الموضوع: يارجاله...هو ايه موضوع صديقى المواطن دة ههههههه

صاحب اسلوب راقي ،، صدام

المشاركة الأصلية كتبت بواسطة saddam

صديقي المواطن
قولا واحدا رجعت لكل معاجم لغات العرب والفرس والعجم وقلت أرجع الكلمة ﻷصلها هل فيها شتيمة لا قدر الله وأنا مش واخد بالي
أنا بقولها من باب إضافة صفة إحترام وتكبير ﻷي أخ قاريء أو عضو في المنتدى فأنا منذ طفولتي لا أستخدم كلمات ب ا ش ا و ب ي ه ﻷنها بقت على كل لسان وممكن تشوف إنسان بيشتمك يقول لك ب ا ش ا وبعديها يبتدي في وصلة عدم اﻹحترام أو بعد إذنك ب ا ش ا متركنش هنا تاتي وأنا من خلال تجاربي في الحياة فيه حاجات بسيطة جايز حضرتك مش تلاحظها ولكن هي بتفرق عند المستمع مثل تقريبي
شيل تليفون على واحد أو خش محل وقول زي ممعظم الناس بتعمل وقول
سلامو عليكو
حتلاقيه يرد عادي وممكن ميبصلكش
ولكن قول
السلام عليكم بطريقة واضحة الحروف وبصوت مسموع ومتأني حتلاقيه يبصلك بإحترام وبيرد السلام كامل ﻵخره

وبعدين عندك مثلا في الدول العربية بعضها عندهم شفرة من يقول سلام عليكم بتنوين الميم في سلام فده شيعي ومن قال السلام عليكم فده سني

وعلى نفس المبدأ كلمة المواطن في دول الخليج وأوربا وأمريكا تعني حاجة كبيرة يعني ده إنسان من درجة أولى والمهاجر أو الضيف أقل منه بحيث إنك لو شفت مواطن إماراتي في اﻹمارات فده يبقه توادر وليه حسبة تاتية فأتا بعانل إخواتي هنا في المنتدى زي بفخمه وأعظمه وأكبر مقداره وأقول صديقي المواطن
أما فرقها عن أخي المواطن
فصديقي المواطن بها حميمية أكثر وتقرب المسافات بينك وبين الشخص الذي تخاطبه أما أخي المواطن فدي تحسها رسمية ودايما تسمعها لما الحكومة تحب تعمل إعلانات تحديد النسل أو تشتري الدقيق أو حملات التطعيم فيقلك أخي المواطن أختي المواطنة
وأنا بطبق الحديث النبوي الشريف
من سن سنة حسنة في اﻹسلام فله أجرها و أجر من عمل بها ومن سن سنة سيئة في اﻹسلام فعليه وزرها و وزر من عمل بها
وأكيد حضرتك بتبقه مبسوط لما حد يقللك صديقي المواطن فأي حد حيستعملها والمقابل حيسعد فأنا أتمنى على الله أن يأجرني عليها
وكمان أنا مشهور جدا مثلا ناس متعرفش إسمي تخش شارع فيه ورش على طول يقللك صدام المواطن ولما ح يسيف نمرتي في تلفونه بقوللو إكتب صدام ولقب العيلة يروح هو قايل ﻷ حكتب المواطن
ومن باب النكت والضحك بعض الناس بينادي ويقول صديقي المواتن بالتاء
وممكن يمد المواطن في بقه أوي وتكون فاتحة للضحك في أول المكالمة
وبعدين أنا عندي قفشات كتير من باب المبالغة في السلام
زي تكلم حد عالتلفون وتسلم عليه وتقعد تشتغله بقه زي
السلام عليكم عامل إيه أخبارك واحشني عشان خاطر ربنا إنت عامل إيه وحياة اﻷخوة إنت عامل إيه وحياة ضمير الوطن إنت عامل إيه عشان خاطر النبي إنت عامل إيه وطبعا تقعد تتك عالكلام لغاية ميكره اليوم اللي كلمته فيه من كتر السلامات
وفي اﻵخر تمنياتي القلبية لكل اﻷصدقاء المواطنين بالخير والصحة والعافية ونرجع ونقول ونعيد ونزيد
وحياة ضمير الوطن إنتو عاملين إيه ؟
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

والله انت برنس......والواحد سعيد بان المنتدى بيضم كوكبه زى حضرتك كدة واللى للاسف اصبحوا قلائل فى هذا المجتمع
وهذا ما لزم بيانه

المشاركة الأصلية كتبت بواسطة gelgel2004

حن علينا بقى يا استاذ صدام ..
نفسى اشوف المجموعه بقى .... و الله الحافظ
وممكن نعملها لها البوم و نسميه تحف مقتنيات الاعضاء...
و دمتم للنضال و من نصر الى نصر .

صديقي المواطن
قولا واحدا وأنا نفسي كمان بقت حسرة في قلبي وحده من العربيات تخلص بنسبة 100% ولكن أنا في مرحلة التجميع فبفضل الله تعالي منذ ساعة إستلمت عربيتي رقم 10 في مجموعتي الصغيرة المتواضعة وفاضل 7 أو 8 عربيات في أحلامي وفي نفس الوقت أنا بشد 8 عربيات في وقت واحد موزعة على ورش الجمهورية فالموضوع صعب جدا وبطيء ﻷني بكلف كل حاجة يعني البشر العادي بيرش عربيته بألف بألفين أنا برش مثلا ب 10 آلاف وممكن يسمكر ب 3 آلاف أنا أسمكر ب 7 آلاف الناس تغير زيت ب 150 أو 300 أنا بغير زيت ب 850 جنيه ﻷني بعامل العربية زي أطفالي لما ييجوا ومش حخلي ولا واحد فيهم يركبها وغالبا لو فضل جنون العظمة شغال معايه فحعمل قبر زي بتاع جمال عبد الناصر وأدفن عربياتي معايه وأنا قعدت مع نفسي وفكرت كتير وقلت لو اﻹدارة عملتلي إستثناء وفتحتلي قسم خاص بي وبإسمي فأنا كل عربية حتخلص حكتب تقرير عنها وصورها قبل وبعد وممكن أحمل سجلات مصاريفها وأماكن اﻹصلاح والتعديلات اللي عليها مع اﻹحتفاظ بسر الصنعة فلو حصل كده ممن كل يوم أعمل موضوع ﻷن لو أكتب اللي بيحصل معايه محدش حيصدق ﻷن أنا كل يوم كل يوم مع العربيات وبمر بمواقف صعبة وطويلة ومفرحة ومؤلمة وتجاربي مع شراء 6 من عربياتي بالقسط وتجاربي مع رجال المرور اﻷشاوس والحوارات اللي مش وطنيه وكمان لك أن تتخيل عربيتي رقم 1 إشتريتها شهر 9 من عام 2009 ومن يومها وهي في رحلة الشد والتعديل وصلت مصاريفها قرب حدود ال 70 ألف ولسه العربية مخلصتش رش بس 90% من حاجتها جاهزة ويمكن حتعوز بتاع 20 ألف وتخلص ولك أن تتخيل عربية إشتريت بعدها 9 عربيان منها ما هو خدته من التوكيل زيرو ومنه ما هو نظيف ومنها ما هو شلته من المزابل ومنها ما هو مقلوب ومنها ما هو حتى المكنة مفكوكة ومحوطة في الشنطة وقسما بالله أحد أسرع عربيات الملاكي في الجمهورية أنا شاريها من مكان إتعمل رصيف لرمي أنقاض وزبالة اﻷهالي محدش عارف قيمتها
وتصدق حالل فتيس عربيتي رقم 6 اﻷوتوماتيك من سنتين عند ورشة بتاع الفتايس ومش فاضي أقفله من سنتين وزمان صاحل الورشة إفتكرنب مات لدرجة الصنايعي اﻷي جاني البيت حل الفتيس وخده شفته مره بالصدفة فاتح ورشة مستقلة شفت بقه وإنت تخيل ومظنش حفضى أقفله خلال ال 6 شهور القادمة ﻷن فيه عربيات ماسكة دور قبلها
وممكن عربية أعدلها وأبص غليها بعد سنة وأحط أفكار جديدة وأقعد أضيف من تاني وكمان معنديش عربية لونها شبه الثانية وكل شغلي خلطات وعايز أقلك حد غيري كان جتله جلطه من زمان أنا في تلفوني نمر ما لا يقل عن 400 أسطة وكمان أنا في تلفوني مخزن 105 ملف فيها حسابات العربيات وتفاصيل كل أسطة مع خطة شراء قطع الغيار والكماليات الناقصة لكل عربية وكل شهر وقوائم تفصيلية بقطع الغيار والكماليات اﻷي محطوطة أمانات عند ورش اﻷسطوات أحسن ما أتوه وتضيع أو تتسرق أو أنساها وخطة مصاريف الشهر القادم والذي يليه وجداول التقسيط الشهرية ومشكلة كل شهر إنك معاك 10 جنيه وإنت مطلوب منك 15 جنيه فإزاي توزعها على 10 أو 12 واحد ومتزعلش حد يعني أنا أحيانا من التفكير دماغي بيسخن الظاهر الراديتير عندي محتاج يتسلك وفي اﻵخر اللي محسسني بالتعب النفسي والغربة محدش من عيلتي أو أي صاحب ليا بيحب هواية العربيات وبيحسوني شخص مش من كوكب اﻷرض ونفسي ألاقي حد ليه في هوايتي ونروح ونيجي مع بعض وننزل اﻷقاليم سوا وممكن نسافر أسوان 1200 كيلو ونحط بنزين ب 300 جنيه عشان نروح نجيب مسمارين وصمولة ب 2 جنيه ونص ونبقه مبسوطين وإحنه راجعين العربية تتقلب مني وعادي مش نزعل قسما بالله في شهر واحد وفي عربيتب رقم 7 أنا إنفجر عندي 4 فرد كاوتش ومش زعلان منهم 3 وأنا رايح أنجوز بنت ولابس بدلة وقسما بالله آخرها البارحة رابح أقابل عم البنت قبل موصل ليه ب 50 متر إنفجر كاوتش ركنت العربية حضرت المقابلة ورجعت غيرتها فرشت السجادة في اﻷرض وعشت حياتب وقسما بالله قسما بالله الفردة الخلفية من نفس الجنب مغيرها في الشارع قبل صلاة الجمعة بربع ساعة طبعا حد غيري يمشي بجوازة يروحلهم 4 مشاوير منهم 3 ينفجر الكاوتش ويترمي فقولا واحدا حيقلك ما شاء الله عتبتهم خضرا وحنشوف أيام سودة بس أنا متعود وبكبر دماغي وإيماني بالله كبير
معلش صدعناكم أعذروني
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

انا باؤيد بشدة فتح قسم خاص بحضرتك زى قسم سبعاويات
ودمتم للنضال

ياريت فعلا نفتتح قسم باسم الاستاذ صدام
هتبقى حاجه خاصة للمنتدى وجديده
والمتابعين هيزيدوا كتير جداً