خدعوك فقالوا: الdsg ال٧ سرعات متعدل و مفهوش مشاكل
أعزائى ملاك الفتيس الDSG، حابب أشارككم بمشكلة الفتيس ال DSG اللى حصلت معانا فى الشركة للعظة و العبرة
عندنا فى الشركة عربيتين Touran موديل ٢٠١٠ بفتيس DSG مع اتنين زملائى.... العربيات دى عربيات شركة و أنا بتابع بصفتى بفهم فى العربيات لو حصل مشاكل ضخمة زى اللى هحكيلكم عليه دلوقتى
واحدة من العربيات ال Touran جابت فتيس (كارتة ميكاترونيكس) عند ٣٥ ألف كيلو.....للأسف العربيات مشتراه عن طريق حاجة أسمها إيجار تمويلى car leasing و هو زى القسط كده على ٥ سنوات....المهم العربية كان بقالها حوالى ٤ شهور من الزيرو...التوكيل قال أخرى أغير فتيس فى الضمان....كلمنا طوب الأرض و شكاوى لألمانيا كذا مرة و فولكس ميدل أيست و يقوللنا فى الأخر أحنا بنثق فى التوكيل و هو هيعمل اللازم.....بعد حوارات و وواسايط و كل حاجة ممكنة قبلوا يبدلوا التوران بباسات موديل ٢٠١١ زيرو مع دفع فرق أستهلاك.... طبعا الباسات كانت نازله ب DSG ٧ سرعات و قاللولنا ده الجيل الجديد و متحدث و مفهوش مشاكل و كلام كتير.... العربية كانت موديل شهر ديسمبر ٢٠١١
صدقنا و العربية تمام و فضلت ميه ميه من ساعتها لغاية من شهرين كده عملت فصل و علق الفتيس.....راحت التوكيل قالوا دى عايزه تغيير حاجة فى الدبرياج طبعا أنا ساعتها مكنتش متابع و اتغيرت فى الضمان و مشيت شهرين و بعد شهرين العربية بتمون بنزين و لسه بتطلع. من المحطة و راح الفتيس قافش مبينقلش....العربية اتنقلت على كساحة للتوكيل و اتغير فتيس كامل DSG ٧ سرعات تحت الضمان....دلوقتى فاضل شهر و العربية تخرج بره الضمان و طبعا مرعوبين رعب السنين
الغريب أن ال Touran التانية اللى هى موديل ٢٠١٠ و DSG ٦ نقلات ماشية تمام و محصلش فيها حاجة و عاملة ٨٥ ألف كيلو!!!!!
أنا حابب أوضح أن ال DSG ال ٧ سرعات فطشة و لا هو جيل جديد و لا هو متعدل و فيه نفس عيوب ال ٦ سرعات.