الموضوع: تحذير من حفر الدائري .. ومحاولة نصب وقعت فيها

السلام عليكم ورحمة الله وبركاته

بداية الحمد لله على كل حال .. الحمد لله على نعمه كلها .. والحمد لله على قضاء الله وقدره

القصة باختصار اني كنت راجع من الشغل من المعادي وواخد الطريق الدائري اتجاه 6 اكتوبر

بعد منزل المنيب والبحر الاعظم على طول في حفرة رهيبة جدا على الدائري بعرض الحارة التانية كلها تقريبا .. والمهم حاولت افاديها لكن للاسف نزلت فيها بالعجل اليمين (امامي وخلفي)

من شدة الصوت انا افتكرت ان الجنط اتنى وركنت على جنب وكنت خايف من ان العجلين يكونوا اتنوا


في الوقت ده كان في عربية 128 ماشية قدامي والراجل لما سمع صوت الوقوع فى الحفرة فراح واقفلي على جنب لما لقاني بركن

المهم نزلت ومتخيل ان في مشكلة حصلت وكنت خايف يكون في حاجة فى المقص او المساعد او الكبالن او اي حاجة تانية

المهم الراجل اللى نزلي مشكورا قالي انا ميكانيكي وقالي هكشفلك على الكاوتش .. لفيت الكاوتش ناحية اليمين .. الراجل قالي ان في تسريب زيت بتاع الفرامل

علشان اتأكد دخلت العربية ودوست على الفرامل ملقيتش فرامل فعلا .. فقلت الحمد لله اني وقفت وان الراجل وقفلي وطلع ميكانيكي

جاب الكوريك ورفع العربية .. في تسريب زيت فعلا .. الراجل قالي ان في حساس للفرامل اتكسر

قالي استناني هروح اجيبلك واحد تاني وعلبة زيت فرامل واجيلك

بعد فترة جه فعلا .. وزود زيت الفرامل وطلع الهواء منها .. وركبت الكاوتش .. حاسبته ومشيت

فضلت طول الطريق ماشي بالراحة علشان مقلق من الفرامل خصوصا انى حاسس ان دواسة الفرامل نزلت شوية

المهم روحت البيت وكانت صلاة العشاء فاتتني طبعا من الوقفة على الدائري

فقمت علشان اتوضأ واصلي

في اللحظة اللى دخلت فيها علشان اتوضى .. الشيطان استلمني

انا كنت شاكك في ان في حاجة غلط فى الموضوع من اساسه .. لسببين هقولهم بعد شوية

دخلت فى الصلاة .. اول ما خلصت الصلاة قلت لمراتي انى اتنصب عليا !! (الشيطان ابن ال&^%# اقنعني طول الصلاة انه اتنصب عليا فعلا) واتأكدت من الكلام ده لما رحت التوكيل النهاردة

ليه بقه اتنصب عليا من الميكانيكي اللى وقفلي؟

انا كنت شاكك في الموضوع بسبب:
1- اذا كان الحساس حسب ما ادعى الميكانيكي اتكسر .. طيب ليه الكاوتش سليم ومتناش حتى ولا الهوا اللى فيه اتسرب !!
2- السرعة الرهيبة والعجيبة اللى رجع بيها الميكانيكي (12 دقيقة بالضبط ولقيته واقف قدامي)
3- حسب ما ادعى ان في حساس الفرامل اتكسر .. مفيش حساس فى الفرامل اصلا (العربية مفيهاش اي بي اس)


ايه بقه اللى حصل (الشيطان هو اللى وسوسلي بكده وانا بصلي وهو ده اللى حصل فعل)

لما لفيت الكاوتش ناحية اليمين علشان الميكانيكي يكشف عليه (كما ادعى) قام الميكانيكي النصاب بفك خرطوم زيت الفرامل (وانا مش واخد بالي طبعا) وقام مطلع ايده وهيا مليانة زيت علشان يقنعني ان في مشكلة .. استغل في كده الخضة والخوف اللى كنت فيه لحسن يكون في حاجة حصلت فى العربية

الظريف فى الموضوع ان النصاب ده قالي انه اشترى الحساس بـ 280 جنيه والزيت بـ 10 جنيه .. يعنى هو كان عايز 300 جنيه

مكانش معايا ساعتها غير 200 جنيه .. اديتله 200 جنيه بس واخدت عنوان ورشه ابوه .. وفعلا كنت هروح البيت اخد فلوس وانزله تاني اديله باقي فلوسه (كنت اهبل ساعتها فعلا ) كنوع من احترام الراجل ووقفته وانه فعلا دفع فلوس من جيبه علشان يساعدني وانا في عز الازمة على الدائري (كنت فاكرها مشكلة بجد لان ليا تجربة سابقة مع الفرامل برضه والحمد لله على كل حال) ومكنتش عايز اتأخر في فلوس على حد .. لكن الحمد لله على كل حال الواحد اكتشف انه اتنصب عليه



على العموم ... انا بقول الحمد لله انه جت على قد كده احسن من ان العربية كلها تتسرق

والحمد لله على كل حال

المشاركة الأصلية كتبت بواسطة mahmoud869

يعني الراجل قاعد جنب الحفرة عشان يقلب عيشه!!!
المصري مايعديش فرصة الا و يستغلها حتي لو حفرة

للحق .. الراجل مكانش واقف جنبها .. هو كان ماشي قدامي بقاله فترة على الدائري (لان الطريق بيبقى زحمة جدا بعد الساعة 5 فوق النيل لحد نزلة البحر الاعظم) لكن لما لقاني بركن فواضح ان استغل الفرصة ونصب عليا

الحاجة التانية انا رحت التوكيل النهاردة وقلتلتهم ان في مشكلة فى الفرامل وعايزكوا تكشفوا عليها وتشوفوا التسريب (مقولتهومش على اللى حصل اصلا)

دخلوا العربية وفضلوا ساعتين بيكشفوا عليها وقالولي ان مفيش اي حاجة وكل حاجة سليمة .. قالولي ان التسريب بتاع زيت الفرامل اللى ظاهر على الكاوتش ده بسبب ان حد (كان بياخد هواء من خرطوم الفرامل ويزود زيت) ... وهو اللى عمله الميكانيكي النصاب .. ومهندس الصيانة اللى فى التوكيل اكدلي ان عربيتي مفيهاش حاجة اسمها حساس الفرامل اصلا

عموما .. والله انا مش زعلان على الفلوس اللى اخدها ولو لقيته قدامي فى الشارع مش هعمله حاجة ولا هكلمه ولا حتى هطلب منه الفلوس .. لكن قسما بالله العظيم ما هسيبه يوم القيامة قدام رب العالمين .. مليش فيه والله العظيم ما هيفلت مني يوم القيامة وساعتها بقه يبقى يدورلي على 200 جنيه يرجعهوملي لو يقدر .. بالنسبة لي ده استثمار هاخده يوم القيامة ان شاء الله