أفيدونا عن معدل أستهلاك البنزين في التريوس 2007 أتوماتك 4*4

السلام عليكم و رحمة الله وبركاته
الحمد لله أشتريت التريوس 2007 الأتوماتك 4*4 بـ ABS & Air Bages و كانت أرخص من الموديل 2008 بحوالي 2500جنية مع العلم أن مفيش فرق بين 2007 و 2008 إلا أن في 2008 بيعطوا مع العربية علبة طفاية سجاير و دوسات أرضية و طفاية حريق
بس أعطوني جهاز أنذار و مادلية هدية على الـ 2007 , الكلام ده كله كان في شهر فبراير 2008 و من وقتها و أنا فرحان بالعربية و بكل تفصلها ماعدا حاجات بسيطة و حاجة وحدة كبيرة مزعلاني
الحجات البسيطة هيه: الـ CD مبيشغلش غير الـ Audio فقط ( MP3 لأ ) , السحب بتعها واطي شوية علشان موضوع الأتوماتك , أقصى سرعة جبتها بيها كانت 145 ك/س ( ذي عربيتي القديمة شاهين 96 )
كل اللى فات ده كوم صغير و اللي جي كوم كبير بخليني أنصح زميلي بعدم شراها إلا لو كانت أحجامهم كبير ذي حجمي و مبيحبوش يوطوا أوي لما يدخلوا العربية أو يطلعوا منها.
الكوم الكبير أو المشكلة الكبيرة أو الحاجة المزعلاني نفسيا و ماديا هي أستهلاك البنزين و أضربلكوا مثل لتقريب الصورة:-
سافرت مرسى مطروح بالعربية من الأسكندرية و معي ثلاث أشخاص بشنطهم و كميات مياة عذبة في الشنطة و فوق السقف على سرعة مابين 90 و 100 ك/س علشان قانون المرور الجديد كان معدل أستهلاك الوقود حسب كمبيوتر العربية هو 10.6 لتر / 100 ك و في الواقع أني فولت في أسكندرية و وصلت مرسى مطروح و في التنك أقل من ربعه بنزين 92 من أم 185 قرش للتر
زملائي معاهم 3 أوبترا و كل واحد محمل العربية بتعته ذي و أستهلكوا أقل من نص التنك و نفس الحكاية في الماتركس
مع العلم العربيات الأخرى منها الأتوماتك و منها المانوال و كلها 1600 سي سي مش 1500 ذي بتعتي
أنا حاسس أني كل شوية أحط بنزين بمعدل كبير مش ذي بقية الناس
معدل الأستهلاك الكلي من شهر 2 و حتى ألأن هو 11.5 لتر / 100 ك و الكلام المكتوب في الأعلان بتاع السيارة هو 8.5 ل / 100 ك عند سرعة 90 ك / س مش صحيح
أرجو الأفادة من خبراء الموقع و أصحاب التجارب أو أي حد أبن حلال عندة فكرة عن حل المشكلة دية
أنا حاسس أن فيه حاجة غلط أيه هية مش عرف
و أسف على الأطالة و شكرا مقدما على الرد
أخوكم محمد
http://www.postimage.org/gx1ATpCS.jpg

نفس الكلام معايا في السيريون

كانت في الاول أقل من اللي مكتوب كمان في الجرايد دلوقتي بقيت 11 وحاجات غريبه كده وانا كمان 1300 :diablo1:

طيب انا معايا نفس العربيه 2008 من غير اير باج
واحلفلك بالله اني راجع مثلا امبارح من على المحور والكمبيوتر قاري 7.5 لتر لكل 100 كيلو رغم اني مشغل التكييف على الدرجة 2 باقصى تبريد ومعايا اسرتي
احتمال كبير ان البنزين مش من محطه كويسه لاني فعلا لما بعبي بنزين من امارات مصر او وطنيه او توتال بيكون فرق كبير من المحطات التانيه و حتلاقي كلام كتير عن الفروق دي في المنتدى لو حبيت
كمان فيه عوامل كثير بتزيد استهلاك البنزين زي فلتر المبرد و كمية هواء الاطارات واسلوب القياده رياضي ام تقليدي ..
وفي انتظار رأي خبرائنا الكرااااام ..
تحيتي للجميع ..

عزيزي

التيريوس استهلاكها اعلي من الأوبترا وعن تجربة لأني املك الأثنين
التيريوس بالكويت اوتوماتيك وبنزين 95 ومصر الأوبترا اوتوماتيك
بنزين 92

السبب في رايي ان التيريوس لفات موتورها عالي بالنسبة للسرعة
عن الأوبترا ودة طبعا بيعمل فرق واضح

علي سرعة 100 كم حاتلاقي التيريوس الأوتوماتيك علي حوالي
3000 لفة/دقيقة والأوبترا بتكون حوالي 2500 لفة/دقيقة او أقل
يعني فيه حوالي 500 لفة فرق في كل دقيقة سواقة

بأمكانك تسأل اصحابك من ملاك الأوبترا عن كدة وتشوف

م.تيمور

نوع البنزين بيفرق فى العربية ديه ؟؟ يعنى لازم استخدم ال 95
و لا ممكن ال 90
انا معايا كيا ريو دلوقتى و بفضل احط فيها ال 90 عن ال 92 علشان ناس كتير اشتكت من ال 92 و انا منهم .
و انشالله ناوى اجيب التريوس اليومين دول و عايز اعرف ممكن احط ال 90 ولا لازم ال 95 .
و خليك معايا يا باشا بئا اليومين دول بصفتك واحد من خبراء التريوس فى المنتدى .

حياك الله بالجنه وربنا يباركلك فيها مقدما ان شاااء الله
حريحك من النقطه دي ان شاااء الله واقول اني عن خبره وعن سؤال كثير من الثقاااات لما بتحط بنزين 95 من محطه نضيفه بيديك مسافه اطول من بنزين 90 وده فعلا عن تجربه .. يعني في الآخر حتلاقي تقريبا انك بتدفع نفس المبلغ مع ميزة انك بتريح الموتور بالاوكتين الاعلى والشد بيكون اقوى اكيد والصوت اهدى خصوصا لو استعملت اضافت تحسين اداء المحرك من موبيل او شل
فيه ناس بتحط 92 وماشتكيتش منه اطلاقا ودي اول مره اسمع عن شكوى من 92 مش من محطه معينه
المحطات الكويسه بتفرق كثير معاك في كل شيئ مسافه اطول واداء اقوى وصوت اهدى
كمان تيريوس مش حريقة بنزين اطلاقا حتى مع استعمال المكيف زي كل الياباني خصوصا كمان انها 1500 سي سي ..
مبروك تاني مقدما واهلا بيك مع ملاك القوه الهادئه تيريوس :)

شكرا يا باشا على الرد السريع و الله يبارك فيك ،
و ربنا يسهل انا رايح احجز العربية بكرة ،
بس معلش كان فيه سؤالين :
1- ايه هى اضافات تحسين اداء المحرك ، علشان معرفش عنها حاجة الصراحة ، و المفروض اشتريها و احطها بنفسى و لا الناس اللى فى المحطة هى اللى بتضفيها .
2- ممكن استعمل ال 90 فى حالة عدم توفر ال 95 علشان ال 95 مش بيكون متوفر اوى عندنا فى الاقاليم ، يعنى فى حالة عدم وجود ال 95 لازم استخدم ال 92 و لا ممكن ال 90 .

و معلش كمان محتاج شوية نصائح عامة بعد استلام العربية انشالله و التليين و الاكسسوارت و اى نصائح خاصة بالعربية ممكن تحب تقولهالى من دلوقتى علشان انشالله المفروض استلمها بعد اسبوع ، معلش هتعبك معايا، بس ده بئا قدرك علشان انا اقنعت بالعربية اكتر لما شوفت الصور بتاعت عربيتك بعد تركيب الديفندر و لما سمعت كلامك عنها ، ربنا يباركلك فيها .

ل اابدا انا تحت امرك وما فيش اي تعب ..
الاضافات العامل في المحطة هو اللي بيحطها وهي في الاساس بترفع اوكتين البنزين يعني مثلا بنزين 90 بيبقى مساوي ل 92 ولو اضفت على 92 يبقى مساوي ل 95 وهكذا .. وده بيقلل من سلبيات اشتعال الوقود داخل المحرك وعدد الضربات مما يطيل عمر المحرك ويحسن ادائه في العمل والسحب ويقلل من الرواسب المعدنيه داخل المحرك المهم انه افضل من كل النواحي .. يعني ممكن لو 92 مش متوفر تستخدم 90 والاضافات دي على فكره مش بتحطها كل مره تفول العربيه ولكن مره كل شهر تقريبا حسب استعمالك يعني حطها مره كل اربع تفويلات ودي كل المعلومات اللي وصلتني بخصوص اضافات الاوكتين من الثقااااات ..
النصايح العامه بعد استلامك العربيه ان شاااء الله هي ..


1 - اشتري من التوكيل طبعا او موزع معتمد
2 - حتجيب طقم ديفندرات الاصلي من التوكيل بيدي العربيه شكل تاني
3 - تستعمل بنزين 95 من امارات مصر او وطنية او توتال الفرنسيه
4 - التكيف ماتشغلوش اطلاقا الا بعد صيانة الالف
5 - حتروح محطة وطنيه اللي قبل المطار من الاوتوستراد و تديها وش بوليش اول ماتستلمها بيلمع العربيه وبيحافظ على الدهان بالشهور
6 - ماتخليش حد يسوقها على قد ما تقدر غيرك انت عشان حسن المعامله

دي ملاحظاتي عالسريع ومستني اي استفسار منك انا في الخدمه
ولاتنسانا من صالح دعااائك :)

شكرا يا باشا على الرد السريع و ما نتحرمش منك و من ذوقك ابدا .

سؤال كمان يا باشا ،
بالنسبة للديفندر و انا عارف انك اتسألت عليه كتير بخصوص المرور و الترخيص و كده ،
بس انت تنصحنى انى اركبه و اطلع بيه على المرور علشان الترخيص و انا و حظى معاهم ، و لا اروح ارخص الاول و بعد كده ارجع الوكيل و اركبهم ، و لا فيه طريقة وانا بشتريهم من الوكيل تخليهم يسجلوا ان العربية بالديفندر علشان تساعدنى فى الترخيص ( انا سألت واحد فى التوكيل و قالى ما ينفعش علشان العربية بتيجى كده من برة ) بس فيه طريقة شبه كده ؟

حضرتك دلوقتى متسجل عندك فى الرخصة انك مركب الديفندر و لا لما بتقابل حد من المرور بتفهمه ان لوحة النمر واضحة و انها عربية 4*4 و انت و حظك مع دماغهم .

حياك الله اخي الكريم ..
انا الديفندر والحمد لله في عز الرخاماااات وتصيد الاخطاء ماجاليش اي ملحوظه او حد وقفني عشانه بيبصوا عليه اوي بعدين بيعدوني والحمد لله وده اكثر من 10 كماين ولجان
لكن بالنسبه للارقام الجديده لازم تركب مره واحده بس مش زي القديمه تركبها في المرور وبعدين تخلعها وتركبها عالديفندر .. لانها غير قابله للفك ابدا وبتتشرخ تقريبا وتبقى غير صالحه
يعني انا رأيي انك قبل ماتشتري الديفندر الجديد تسأل الاول في المرور معلش حد محترم كده ومرن وياسلام لو ليك واسطه يكون اريح .. هما شرطهم ان العربيه تكون جيب والارقام واضحه وده متوفر في الديفندر الاصلي بتاع التوكيل
انا رخصتي مش متسجل فيها الديفندر لكن ماقابلتش اي مضايقات الى الآن والحمد لله
بس اطمنك لانهم مش معقول مصر حتلغي كل ديفندرات الجيب ده غير منطقي
في حفظ الله وتوفيقه ..

اقتباس:

---

المشاركة الأصلية كتبت بواسطة boty50

عزيزي

التيريوس استهلاكها اعلي من الأوبترا وعن تجربة لأني املك الأثنين
التيريوس بالكويت اوتوماتيك وبنزين 95 ومصر الأوبترا اوتوماتيك
بنزين 92

السبب في رايي ان التيريوس لفات موتورها عالي بالنسبة للسرعة
عن الأوبترا ودة طبعا بيعمل فرق واضح

علي سرعة 100 كم حاتلاقي التيريوس الأوتوماتيك علي حوالي
3000 لفة/دقيقة والأوبترا بتكون حوالي 2500 لفة/دقيقة او أقل
يعني فيه حوالي 500 لفة فرق في كل دقيقة سواقة

بأمكانك تسأل اصحابك من ملاك الأوبترا عن كدة وتشوف

---

كل الاحترام للجميع ... انا عندي تيريوس اوتوماتيك محرك 1300 j1 رباعية الدفع موديل 2000 قاطعة فقط 80000 كم اعاني ايضا من الاستهلاك الكبير للوقود داخل المدينة 6.5 كم / لتر وخارجي 10- 11 كم / لتر قمت بفحص جميع ما يمكن ان يكون سبب في استهلاك الوقود من حساسات وعيار صباب وحماية البيئة والاطارات ... الخ وكل شيء كان ممتاز ضمن الحد المطلوب ولكن كما اسلفت يا صديقي نسب الجير الى السرعة بطيئة و ما ورد في مواصفات السيارة لا يتلائم مع الواقع وجزاكم الله خيرا

معايا نفس العربيه تيريوس 2000 اوتوماتيك واستهلاكها عالي جدا وكشفت على كل حاجه وباعمل كل الصيانات في ميعادها!!