انقذوني ،، فرح اختي بكره والميكانيكي بيقولي حل مكنة ومخرطة

السلام عليكم

في كل اخر غيار العربية فيها صوت وررر او كركرة كده استغربت الصوت جدا،
المهم رحت على الميكانيكي قالي دور مع قرصة بنزين كده الصوت بقى عالي بتاع التكتكة دي او الكركره فسألني لمبة الزيت بتقيد معاك قولتله لأ وفعلا لمبة الزيت ما بتقدش خالص فقالي الكلام ده يبقى يوم السبت ليه يا اسطى قالي الكرنك بيخبط وعايز يتخرط وطقم سبيكة ! وهياخد وقت لأن المكنة هتتحل وبتاع طيب قولتله امشي عليها قالي امشي عليها اخرك اولاني تاني

المشكلة ان فرح اختي يوم الجمعة بعد بكره، ومش عارف اطلع بالعربية واسمع الكلام ولا لأ

تاني حاجة ايه حوار طقم السبيكة ده وتكلفته بتبقى في حدود كام العربية لانوس 1 موديل 99

ياريت حد يفهمني لأن معلوماتي مش قد كده وبعدين سرشت على موضوع السبيكة ده مالقتش حد قايل الموضوع بشكل كافي

السؤال التاني هل ارحم وأفضل اني اجيب شورت بلوك وخلاص

شكرا

في دخنه ولا لا...والذيت بينقص? وعموما لو عايز نصحتي اطلع علي بور سعيد وهات موتور استيراد مكنه 1600 وبلاش بتوع الاستيراد...دا لو فيها عمرة لا قدر الله

اقتباس:

---

المشاركة الأصلية كتبت بواسطة دعبدالرحيم

في دخنه ولا لا...والذيت بينقص? وعموما لو عايز نصحتي اطلع علي بور سعيد وهات موتور استيراد مكنه 1600 وبلاش بتوع الاستيراد...دا لو فيها عمرة لا قدر الله

---

د.عبد الرحيم شكرا لحضرتك على الرد بالنسبة للدخنة البيضا كنت بلاحظها من فترة بس اختفت ولما قولت ايامها للميكانيكي قالي انت عندك تسريب زيت هو اللي بيعمل كده ، المهم من اسبوع بالظبط حل الموتور علشان يركب اويل سيل كرنك بالتالي موضوع نقص الزيت مش هقدر احدده بسبب التسريب بس قبل التسريب العربية ما كانتش بتاكل زيت .. بس خلينا على اسوأ الظروف اني هشتري موتور استيراد

حضرتك بتقولي بلاش بتوع الاستيراد ! طيب اجيب الموتور ده منين؟ ولو في اي نصايح ياريت حضرتك تعرفني .. يعني اخلي الميكانيكي هو اللي يجيبه واريح نفسي ولا اعمل ايه بالظبط ؟

السبايك .. هي قطع المونيوم بتركب بين البيل و الكرنك .. عشان تقلل عملية التاكل .. و طبعآ طالما بيخبط ..يبقي مينفعش تمشي عليها .. لان ممكن تكسر البلوك او الكرنك بعلم جامد .. و بكده مش هتقدر تعمل حاجه غير تغير المتور .. و فعلآ الافضل تشتري ماتور استراد لانه نفسة تكلفة العمره .. و نصيحه .. خد ميكانيكي ابن حرام معاك ..لان للاسف المواتير الاستراد تلوقتي اغلبه زفت .. لان التجار بقو بيجيبو العربيات من دول زي الصين و اندونيسيا و كوري و بياخدو الحاجات الرخيصه .. و فيه مواتير استراد كتير حالته وحشه .. و لازم تجرب الماتور علي الارض و متاخدش مكنه ناقصه الهواء و الا حتي مسمار و يا سلام لو فكتها من نص

والله حضرتك انا معايا نفس العربيه وبقولك استيراد لان موضوع العمرة لمواتير الانوس فاشله والافشل الاستيراد ..ان مع الاخ chiko انك تحلها من نص ..لان دا حصل معايا وكان الموتور بايظ وحصلت مشكله ..وانا باقترح بور سعيد لاتساع الدائرة وهتتفرج علي مواتير كتير .واواعي تنسي ورقة الافراج الجمركي لانك هتسبته ف الرخصه ..

لو لقدر الله هتعمر لبقا تغير ماتور علي طول ولازم ميكانيكي ابن حلال