشاركة الأصلية كتبت بواسطة deshahcoka

الف مبروك و ربنا يباركلك يارب يكون عندنا ناس محترمة كدة في اسكندرية :) بدل التوكيل النصاب :)

اللة يبارك فيك ولو دورت فى اسكندرية هتلاقى اكيد

**Hacker5** · 04-12-2013 04:45 PM

الف مبروك على الصيانة انا كنت لسة عنده يوم السبت و المركز ممتاز جدا

**amr011111** · 04-12-2013 04:51 PM

اهم حاجه انك بتبقى واقف وشايف الشغل بنفسك مش زى التوكيل متبقاش عارف مين اللى بيسوق العربيه ولا ايه اللى تم تغييره

**mastr_n** · 04-12-2013 05:02 PM

المشاركة الأصلية كتبت بواسطة hacker5

الف مبروك على الصيانة انا كنت لسة عنده يوم السبت و المركز ممتاز جدا

اللة يبارك فيك وحضرتك اللى شجعتنى بصراحة

**mastr_n** · 04-12-2013 05:04 PM

المشاركة الأصلية كتبت بواسطة amr011111

اهم حاجه انك بتبقى واقف وشايف الشغل بنفسك مش زى التوكيل متبقاش عارف مين اللى بيسوق العربيه ولا ايه اللى تم تغييره

فعلا دية اهم نقطة فى الموضوع لأنك ممكن تكتشف حاجات تانية تعملها انما المراكز الكبيرة بتقعد تشرب المشروب الجميل وتقوم تدفع المبلغ المحترم

**saddam** · 04-12-2013 05:47 PM

صديقي المواطن
أنا سعيد من أجلك وشايف أسعار المصنعيات من قمة البلاش بس مش مقتنع ببعض أسعار قطع الغيار وفالفولين قطعا أحسن زيت بس محتاج تحط معاه إضافات حديثة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال