للمتزوجين حديثا بتروح عند حماتك قد ايه وبتاخد معاك ايه

**Moustafa.yonis** · 08-12-2013 10:25 AM

المشاركة الأصلية كتبت بواسطة saddam

صديقي المواطن
قبل أن أكمل قراءة كل تعليقات اﻷخوة الزملاء من المناضلين في منتدانا الكريم
فقولا واحدا نصيحتي المختصرة
بكره تنزل إعلان بالوسيط وتبيع شقتك وتنقذ نفسك وعيلتك وتشتري راحتك وصحتك وتشتري نفسك وإلا إنت بتفتح على نفسك فتوحة وإلا إنت حتفضل تقاوح وتفضل تعافر وتفضل تفرفص وتفضل تلزق وبعد كام سنة ترجع وتقول
صدام المواطن نصحني بس أنا مسمعتش نصيحته وحيكون دايما شعارك في المرحلة دي
إحنه إنتهينا خلاص
أما الصح تعمل إيه
زيارة الزوجة ﻷمها تكون مرة أسبوعيا وإنت توديها وتجيبها فقط ومتطلعش وتروح مرة واحدة في الشهر تتغدى عندهم وتقعد 3 ساعات ولازم تحافظ على إنك دايما تخش تملالهم الثلاجة بزيارتك أو تجيب صندوق كيت كات أو تويكس وتحافظ عالتقليد ده سنين وسنين عشان يوم دخولك عندهم يعتبر تجربة سعيدة ومش مرهقة وكمان لو عندهم سكر تكون إنت قصرت وبتجيب من اﻵخر
صديقي المواطن
أنا مش عارف إنت بتفكر إزاي
فيه ح يسكن جنب حماته ويحط البنزين جنب النار ليه أعمل في نفسي كده ليه بمرور الزمن أجرأ مراتي وأقويها عليا

التاس أساسا يا إما يتجوزوا بنات تكون أمهاتهم بره مصر وطبعا ده فاز بالدنيا واﻵخرة وفيه ناس بتتجوز من محافظات تانية وده أمه داعياله وفيه ناس تتجوز من نفس المحافظة فده ربنا يتولاه زي البطيخة يا صابت يا خابت واللي زي حضرتك متجوز في نفس الشارع فده يا إما أمه مش راضية عليه أو هو مؤمن أوي فربنا بيختبر إيمانه وبيحطو في مصائب وإختبارات يومية فإن صبرت فأنت مأجور عليها
ولما حتعزل عاوزك تسكن بعد منطقتين من بيت حماتك وأهم حاجة ميكونش مترو يربط المنطقتين
يعني اللي من الهرم لازم يتجوز من مدينة نصر أو مصر الجديدة
صديقي المواطن إنت كده حياتك بعد فترة صباح المؤمرات ومساء الدسائس وسيبك من كلام الدعايه واﻹعلام بتاع فيه حماوات ذهب وبيحبوا جواز بناتهم كل ده 1% ومظنش حضرتك حتوقع في ال 1 % وعملا بالمثل مستديم الفشل بتاع أنا وأخويه على إبن عمي وأنا وإبن عمي عالغريب وطبعا مش محتاج أقوللك إنك في المعادلة دي حضرتك الغريب

أرجو أن تتقبل مروري وإلحق أنقذ نفسك وأنا بكره حفتح الوسيط أدور على إعلان شقتك وإنت عارضها للبيع
وهذا ما لزم بيانه ودمتم
وبالتوفيق وإلى اﻷمام
ومن نصر إلى نصر
ودمتم للنضال

انا احترم رأي حضرتك جدا ولكن اكيد الدنيا مش سودة كده

فياريت لو حد برضه عنده تجربه ايجابية يقولها لنا

**amr011111** · 08-12-2013 10:34 AM

المشاركة الأصلية كتبت بواسطة saddam

ولما حتعزل عاوزك تسكن بعد منطقتين من بيت حماتك وأهم حاجة ميكونش مترو يربط المنطقتين
يعني اللي من الهرم لازم يتجوز من مدينة نصر أو مصر الجديدة

حلوه الحته ديه
ان مفيش خط مترو يربط بين المنطقتين علشان الدنيا متبقاش سهله

**mahmoud869** · 08-12-2013 10:45 AM

المشاركة الأصلية كتبت بواسطة horeen

أنا بروح عند حماتى كل أسبوع يوم الخميس
وأنا رايح باخد ليها معايا زوجتى العزيزه
بس هيا يترفض الهديه وترجعها معايا ومش بترضى تخدها ليهم
وعلى كده كل أسبوع وبرده مش بترضى تخليها
واقعد طول الأسبوع أقول يارب تخدها المره الجايه

هههههههههه

**mrghost** · 08-12-2013 10:51 AM

مرة كل اسبوع بقضى هنالك الحمعة من اول اليوم (تغيير جو ﻻنها فى بلد ارياف)
وباخد معايا اى حاجه بسيطة كل مرة

**meero_boy2000** · 08-12-2013 10:55 AM

بروح اسبوع اه واسبوع لاء يوم جمعه الصبح واروح بالليل وبتغدا وممكن لو قريب منها في وسط الاسبوع ومراتي عايزه تشوف مامتها نروح ساعتين ونمشي ومش لازم نتغدي يعني وبرضه مش كل مره باخد معايا حاجه طبعا وفي الغالب بتكون فاكهه

**friendship7897** · 08-12-2013 04:15 PM

زي ما تعود مراتك هتتعود من الأول
يعني بيت حماتك بعيد ! قريب ! مش هتفرق بناءاً عليك أنت
بمعنى إن لو مراتك مش بتشتغل يبقى قرارك إن ماينفعش تروح لها لوحدها
ولازم تكون أنت معاها ( علشان بتخاف عليها من الطريق مثلاً ) أو أي تلكيكة كدة
ولو بتشتغل يبقى لازم تغديك الأول في بيتكم وبعدين عايزة تروحي روحي ( ياروحي) وهي نفسها مش هتكون فاضية للبيت والشغل وبيت مامتها

وفي النهاية أنت نفسك ماتروحش أكتر من مرة في الأسبوع ( أنا ما قولتش المفروض علشان أنتم متزوجين جداد – والمفروض مرة في الشهر )

علشان بصراحة الحمواتين بيجيبوا مشاكل للأسرة

لو والدتك : هتكون عايزة أبنها في أحسن حال ولو شافت أقل تأثير من زوجتك لأي سبب تافه بتقلب عليها وبتقلب مشاكل .
ونفس الحكاية على والدتها : أنتي إزاي ساكتة على كدة ؟! ، المفروض يعمل كدة ؟!
غير النقد الدائم لو جبت حاجة كل مرة أو ما جبتش حاجة كل مرة ، ودا بسبب الزيارة الكثيرة
وكل بعيد عزيز ، والممنوع مرغوب
فلما تكون زياراتك عزيزة هتكون ترحابهم أعظم ، وهدايك أعلى وأغلى
أنا شخصياً عودت جوزي ( بعد ما هو اللي قال لي مأروحش كتير ) على أني مش بروح لوالدتي إلا بعد إستأذنها تليفونياً

، وأصبح هو اللي بيستغرب ويقول لي : دا والدتك ، ويتحايل عليا أروح لها .
بس أنا بعمل كدة علشان هو كمان مايروحش إلا بعد الإستأذان
وبيكون زيارته موسمية يعني في الأعياد والمواسم الرسمية ، ونعمل أحسن واجب

، ( ونعمل دي ) بالنسبة لي أنا : لأني أنا تبع الطرفين
فنعمل أحلى عزومة ( بما أني تبع ماما ) ، ونعمل أحلى زيارة ( بما أني تبع جوزي )
وربنا يوفقك
أه صحيح : جوزك على ما تعوديه
وأقلب القدرة على فمها ....
وأدبحلها القطة ....

المشاركة الأصلية كتبت بواسطة horeen

أنا بروح عند حماتى كل أسبوع يوم الخميس
وأنا رايح باخد ليها معايا زوجتى العزيزه
بس هيا يترفض الهديه وترجعها معايا ومش بترضى تخدها ليهم
وعلى كده كل أسبوع وبرده مش بترضى تخليها
واقعد طول الأسبوع أقول يارب تخدها المره الجايه

يا ولاد الأيه !!
أنا عرفت دلوقتي هو بيتحايل عليا أصل الرحم وأروح لوالدتي كتير ليه !!
علشان يرجع لهم الهدية

!

**mem** · 08-12-2013 05:49 PM

المشاركة الأصلية كتبت بواسطة horeen

أنا بروح عند حماتى كل أسبوع يوم الخميس
وأنا رايح باخد ليها معايا زوجتى العزيزه
بس هيا يترفض الهديه وترجعها معايا ومش بترضى تخدها ليهم
وعلى كده كل أسبوع وبرده مش بترضى تخليها
واقعد طول الأسبوع أقول يارب تخدها المره الجايه

بجد موتنى من الضحك